كلام والسلام

بيقولوا الراجل اللي قال ان الانسان حيوان بيتكلم كان عالم من علماء الحملة الفرنسية علي مصر اللي جم مصر مع عمنا نابليون الله يعمر بيته وقال الكلام ده بعد مارجع فرنسا
طبعا انا صدقت الكلام ده من غير مناقشة
ماهي حياتنا كلها بقت كلام والسلام ماحدش فينا بيعرف يعمل حاجة دلوقتي غير انه يتكلم وبس تمشي في الشارع تلاقي الناس كلها بتتكلم تركب المترو تلاقي كل اتنين تلاتة ماسكين ودان بعض وهات ياكلام تطلع الاتوبيس تلاقي كل اتنين قاعدين جنب بعض –سواء يعرفوا بعض ولا دي اول صدفة سعيدة تجمعهم سوا – مش مبطلين رغي
وياريت الموضوع بقي علي قد الناس وبس كانت بقت بسيطة انما كل حاجة بقت بتتكلم حتي العربيات مابتبطلش كلاكسات
يعني تلاقي اتنين سواقين تاكسي ماشيين جنب بعض وبيكلموا بعض بلغة الكلاكسات وكل كلاكس ليه معني الكلاكس الطويل غير التخين غير المتقطع ....... وهلم جر
هو الكلام حاجة وحشة؟؟؟؟؟؟؟؟ّّّّّّّّّّّّّّّ!!!!!!!!!
لا طبعا بس لما حياتنا تتحول لكلام بس طبعا يبقي حاجة وحشة ونيلة وسواد بدري
وعلي رأي الفيلسوف العظيم (حمودة الاشقر) نحن قوم نتكلم حتي نعيش لا نعيش حتي نتكلم
لكن لما حياتنا تتحول لمجرد مباراه في الكلام وكل واحد فينا كل اللي يهمه انه يتفوق علي التاني فيها تبقي هنا المصيبة
الكلام في حد ذاته مش عيب وحتي لو كان كلام كتير برضو مش عيب ادينا بنفضفض عن الهم اللي جوانا
بس تعالي معايا هاحكيلك علي موقف واحكم انت بنفسك
من كام سنة كنت راكب نوع كدة من انواع المواصلات (لسة لم يخترعوا له اسم حتي الان ) هو كان عبارة عن ........... مش مهم مش ده موضوعنا
المهم في الموضوع ان فيه اتنين كانوا راكبين معايا المواصلة دي بيتناقشوا في موضوع ما وبما ان الموضوع مايهمنيش فانا ماركزتش معاه قوي عادي يعني متابع الموضوع بس من بعيد لبعيد كل فين وفين كدة القط كلمة
واللي يغيظك ان المناقشة ابتدت اصلا معايا.............بص ياعم
انا كنت لابس كاب عليه علامة (NIKE) فواحد من الناس المتفسلفين قالي ايه اللي انت لابسه ده قلتله ده كاب عادي يعني قالي بس ده حرام قلتله ليه قالي علشان العلامة دي علامة اله من الهة الرومان مش فاكر اسمه ايه كدة (انا اللي مش فاكر مش الراجل)
ماحبتش ادخل مع الراجل في حوار عارف انه مالهوش لازمة ومتأكد اني انا مش هاستفيد منه ولا هو كمان فرديت عليه باسلوب يبان منه اني اتخنقت منه وقلتله خلاص اوعدك لما اروح هاقطع الحتة اللي عليها العلامة علشان مايبقاش حرام
طبعا انا كدة كبست الراجل الغلبان ياعيني وضيعت عليه فرصة ذهبية يسلي بيها وقته وخصوصا ان المشوار كان بعيد
بس علي مييييييين ودي تيجي
الراجل ولا كأنه سمع انا قلتله ايه وقعد بقي يستعرض معلوماته التاريخية والدينية والثقافية وانا زي ماقلتلكم في الاول ماكنتش عايز اوجع دماغي فكنت متابع الموضوع من بعيد لبعيد
وعلشان حظ الراجل الكويس ربنا كرمه ولقي واحد تاني مشتاق للمسابقة الكلامية بس يظهر كان مكسوف بس لما لقي الفرصة ماصدق
ابتدوا الحوار ناس كويسين هاديين متحضرين كل واحد بيقول معلومة والتاني يقوله الله الله الله ياعم الشيخ
لحد كدة كويس قوي بص بقي للي جاي
في نص الكلام واحد منهم قال حاجة ماجاتش علي هوا صاحبنا التاني مع انها كانت بتؤيد رأيه عادي يعني في سياق الكلام ومش مخالفة لرأيه في حاجة بس يظهر ان الجزئية دي بالذات يعني جات علي جرح معين جواه ولا حاجة
المهم لقينا الراجل اتشال واتهبد وازاي ومش ممكن وانت بتكفر .......... يانهار اسود هي وصلن لدرجة الكفر
وفجأة العربية كلها ولعت والاتنين كفروا بعض وكل واحد سب للتاني سلسفيل جدود اللي خلفوا جدوده
لحد كدة كويس عادي حاجة اتعودنا عليها ومافيهاش اي مشكلة بتحصل في احسن المواصلات
شوية والناس هدوهم واعتذروا لبعض وانا ماكنتش اقصد وانت اللي عصبتني وانت فهمت غلط والمواضيع رجعت لطبيعتها وابتدوا المناقشة من تاني
كل ده وانا قاعد بعيد باتفرج وانا ساكت اللي لفت انتباهي بقي وخلاني كنت عايز اتف عليهم الاتنين وخلاني سيبت العربية ونزلت وقلت ان شالله اكمل باقي المشوار علي رجلي مع اننا كنا في صحرا وشبه مستحيل الاقي حاجة تانية توصلني
اللي خلاني اعمل كل ده انهم لما ابتدوا المناقشة من تاني كل واحد فيهم نسي دوره وكل واحد نسي الموقف اللي كان متمسك بيه وبيتخانق وكفر التاني علشانه
ولقيت كل واحد فيهم بيتنبي وجه نظر التاني ومتمسك بيها قوي وابتدوا الخناق من تاني علشان ماحدش فيهم راضي يقتنع بوجه نظر التاني.
المهم اننا نغلب في الكلام
المهم ان اللي بيتكلم معايا يصدقني ويبصم بالعشرة ان كلامي صح
حتي لو ماكنتش انا مقتنع بكلامي
حتي لو كنت عارف ان كلامي غلط
بس مع اعتذاري لعمنا الفرنساوي اللي قال ان الانسان حيوان بيتكلم انا باقوله انت غلطت غلطة كبيرة قوي ولازم تصلحها وتعتذر للحيوان (اللي مش بيتكلم )