الاثنين، 4 أغسطس، 2008

ثانوي بنين

وانا في ثانوي كنت في مدرسة مشتركة
محدش يفهم غلط اني كنت في مدرسة فيها ولاد وبنات -والعياذ بالله - لا هي المدرسة كانت مشتركة بمعني انها كان فيها نوعين من البنين
النوع الاولاني كان بنين واضح المعالم وصريح كدة وبيقول انا بنين
اما بقي النوع التاني فكان نوع من البنين اللي ماتعرف معجبهمش انهم يكونوا بنين ولا ايه فقرروا انهم يكدبوا علينا ويقولوا انهم مش بنين بس علي مين كلنا كنا عارفينهم بس بنعمل مصدقينهم
المصيبة بقي انهم ساعات كانوا بيصدقوا نفسهم وتلاقيهم نسيوا انهم رجالة وعايشين في دور البنانيت الامامير
طول عمري اكره نوعين من الناس الست المسترجلة والراجل المستبنت وعلشان حظي الكويس ربنا رماني في مدرسة نص اللي فيها رجالة مستبنتين تلاقي الواحد من دول راجل ملو هدومه ولابس يونيفورم بتاع بنت ياعم الحاج وماله القميص والبنطالون بتاع الرجالة ماتعرفش بقي اذا كانوا بيعملوله حساسية ولا ايه
لا والانكت انك تلاقي اهالي العيال دول مساعدينهم علي كدة من يوم ما اتولدوا ومسمينهم اسماء مالهاش علاقة باسماء الرجالة خالص
يعني مثلا تلاقي راجل محترم كدة ملو هدومه واسمه ليلي وواحد تاني اسمه رشا وممكن هبة امينة وهدي وفتحية اه والله العظيم
طيب تخيل يامؤمن كان فيه واحد من العيال دول اسمه انيسة
بس الشهادة لله انيسة ده كان عارف الحقيقة كان مقتنع من جواه انه راجل بس يعمل ايه بقي في المجتمع والناس اللي حواليه هم اللي وهموه ياعيني انه بنوته
بس كان فيه بقي علي النقيض عيال من دول ياعيني مصدقين نفسهم علي الاخر ودول بقي كانوا ضحية الناس اللي حواليهم واهاليهم كمان
يعني مثلا كان فيه واد من العيال دول اسمه غادة والواد ده بقي كان مصدق نفسه علي الاخر وبصراحه هو كانت تضاريس جسمه ممكن تنخدع فيها وتقول انه بنت بس الله يخرب بيت عمليات التجميل اللي بتشقلب حال البني ادم من دول
بس علي مين يابا الوش وش راجل والله لو عملوله ايه حتي
حتي لو ركب مية بلونة من بتوع محمد صبحي في مسرحية الجوكر ولا يأثر ديتها دبوس وكل حاجة ترجع لاصلها
بس غادة ده بقي كان بيعصبني كان مايع بطريقة تغيظ يعني الميوعه اللي كانت فيه دي لو كانت في بنت بجد كانت برضو تبقي (over ) قوي فما بالك بقي لما المياعة دي تبقي علي راجل
المهم يامؤمن الناس دول اتخرجوا من المدرسة وانا سيبتهم وبقالي اكتر من عشر سنين ما اشفتش حد فيهم ولا اعرف اي حاجة عن اي حد

ملحوظة مهمة جداااااااا

كل الناي اللي جات سيرتهم في البوست مع كامل احترامي ليهم وبالرغم من اني ماشفتهمش من فترة طويلة جدا وناس كتير منهم ما اعرفش عنهم اي حاجة الا اني كنت بحبهم جدااااااا وكان منهم ناس كتير اصدقاء عزاز علي قلبي قويييييي
فرجاء لو البوست ده وقع في ايد اي حد منهم مايسلموش للبوليس
ولو حصل ارجوكم ماتبقوش تنسوني في العيش والحلاوة

هناك تعليقان (2):

Rana يقول...

انت غلس...........بس

Manamino يقول...

ايه يارنا شكلك واحد من العيال دول .......... انا قلت من الاول انا ماقصدتش اي اساءة ههههههههههههههه
ارجوك ماتفهمنيش غلط
تحياتي ياباشا