السبت، 22 أكتوبر، 2011

عيد جواز



واقفة قدام المراية بتبص علي نفسها بالفستان
لالالا ده مش حلو لازم يبقي مميز
ده اول عيد جواز
لازم ابقي اجمل واحدة في الدنيا
ياااااااه فاتت سنة
استني هاشوف واحد تاني
فتحت الدولاب
ايوة ده كويس
فاكره الفستان ده؟
فاكر لما اشتريته وقلتلي يابخت الفستان بيكي
حلو الفستان
لا مش ده
فيه حاجة ناقصة
استني
هالبس اول هدية جبتهالي
ايوة اهه ملفوف زي ماهو
مالبستوش غير مرة
ارخص فستان عندي
بس في قلبي اغلي من كل الدنيا
ياخسارة
الفستان مقطوع
ايوة خلاص
هالبس اول فستان شفتني بيه
فاكر يومها
يوم مادخلت عليك المكتب في الحسابات
كنت جاية وشايطة عليك
خصم ؟ طيب ليه ؟ ذنبي انا ايه
اول ماعيني وقعت عليك مانطقتش
قلتلي خير
قلت مافيش بس الخصم ده ليه
قلت فداكي بس ياريت كنت اعرف
انا قلت خلاص مش مهم وسيبتك ومشيت
فاكر البت المجنونة سعاد
يومها قالتلي ده عينه مافرقتكيش
يييييييييه يومها ماكنتش لابسة فستان
البس جينس؟ لا مش حلو
ياااااااه الساعة تلاتة بعد الظهر
ياللا تعالي بسرعة
هاتيجي قبل الساعة تمانية
لازم
عارف طبعا ليه
فاكر يوم فرحنا
سيبنا المعازيم والحفلة
كنا في بيتنا الساعة تمانية
ايوة هاتيجي الساعة تمانية انا عارفة
هالحق اوضب نفسي؟
ايوة لسة فيه وقت
بس الفستان .... البس ايه؟؟؟؟
اقولك
هالبس اللي خرجت بيه اول مرة معاك
ولا اقولك اول مرة مسكت اديا
يااااااااااااااااه
كنت هاموت
ايدي اترعشت
شديتها
قلتلي اسف
قلت انا اسفة انا مش قصدي
بس الخطوة كانت فجأة
شديت ايدي تاني حطيتها في ايدك
اقولك حاجة
ساعتها قلت ياريت مايسيبها
نفسي البس حاجة تفكرنا باجمل ايام
اقولك
فاكر اول مرة اديتك بوسة في التليفون
يااااااه عارف يومها؟
طول اليوم مكسوفة زي العامل عاملة
ماما تقولي مالك وشك جايب الوان
فاكر لما كنت تقولي نفسي تقوليلي هات بوسة
اديني باقولك دلوقتي هات بوسة
طيب تاخد بوسة وتيجي بسرعة
ياللا تعالي
فاكر طيب ده
فاكر لما زعلنا بسببه
كنت جايبهولي في عيد ميلادي
معقولة ؟
تجيب فستان بكل ماهيتك
طيب والحصالة هاتزعل منك
قلتلي صالحيها
قوليلها فيه حد اهم وحاجة اهم م التحويش
زي النهاردة من كام سنة الدنيا بقي فيها قمرين
كلامك كان حلو بس انا عملت مقموصة
ساعتين
كانت اطول فترة مانكلمش بعضنا فيها
يالله كانت ايام
فاكر امتي اخر مرة كلمتني في التليفون
انا نسيت
من ييجي شهرين
بس هاتيجي
انا عارفة هاتيجي
ده اول عيد جواز
ممكن ماتجيش؟
طبعا جاي
استني
بنتك بتنادي
بقي عندها شهرين
مش عايز ترجع وتاخدها في حضنك
ايوة افتكرت
اخر مرة سمعت انا صوتك كان يوم ما اتولدت
كلمتك
هاتسميها ايه
سميها انتي....... كلها اسماء
كنت زمان بتقولي نفسي في بنت جميلة تطلع شبهك
سميتها جميلة
طالعة جميلة لكن شبهك
جرس الباب
اكيد هو
جيت ليه بدري قبل ما اوضب نفسي
الورد ياهانم
طيب شكرا
اكيد المرة الجاية هايكون هو
حاسة انك جاي
صدقني
فاكر لما كنت بتيجي تحت البلكونة
كنت باطلع جري قبل ماتنادي
كنت باحس بقربك
كان قلبي يدق يدق
اقول ده اكيد واقف تحت
حاسة بنفس الاحساس دلوقتي
طيب برضو ماقلتش البس ايه
استني هادور تاني
ايه ده
مش ده التيشيرت بتاعك
اول حاجة احوشها في الحصالة بتاعتي
غير الحصالة بتاعتنا الشركة
كنت دايما تخرج بيه معايا
سايبه ليه هنا لوحده
كنت بحبه وهو عليك
دلوقتي كرهته علشان مرمي لوحده
خلاص
انا مش هالبس حاجة
هاقعد بهدوم البيت
ما انت كنت بتقول بحبك وانت طبيعية
مش انت اللي خليتني ماحطتش ميك اب
هاستناك كدة زي ما انا
من غير تزويق
بس هاتيجي؟
لازم تيجي
انا بضحك علي نفسي ولا عليك
ما انا عارفة انك مش جاي
هاتيجي ازاي وعقدك مافيهوش اجازة قبل سنتين
وانت يادوبك ماكملتش كام شهر
مالها الشقة الحلوة الدافية الصغيرة
ايه يعني اوضة وصالة فيها كنبتين
والسفرة متشالة في المطبخ
كنا عايشين
لازم نكبر
لازم تعمل لبنتك قرشين!!!
هي عايزاك مش عايزة القرشين
وانا عايزاك
محتاجة وجودك جنبي
لسة بحبك
يمكن حبك لينا قل انا عارفة
برضو بحبك
الساعة بقت خمسة
لسة هاتيجي؟
عارفة انك مش جاي
بس قلبي بيدق بيدق بسرعة
يبقي هاتيجي
انا قلبي عمره ماخدعني
الباب
اكيد هو
مش قلت انا قلبي عمره ماخدعني
مين حضرتك
محضر م القسم
وعايز ايه
عايزك تمضي
علي ايه
قسيمة طلاق


هناك 32 تعليقًا:

Rana يقول...

انت عارف انا قريت الموضوع ده من يوم ما انت كتبته لكن مكنتش عارفه اكتب رد لكن لما فكرت وقريت الموضوع تانى اكتشفت حاجه غريبه قوى اول مره افكر فيها
انا كنت دايما اقول ان اجمل حاجه ممكن تحصل لأى حد فى الدنيا انه يرتبط بالأنسان اللى بيحبه ويعيش معاه حياته
لكن دلوقتى بقول مش شرط تكون دى اجمل حاجه فى الدنيا لأسباب كتير قوى

-ممكن 2 يرتبطوا ببعض ويتجوزوا ويكونوا بيحبوا بعض قووووووى..لو الحب ده راح بعد الجواز هيكون الجرح اكبر لانه هيكون اللى بيجرحك احب الناس لقلبك اللى كنت عمرك ماتتصور انه ممكن يعمل ليك غير كل حاجه تسعدك

- لكن لو 2 مش بيحبوا بعض هيبقى الموضوع عادى هيزعلوا من بعض ليه مش هتفرق هتكون عادى كأنهم 2 غرب عن بعض

صدقنى مهما اقولك الاحساس اللى ممكن تحسه
وانت السبب فى جرح حد انت بتحبه
صدقنى الموت اهووووووووووووون مليون مره من انك تشوف دمعه فى عنيه او تحس بحزن فى صوته يااااااااااااااااااه

ربنا ميخليش اى حد يحس الاحساس ده

من قلبى اتمنى للى انت كتبت ان ليها مشكله شبه دى انها تتحل مشكلتها وتكمل مع جوزها فى سلام وفرح

Manamino يقول...

ساعات الحزن بيبقي جميل
ساعات كتيرة بنحتاج نحس بالبرد علشان نعرف معني الدفا
الحزن شعور جميل والدموع احساس اروع
بس لما يبقي في حدود
وربنا مع صاحبة الموضوع ويقويها
شكرا علي تعليقك

غير معرف يقول...

اكيد كانت كئيبه وبطيئه زي منا فهمت من المكتوب كده

Manamino يقول...

ولو اني مش عارف انت تقصد ايه بالبطيئة والكئيبة انما ممكن يكون قصدك علي الساعات اللي قضتها في انتظاره
علي العموم الف شكر ياباشا علي مرورك الكريم
تحياتي

Gemy يقول...

منامينو
دايما مبدع ياواد
وبجد بوست جامد جدا
تسلم ايدك
ومتحرمناش من المواضيع الحلوه دى
تقبل مرورى
جيمى

انا ودماغي يقول...

البوست حلو بس مؤلم أوى أوى
بصراحة انا كنت حاسة أنه حيجى و حيقضوا وقت حلو
بس للآسف فجأة لقيت إن الدنيا أتعكت خالص
الطريقة و الأسلوب قمة فى الروعة ؛)

Manamino يقول...

جيمي
الف شكر علي مرورك ياريس وتحياتي ليك
وماتحرمناش من زياراتك وانت تشوف الجديد
تحياتي

Manamino يقول...

انا ودماغي
ساعات كتيرة قوي الدنيا بتيجي عكس ما احنا متوقعين
ومش كل اللي بيبتدي حلو بيكمل للاخر
تحياتي ومتشكر علي مرورك
وزعلت قوي لما عرفت من اخر بوست ليكي انك هاتسيبي التدوين
ربنا يوفقك في درايتك بس برضو ابقي بصي علينا من وقت للتاني
تحياتي

زُمُرده يقول...

ايوووووووووووووه
وجعتلي قلبي قوي
هاجي تاني اعلق بعدين

Manamino يقول...

زمردة
سلامة قلبك
ومستني تعليقك
تحياتي وشكري علي مرورك الكريم

مولان يقول...

في بدايه الكلام كنت حسه انه مات

وهي بتفتكر ايامه

وبعدها لقيت حاجه اقسي من الموت

جرح لمشاعر وقتل لانسانه بابشع صوره

بجد لو حصل كدا لحد انا حسه انها هتقع ومش هتقوم تاني

ياكسره قلبها

maha zein يقول...

دق لو قلتلك ان ده اكتر بوست شدني وانا بقراه من كام يوم
وكنت فاكرة وانا بعلقلك وبقولك اني قريت مدونتك كلها اني اكلمك عليه واقولك اد ايه جامد

بجد بوست جامد فعلا ومؤثر جدا
الله يخرب بيته
يروح يسافر ويعيش حياته ويخرب عليها
منه لله
الهي اللى ذيه يتضرب في قلبه

بجد تسلم ايدك فعلا عليه
بوست اكثر من راع واثبت فعلا انك بتعرف تكتب قصص كويس كمان

وعجبني جدا موضوع ان العنوان عكس النهاية
يعني لما اكتشفت في الاخر انه طلقها
طلعت ابص علي العناون علي اساس ان العنوان هيكون ورقة طلاق
لقيته العكس
وبالتالى حافظت انك متحرقلناش النهاية قبل ما نوصلها

تحياتي يا سيدي علي الحركات

kochia يقول...

الموضوع صدمني
وانا ببتسم .. والابتسامة عمالة تتسع بعد كل سطر .. وبفكر في تعليق اكتبه وفوجئت بالنهاية

مش عارفة اعلق بصراحة
بس ادبيا التسلسل جذاب جدا

تحياتي

Manamino يقول...

مولان
فعلا
اللي حصل ابشع من الموت
هو لو مات كان علي الاقل هايسيبلها ذكري حلوي تفتكره بيها
يالله النصيب بقي
تحياتي يامولا
ولو اني سحلان علشان مانعانا من التعليق عندك
هههههههههههههههههههه

Manamino يقول...

مها زين
تسلمي ياقمر
وموضوع العنوان ده ليه قصة
صاحبة المشكلة دي كانت بتحكيلي عن المشكلة بتاعتها
وكانت بتقرا في المدونة بتاعتي وقالتلي اكتب حاجة باسلوبك عن عيد جواز مع ايقاف التنفيذ
اخدت منها العنوان بس شيلت مع ايقاف التنفيذ علشان زي ماقلتي النهاية ماتتحرقش
بس مش هي دي النهاية اللي حصلت معاها
هم دلوقتي عايشين مع بعض سمن علي عسل
ربنا يخليلهم بنتهم يارب

Manamino يقول...

كوشيا
ربنا يخليكي يارب
دايما بنتعلم منكم
بس انا لسة مصر علي موضوع الكورس اللي رحتي اخدتيه من غير ماتقولي (حتي لو كنت انا لسة ما اتولدتش)
ههههههههههههههههههههه
تحياتي

ليـــالي يقول...

حلوة اووي اوووي اوووي يا منامينو
مؤثرة جدا وكنت هاعيط بجد


كويس جدا انك نزلتها تاني في اول البلوج عشان تاخد حقها تالت ومتلت

Manamino يقول...

ليالي
اي خدمة ياستي
وابقي تعالي كل يوم هاتلاقي جديد وبياخد حقه تالت ومتلت
ههههههههههههههههههههههه
بجد فرحان انها عجبتك
تحياتي علي المرور وماتنسيش تحلي التاج زي ما اتفقنا

أسما عواد يقول...

الواحد والله مبقاش حاسس بالامان
تعرف يا منامينو إيه اللي ممكن نقول عليه ثابت في الدنيا دي؟ منين نحس بالأمان وكل حاجة متغيرة لا الحلو بيدنو حلو ولا الحب بيدوم ولا الجمال بيدوم
حتى المشاعر الواحد معدش مصدق بيها
فين الأصل وفين الزور ؟
لو كان فيه متحف للكلمات ومعانيها لكانوا حطوا كلمة الحب في المتاحف هيا كمان

Sweet Violet يقول...

رغم انى كنت متوقعه النهاية الا انى كنت بضحك على نفسى و اقول جايز تكون غير
اصل بعيد عنك عارفة احساسها اللى كانت عايشه فيه و عارف بعد الاحساس ده ايه

اقولك ايه بس
منه له
مش هقول غير منه له

v_v

norahaty يقول...

يـــــــــــاهــ
ليه يعمل كدهـــــ؟
ليه القسوة دى على
اقرب واحب انسانة
اليه :ام بنــته!
انا بعتبرهـ منتهى
القسوة والخيانة
كمان لانه متعمد
يجرحها فى يوم زى دهـ:(

Saso يقول...

ياه يامنامينو
ايه البوست الحلو دا .
بس شكلها كانت بتحبه بجنون ومن غير عقل والحب من غير عقل بيضيع ويضيع صاحبه .
تحياتى على البوست دا

أسما عواد يقول...

متشكرة يا منامينو على المرور
أنا خايفة لتفلس على ما تشتري الكتاب
أقولك عشان ما تصرفش تحويشة العمر وأشيل ذنبك ابعتلي عنوانك وانا ابعتهوك
مساء الفل

kochia يقول...

انا قريت قبل كدة الموضوع ده
وتالمت فدر تالمي في المرة الاولي
بس عارف
لازم نفكر
ازاي نبقي قد كدة مش متوقعين رد فعلا او فعل الاخرين تجاهنا
لازم نفهم الدنيا عشان نعرف نعيش من غير فرط الالم

تحياتي

عاشقه الرومانسيه يقول...

يالهوووووووى
ده زمان قلبها وقف
الله يرحمها
ايه النهايه البشعه دى؟
وفجأه كده؟؟؟؟؟؟؟
حرام عليك

حـــلـــم كــــان يقول...

ينهار الوان

قسيه طلاق ؟

ليه

!!! عارفة ... مش عارف ليه يقول...

أكتر حاجة عجبتني

هو رتم الأحداث وإيقاعها التصاعدي


وفضل يعلى ويعلى لحد ما وصل لأعلى نقطة

عند كلمة النهاية


رائع مينا


تحياتي
وليد

P A S H A يقول...

جااااااامد يا هندســة
:)

Ramy يقول...

وجعت قلبى


يا مينا

حرااام عليك


اللى عرفته من التعليقات الموضوع حقيقى

norahaty يقول...

قريتها تانى
ورأيى زى ما هو
منهى القسوة أن
يفعل بها هذا!

لاسع افندى يقول...

طيب عليا الطلاق..... ده راجل مش بيفهم

وحشنا ابداعك

تحياتى

Bent Ali يقول...

مش عارفة يمكن ناس تعتبر القصة دى زي مقالب القصص البوليسية الكل بيبحث عن المجرم ونفاجأ فى اخر الفيلم انه اقرب الناس لكن انا شايفاها بشكل مختلف

اول ما يبتدى اتنين بيحبوا بعض فى اختيار اختيارت منفردة اعرف ان فيه خلل فى العلاقة، وفى القصة الطلاق حصل اول ما كل واحد خد اتجاه منفرد وهي كانت غبية انها ما ادركتش كدة من البداية لكن تقول ايه بقى لما الواحد بيحب بيبقى (حمارن كبيرون :) )