الأحد، 6 يوليو 2008

كوبي وباست

زمان كنا بنقول يخلق من الشبه اربعين دلوقتي بقي ياحول الله باتمني الاقي اربعين واحد في مصر مش شبه بعض دلوقتي بقي يخلق من الشبه اربعين مليون
الناس كلها بقت شبه بعض كدة ليه ايه التوهان ده الواحد بيمشي في الشارع مش عارف هو بيمشي ولا واقف في مكانه
من كتر ماالناس كلها شبه بعض بيتهيألي وانا ماشي اني واقف في مكاني مش نفس الواد ده اللي كنت معدي عليه من دقيقتين واقف مع نفس البنت طيب يبقي انا اكيد مش ماشي اكيد انا وقفت جنبهم امال يعني هم مستقصدني وبيشوفوا انا رايح فين وبيقفوا في طريقي؟
الاتوبيسات كلها شبه بعضها الواحد مابيصدق يعلم الاتوبيس ويحفظ شكله وبرضو مافيش فايدة بيلاقي مليون اتوبيس شبهه وتبتدي تاني مرحلة التوهان واركب اتوبيس غير اللي اللي المفروض اركبه
الناس اللي ليهم خبرة من زمان في مجال الاتوبيسات القاهرية ده قالولي علي اختراع ماكنتش اعرفه قالولي ان كل اتوبيس ليه رقم وكل رقم بيروح حتة انا كنت فاكر ان كل الاتوبيسات الخضرا بتروح نفس المكان والزرقا بتروح مكان تاني بس طلعت جاي من المريخ باين
بس حتي دي مارسيتش علي حالها امبارح واقف مستني اتوبيس (66) لقيته جاي من بعيد شاورتله ركبت وبعد ماركبت ماطلعش (66) طلع (32) بس بيستهبل طيب والله الكلام ده بجد طبعا مش مصدقين
الاتوبيس فعلا كان مكتوب عليه من قدام (66) وفي الجنب (32) ماتعرفش الاتوبيس زهق من رقمه وحب يعمل (نيو لوك) ولا شاف اتوبيس زميله حاطط رقم (66) فعجبه شكله وحب يقلده
حتي الشوارع كلها شبه بعض تلاقي محل حاطط يافطة شكلها حلو تقوم كل المحلات اللي في المنطقة تقلد نفس اليافطة والواحد يقعد يلف علي المكان اللي كان رايحه ومعلمه بالمحل الفلاني الاقي ستميه محل بنفس الشكل في الشارع حتي الاسم بقوا بيخدوه ويغيروا فيه شوية حروف وساعات بيغيروا التشكيل (طبعا علشان حماية الحقوق الفكرية اللي هي اخت الحقوق الفتحية وحقوق عين شمس كمان لو تحب)
ولا الاغاني
نفسي اسمع مرة اغنية مختلفة عن اللحن اياه بتاع كل الاغاني
تطلع اغنية تلاقي مصر كلها مشغلة نفس الاغنية
من الاخر كدة تمشي في الشارع تحس انك وقعت في شريط لشعبان عبد الرحيم كله شبه بعضه وكله بيقول هييييييييه من غير مايفهم حاجة
وياررررررريت الموضوع عليالشكل وبس
المصيبة انه حتي كلامنا وتصرفاتنا بقت برضو شبه بعضها وطبعا علشان بنقلد من غير مانفكر ولا نتعب نفسنا
ياراجل ده مرة باتكلم مع بنت والبنت دي محترمة جدااااااا ولقيتها بتعبرلي عن قرفها بكلمة فيها تلميح جنسي واضح جدااااااا
طبعا هي ماتقصدش لانها للاسف ماتعرفش ومش فاهمة اصلا معني الكلمة دي ايه بس للدرجة دي بقينا بنكرر اللي بنسمعه من غير مانفكر فيه ولا نعرف معناه ايه
بس في الاخر هانقول ايه يعني
ربنا يسترها علينا
ماتنساش تعمل كوبي للبوست ده وتعمله باست عندك

هناك 4 تعليقات:

غير معرف يقول...

على فكرة هو نفس موضوع تحب تاكل اية بس صورة تانى
وكل يوم هتلاقى صور كتير جدا لنفس الموقف دة
اصل الناس بقت بوفر التفكير لحسن يغلو هو كمان اة ساعتها يبقى عندهم شوية لوقت الزنقة
وسلملى على عم كليك يمين

Mina يقول...

ماشي ياعمي وماله
بس فعلا عندك حق الناس بتوفر التفكير خايفين احسن يغلي بس المشكلة انهم لما يحتاجوه مش هايلاقوه هايكون اكسد وصدي وماينفعش يمشيهم خطوتين علي بعض
بس برضو مااااااااعلينا

غير معرف يقول...

على فكره بقى انت كده بتحكى عن الصوره الورديه اللى الناس فيها الموضوع بقى انيل من كده بكتيررررر انت عارف انا فى واحد بيشتغل معايا نفسهى مره اشوفه بيضحك الا على طول مكشر والخزن والغم و الشر باينين قووووووى على وشه واحلى حاجه فى حياته لما يقول خبر اسود لحد..... الناس مش بس بتقلد من غير تفكير لا كمان بيقلدوا الامور الوحشه والنكديه ....
كان فى زمان اغنيه بتقول
انا عندى بغبغان غلباوى بنص لسان......اهو كلنا بغبغانااااااات

Mina يقول...

صح يارنا كلنا بقينا بغباغانات راكنين مخنا مديونه اجازة لاجل غير مسمي خايفين يتعب لو فكر
يالله ربنا يسترها علينا