الأربعاء، 6 أغسطس 2008

الصغير مسيره يكبر

اااااااااه فكرتوني بالذي مضي
لما كنت في ثانوي- طبعا اكيد كلكم مريتوا بالمرحلة دي ويمكن لسة فيه ناس منكم موحولين الوحلة السودة دي- المهم - لما كنت في ثانوي كان طبعا لازم اذاكر واذاكر واذاكر علشان اجيب مجموع كبير وادخل كلية محترمة علشان اتخرج والاقي شغل وابقي من علية القوم - كانت احلام زمان يعني- برضو المهم - طبعا لان نظام التعليم عندنا نظام حلو وجميل وابو عيون جريئة – علي رأي عادل امام- ولاني كنت باخد دروس خصوصية في كل المواد تقريبا فماكانش فيه وقت للمذاكرة لاني باروح المدرسة -بتاعة البنين-الصبح والدروس بعد الظهر فقولي بقي ممكن اذاكر امتي
فكان لازم اضحي بحاجة من اتنين اما الدروس واما المدرسة ومن مبدأ التضحية بالاسوأ فاضطريت اضحي بالمدرسة اللي كنت باقعد فيها من الساعة 7 صباحا للساعة 3 مساءا واطلع منها بتلت كلمات (رزع و ضرب وشتم) - طبعا الطلبة كانوا هم الفاعل - والمفعول به كان المدرس الغلبان ما اطولش عليكم علشان ماتوهوش مني
علشان اضحي بالمدرسة كان لازم اضرب شهادة مرضي علشان ما اتاخدش غياب فواحد صاحبي ربنا يجازيه كل خير ويقعدله في عياله وعافيته يارب عرفني علي دكتور في المستشفي كنت باظرفه الخمسه جنيه ويديني شهادة مرضية باسبوع وابرطع بقي الاسبوع ده علي حس الخمسة جنيه
وشوية شوية لقيت الاسبوع مابيكفيش حاجة وبعدين هو انا بقي كل اسبوع هاروح المستشفي واتقرف من مناظر العيانين اللي ماكانوش بيتغيروا كل اسبوع اروح الاقيهم هم هم العيانين بتوع الاسبوع اللي فات وملقحين في طرقة المستشفي اللي نايم علي ظهره واللي علي جنبه ولا ريحة الدوا اللي طافحة في المستشفي اللي كانت اوسخ من ريحة المجاري
المهم فقلت لازم اشوف حل للموضوع ده فرحت كدة في مرة ظارف الدكتور 30 جنيه طبعا ال30 جنيه دول وقتها كانوا ييجي ربع مرتبه -الكلام ده منن عشر سنين تقريبا ويمكن اكتر- المهم صاحبنا ريل علي منظر الفلوس فراح رازعني حتة تقرير قال فيه اني عندي ثقب في القلب وروماتيزم في المفاصل واستبحس في الضوافر واني لازم الازم الفراش لحين اشعار اخر طبعا انا ماصدقت ورحت واخد التقرير وطاير بيه علي المدرسة
مين بقي في المدرسة ؟؟؟؟؟؟!!!!!!واحد صاحبي
اول ماسمع الكلام ده بقي قعد يقولي ده حرام وانت كدة بتشجعه انه يبقي مرتشي وانت بتاخد حق غيرك وعملي عم المصلح الاجتماعي
ممكن بقي تقول ان صاحبي ده كان مقتنع بكلامه ده وقتها وممكن تقول انه كان غايران وحقود وحسود ................ده مش موضوعنا
هو هايقرا البوست ده وهايعلق عليه ويقول هو كان قصده ايه وقتها بس باقولك ايه اوعي تشتم انا باقولك اهه من اولها لو شتمت مش هانشر التعليق
ويشاء ربك يامؤمن ان الايام تلف تلف وصاحبي ده يتخرج من كلية الطب ووزارة الصحة الغراء بتاعتنا تعينه في نفس المستشفي اللي كنت باعمل منها الشهادة المرضي المضروبة وسبحان الله يطلع ان الدكتور اياه بتاع الخمسة جنيه بقي مدير المستشفي
طبعا صاحبي اللي بقي دكتور بياخد دلوقتي في عين الحسود 125 جنيه لا وايه كل شهر يعني كل يوم واحد في الشهر كدة يروح الخزنة ويقبض 125 جنيه شفت بقي الدنيا لما تعطي بني ادم
بس برضو ايييييييه تخيل مع كل ده ومع ال 125 جنيه كللللللل شهر برضو البني ادم مايملاش عينه الا التراب
برضو ماكانوش عاجبين صاحبي تخيل صاحبي راح دور علي مستشفي خاص يشتغل فيها قال ايه علشان يزود دخله
ياعم ده انت بتاخد 125 جنيه كل شهر يعني مش كل سنة مثلا ده كل شهر بس تقول ايه بقي للطمع
شوية شوية وصاحبي لقي ان المستشفي الحكومي بتعطله ولازم يتفرغ للمستشفي الخاص اللي بيجيبله فلوس اكتر
يعمل ايه يعمل ايه مالقاش قدامه غير مدير المستشفي - ابو خمسة جنيه..... فاكرينه؟؟!!- راح اتفق معاه انه يسيبله مرتبه كل شهر في سبيل انه مايروحش المستشفي خالص والمدير هايمضيله حضور وانصراف كل يوم
شفتوا الدكتور ابو خمسة جنيه كبر واترقي وبقي مدير ب 125 جنيه
ياتري بقي في المستشفي اللي احنا عايشين فيها دي (المستشفي هاه ماحدش يفهم كلامي غلط ولو حد فهم غلط انا ماليش دعوة انا ماقلتش حاجة ) فيه كام دكتور صغير (برضو باقول دكتور مش حاجة تانية) كبر واترقي وبقي مدير كبير (مدييييييييير وماليش دعوة باللي يفهم غلط)

هناك تعليقان (2):

غير معرف يقول...

تصدق ان حكايتى مع المدرسه والثانويه العامه فيها شبه كبير منك
اصل انا مروحتش المدرسه فى سنه تانيه وتالته على بعض اكتر من 30 يوم وباقى ايام السنه كانت اجازه مرضى بس مش من المستشفى ولا الدكتور ابو 5 جنيه احنا كان لينا واحده جارتنا ربنا يخليها يارب ادعيلها بأيه بس كانت كل يوم تكلم ماما وتسألها عليا ها هتروح المدرسه الاسبوع ده ولا اجازه ...فطبعا ماما ترد عليها وتقولها
طبعااااااااااااااا اجازه هو ده سؤال
وهالما جاره لحد لما المرحله الثانويه خلصت متتصورش لما دخلت الكليه كان نفسى اد ايه طنط جارتنا دى تقدر تجبلى اجازه ....بس الواحد يشكر ربنا هى قامت بالواجب وزياده فى ثانويه عامه

Mina يقول...

يارنا ربنا يخليلك طنط جارتكم
وانا من موقعي هذا اناشد السيد وزير التعليم بتوفير السيدة (طنط جارتكم ) لكل طالب ثانوية عامة من خلال حملة (كوساية لكل مواطن) عملا بمبدأ تكافوء القرص ........ احم احم قصدي الفرص