الأربعاء، 18 يونيو، 2008

يا كداااااااااااااااااااب

هو ليه الواحد دايما بيكدب طول ماهو ماشي عمال علي بطال انا عن نفسي مش بحب الكدب واكيد مافيش حد في الدنيا بيحب الكدب لكن ساعات باظبط نفسي وانا باكدب من غير ما اخد بالي بيبقي كدب مش مقصود لكن في الاخر هو كدب برضو
يعني ممكن ابقي نازل من البيت وواخد عهد مع نفسي اني مش هاكدب النهاردة خالص وفجأة وانا ماشي في الشارع الاقي بنوتة حلوة كدة وامورة مقابلاني اروح ظابط نفسي كدة وظابط مشيتي واعمل نفسي واد تقيل مع اني مش كدة
ممكن واحد يكون ليه كرش يقوم يشفط كرشه علشان يبان واد استايل ورشيق
هو ده مش كدب ياجماعة
طيب وايه رايك في واحد يقعد في الاتوبيس ويلاقي جنبه بنت حلوة يقوم مطلع الموبيل ال (n95 ) ويعمل انه افتكر حاجة فجأة هايعملها عليه ولا يقعد يتفرج علي فيلم عليالموبيل ولا حتي يقعد يقرا الرسايل القديمة اللي فيه مع انه مش محتاج انه يعمل كدة ولو ماكانتش البنت دي جنبه ماكانش هايطلع الموبيل ولا يفتكره
طيب ده مش كدب
هاتقولي دي منظرة اه انا معاك انها منظرة انما برضو فيها كدب
هاتقولي كدب مابيضرش حد هاقولك لا بيضر
بيضرنا كلنا بيضر وبيضر نفسه وبلده
لما واحد يكون مرتبه يادوب بيكفيه لاخر الشهر واحتياجاته ماتطلبش انه يكون معاه موبايل ولو كان يبقي حاجة تقضي الغرض وتلاقيه شايل موبيل احدث موديل وبيغيره كل مايطلع جديد

مش هو كدة بيكدب علي نفسه وبيكدب علي الناس علشان يحط نفسه في مكانه مش بتاعته وبيضر اسرته اللي هم اولي بالفلوس دي
نفسي اقضي يوم كامل من غير ما اكدب علي حد ولا حد يكدب عليا
ياتري ممكن ده يتحقق
ولا هاتقولولي استني المدينة الفاضلة بتاعة عم افلاطون
فييييييييينك ياعم افلاطون
الله يرحمك قلتها كلمة حكة ومت
مافيش فايدة
لا مؤاخذة ياعم سعد يازغلول

هناك تعليقان (2):

الأباصيرى يقول...

انا مش بعتبر دة كدب بس ممكن يكون مظاهر وتنطيط على البشر
وخلينا نتكلم بصراحة افرض مثلا انك رحت لشركة خاصة تعمل مقابلة عشان شغل وكان معاك موبايل قدييم ولابس ساعة كاوتش وقميص وبنطلون تفتكر هيقدروا الراتب بتاعك بكام
ولو دخلت المقابلة لابس بدلة ونضارة شمس وموبايل حديث تفتكر هيقدروك فى الراتب بكام
مع العلم ان فى الحالتين انت نفس الشخص بنفس الخبرة ونفس الكفاءة

المظاهر ليها تمن بتدفعة وليها تمن بتاخدة
وسواء لبست بدلة او حتى ترنج مش هتلاقى شغل سعد زغلول قال
مفيش فايدة غطينى وصوتى عليا ياصفية

Manamino يقول...

يمكن يكون معاك حق يا اباصيري بس هو مين اللي عمل فينا كدة مش احنا برضو
مين اللي خلا صاحب الشغل يتنطط عليالبشر ويدي مرتب اعلي للي شكله احسن
احنا اللي بقينا بندي المظهر والشكل اكتر من حقه وبننسي اللي جوا

وبعدين سعد زغلول قال غطيني ياصفية وصوتي عليا ههههههههههههه
وبرضو ربنا يسترها علينا