الجمعة، 1 أغسطس، 2008

حتي بتاع السمك

امبارح قادتني قدماي( بعد ما اخدت الاشارة القاطعة من مخي اللي هو بدوره كان اخد الامر اللي مافيهوش رجعة من الست معدتي اللي كانت عصافيرها وفيرانها وارانبها بتهوهو) لحد بتاع السمك قلت بقي مابدهاش كدة كدة التلاتين جنيه اللي فاضلة من المرتب مش هاتكفي لاخر الشهر والله حتي لو عملت قرد فانا بقي اشبرق نفسي وان شالله تخرب

المهم رحت عند بتاع السمك والراجل اول ماشافني اتنفض من علي الكرسي اللي كان قاعد عليه واتفضل ياباشا وطلباتك يابيه واي خدمة وتحت امرك انا بقي انجعصت اه ما انا احب اللي ينفخني كدة رحت قاعد علي الكرسي وحاطط رجل علي رجل وقلتله نص كيلو بلطي مشوي لو سمحت ..........

الراجل بصلي من فوق لتحت ومانطقش وراح قاعد تاني علي الكرسي بتاعه ونادي علي الصبي بتاعه

واد يااشرف انت يازفت

فالواد الغلبان جه جري فراح قايله شوف يابني الزبون عايز ايه

ياعم ما انا كنت باشا وبيه من شوية وكنت واقف وتحت امرك واي خدمة

لما بقي نص كيلو بلطي خلاص بقيت زبون والصبي هو اللي هايشوف طلباتي

لازم يعني اخد نص المحل ولا لازم افرتك التلاتين جنيه اللي حيلتي علشان يعجبك

قعدت جنب صاحبنا علي اشرف مايجهز الغدوة وقعدت ابص للراجل وسبحان الله لقيته شكله مش غريب عليا

شفته قبل كدة كتير

شفته في الاتوبيس كتير وفي الشارع وفي المترو وساعات كتيرة قوي شفته في المرايا

نفس الشكل مابيتغيرش

ساعتها قلت لنفسي كلنا هذا الرجل

مش هو بس اللي بيحترم الناس علي قد كام كيلو سمك هايشتريه

ماهو ظابط المرور بيبص للناس كل واحد علي حسب عربيته المرسيدي اتفضل ياباشا والاوبل والكرولا خش يابيه وال28 اركن هنا يابني

والدكتور تلاقيه الصبح في المستشفي الحكومي بيشخط وينتر في العيانين زي مايكونوا شغالين عند اللي خلفوه وبعد الظهر تلاقيه في مستشفي استثماري ولا في عيادته الخاصة ناقصله شوية ويمسح جزمة الباشا العيان

وانا ساعات كتيرة قوي باحترم البني ادم اللي قدامي علي قد لبسه او الموبيل بتاعه ولا الساعة الشيك اللي لابسها

يالله نقول ايه بقي ربنا يسترها علينا

اتفضلوا معايا بقي بلطي مشوية ايه ... تاكل صوابعك وراه
وسمكهة هنية تكفي مية

هناك 4 تعليقات:

مي كامل يقول...

اكتر ما لفت نظري في مدونتك انك مدون نشط جدا
ماشاء الله يعني
:)
لي عودة

Manamino يقول...

شكرا يامي علي ملاحظتك السريعة ومستني ملاحظاتك بعد عودتك
تحياتي لمرورك

دكتور/ ايمن القناوى يقول...

بص البوست ده اثر فيه جدا لانى اتعرضت كتير لمواقف زى كده وشوفت مواقف كتير
انا شوفت الدكتور اللى بيعامل المرضى على انهم خدامين مع انى طالب طب بس بيحصل فعلا وكنت بتضايق جدا وبزعل جدا عليهم وحتى حصلى موقف عمرى مهنساه لما اتنرفزت من معامله الدكاتره للمرضى بس مش هتكلم عنه .. الموضوع يطول
تحياتى ليك .. واستمر فى موضوعاتك الجميله الموثره

Manamino يقول...

دكتور ايمن
تشكر ياذوق علي مرورك الجميل
وطول ما احنا عايشين هانلاقي الناس دول
المهم اننا احنا مانبقاش زيهم
ولو كل واحد ابتدي بنفسه اكيد مش هانلاقي في يوم واحد بيبصلي من فوق لتحت علشان انا راكب عجلة وهو راكب بي ام
تحياتي يادكتور