الخميس، 26 يونيو 2008

واحد صاحبي كان عبيط

اعرف واحد صاحب من زمان كان بيحب واحدة قوي وفضل يحبها ييجي سنتين بس كان نيلة وخيبة ومش قادر يقولها انه بيحبها ماكانش بيتصور الدنيا من غيرها كانت كل حاجة في حياته لو عدي يوم من غير مايشوفها يبقي يوم منيل بستين نيلة كانوا زمايل في الكلية وبسببها كره الاجازة علشان مابيشوفهاش كان نفسه الدراسة تبقي 24 شهر في السنة لو شافها في يوم متضايقة ولا زعلانة كان بيعمل اراجوز علشان يضحكها كان بيقضي اليوم كله معاها الصبح في الكلية وبالليل علي الشات كان بيدور في وشها هي عايزة ايه ويعمله قبل ماتفكر فيه

وفي يوم بعد سنتين معاناه مع المرض المزمن ده لقي رسالة منها علي الايميل
انا عارفة كل حاجة من اول يوم شفتك فيه حاسة باللي جواك عارفة انك بتحبي وانا كمان حبيتك كنت باحس بيك وانت بتحاول تقف جنبي وانا تعبانة كنت بافهم كل تلميحاتك اليوم اللي كان بيعدي من غير ما اشوفك ماكنتش بحسبه من عمري لو شفتك متضايق ماكنتش باعرف اقعد علي بعضي وبابقي مش عارفة اعمل ايه علشان اريحك كنت باستناك كل يوم تقولي بحبك لا ما انت كنت فعلا بتقولها كل يوم انت اجمل انسان قابلته في حياتي
وفي اخر الرسالة كان فيه ملحوظة صغيرة
خطوبتي يوم الحد اللي جاي اوعي ماتجيش هازعل قوي لو ماجتش

هناك 7 تعليقات:

غير معرف يقول...

يا ترى مسموح بالتخمينات بخضوص صاحبك و مين هي فتات احلامه

غير معرف يقول...

فى واحده صاحبتى زمان قالتلى جمله تنطبق على اللى انت حاكيته ديه .... الدنيا مبتديش محتاج
وعلى راى شيرين
كتير بنعشق ولا بنقول
وكتير بنعشق ولا بنطول
ومفيش حكايه بتستمر زى ما بدأت...
قولى صحيح دى حكايتك ولا حكايه واحد صاحبك زى ما انت بتقول؟؟؟
لو هى حكايتك فتسمحلى اقولك هى اللى خسرت لان اللى تلاقى انسان يحبها بالشكل ده وتسيبه اكيد هتفضل ندمانه طول عمرها.....صدقنى انا بقولك عن تجربه مفيش حاجه فى الدنيا كلها ممكن تعوضك عن انك ترتبط وتعيش مع الانسان اللى بتحبه واختاره قلبك

Mina يقول...

ياباشا طبعا مسموح اي حاجةمسموحة هنا مافيش هنا اي حاجة ممنوعة الكلمة الوحيدة اللي ممنوعة هي كلمة ممنوع
قول اللي في نفسك وماتتقلقش
بس الاول اعرف انت مين ههههههههههه

Mina يقول...

والله يارنا انا مش شرط اللي بتقوليه ماهي ممكن تكون برضو اختارت واحد تاني بيحبها وبتحبه وتعيش معاه الحب الجميل اللي بتقولي عليه
بس اللي انا قصدت اقوله هو اد ايه مشاعر صاحبي ده كانت ازاي وهو بيشوف حلم حياته بيتحقق قدامه وبيتهد في نفس اللحظة
النت اللي هايموت عليها لمدة سنتين بتقوله انا كمان بحبك بس خطوبتي يوم الحد ههههههههههههه
حلوة مش كدة
تخيلي بقي ساعتها احساسه كان ازاي
هو نفسه بيتهيألي مايقدرش يتخيل هو كان عامل ازاي ساعتها

ابن الغربه يقول...

اسمحلى اقول انه لا عمره ما كان عبيط هو الزمن والقدر وهو دا حال الدنيا
قليل قوى لو ادتك كل السعاده من غير ما تدفع التمن. والتمن دا جرح اكبر من السعاده الى هتديهالك مقابله
هى دى الدنيا وهى الزمن

Mina يقول...

يا ابن الغربة باشا الدنيا حلوة وجميلة والحياه حلوة خالص والحالة الاقتصادية في البلد زي الفل احنا اللي ولاد .......... وبلاش كلام في السياسة

مــها العباسى يقول...

طيب ليه
؟؟؟؟؟؟؟؟؟؟؟؟؟