الثلاثاء، 30 سبتمبر، 2008

وتتوالي الخصومات

طبعا فاكرين الخصم الاخراني بتاع قانون المرور الجديد واكيد فاكرين اني ساعتها قلتلكم اكيد مش هاتأخر عليكم في الخصم الجديد وقد كان
ما عداش اسبوعين وجيتلكم بخصم جديد
بس المرة دي مش بسبب اي قوانين موضوعة (يعني لا قانون مرور ولا قانون ايجار ولا اي قوانين من دي)
المرة دي كان بسبب قانون الطبيعة (قوانين الطبيعة اللي هي زي قانون الجاذبية كدة وخدوا بالكم فيه فرق بين قانون الجاذبية بتاع اكس ولوكس وقانون الجاذبية بتاع عمنا نيوتن)
برضو مش ده موضوعنا ولا دي قوانينا اللي انا قصدي عليها
القانون المرة دي كان قانون مختلف تماما
بص ياسيدي انا هاحكي الموقف وانتوا احكموا بنفسكم
ركبنا الميكروباظ اللي باركبه كل اسبوع (يارب توب عليا بقي) والناس كلها ركبت والعربية حملت وماكانش فيه فاضي غير مكان واحد والراجل راح قافل الباب وقال ده محجوز
طيب ياعم محجوز لمين قال لصاحب العربية جاي دلوقتي
ماشي نستني الباشا صاحب العربية وفضلنا نستني نستني لحد ما الصبر طال علي راي ام كلثوم
بعد حوالي نص ساعة افتكرنا اننا المفروض نمشي (احنا كنا نسينا اصلا ان الميكروباظ بيمشي)
المهم الناس هاجت علي السواق يالله ياعم يالله ياعم والراجل في الاخر طلع زوق وراح ماشي
مشينا حوالي ربع ساعة والسواق جاله تليفون من صاحب العربية المزعوم يقوله انت فين (صاحب العربية اياه كان بيبعت رسالة كلمني شكرا والسواق هو اللي يتصل) السواق قاله انا طلعت من بدري وقربت علي قويسنا (انا باركب من طنطا للي مايعرفش وقويسنا دي بينها وبين طنطا حوالي 20 كيلو)
طبعا صاحب العربية راسه والف جزمة قديمة ان السواق يرجع علشان ياخده من الموقف
-- ياعم انت اللي اتأخرت والناس هاجت وماقدرتش استني اكتر من كدة وكل لما اكلمك الاقي تليفونك مقفول (ده كلام السواق)
-- ................................ كلام ماسمعناهوش بس لاحظنا رد فعله علي وش السواق (واضح انه كان من قبيل يابن تييييييييت)
وفضلنا من قويسنا لحد بنها (حوالي 20 كيلو كمان) علي هذا المنوال صاحب العربية يبعت كلمني شكرا والسواق يتصل يتهزق ويقفل ويشتم في سره والركاب يتريقوا علي السواق اللي خايف وعايز يرجع (بس علي مييييين ده كان اتقطع لو فكر يرجع)
كل ده مافيهوش مشكلة طالما اننا مش متعطلين والسواق زوق وماشي
المشكلة فين بقي
لما صاحب العربية وصل لحل جهنمي وعبقري انه هايركب عربية تانية من الموقف رايحى مصر (يااااااااه بصراحة الراجل تعب جدا في التفكير لحد ماوصل للحل العبقري ده )
بس فين المشكلة بقي اننا هانستناه في بنها لحد ما العربية اللي راكبها سيادته تعدي علينا علشان السواق الغلبان ( اللي احنا راكبين معاه) يدفع الاجرة بتاع سيادته للسواق ( اللي هو راكب معاه)
حد فاهم حاجة ؟
اقول تاني
احنا هانقف في بنها نستني الباشا اللي لسة طالع من طنطا في ميكروباظ تاني (يعني هانستني اكتر من 45 دقيقة)
ليه بقي ؟؟؟؟!!!!!!!!!
علشان الباشا والله اعلم مافيش في جيبه 7 جنيه يدفعها اجرة لميكروباظ اللي هو راكبه
وطبعا ماكانش فيه حل تاني قدام السواق الغلبان الا انه يستني الباشا والا كان هايقطع عيشه
وبائت كل محاولاتنا لثني السواق عن عزمه بالفشل
لا تهديد نفع معاه ولا وعيد ولا استرحام الناس (وخصوصا الستات ) لقلبه المسكين علشان يودينا مصالحنا
ياجماعة اللي عايز ينزل يتفضل ينزل انا لازم استناه هنا
والي هنا انتهت المشكلة وانتهي الكلام وادرك شهرزاد الصباح

ملحوظة مهمة جداااااااااااااااا

الباشا ماطلعش صاحب العربية ولا حاجة
الباشا طلع امين شرطة قد الدنيا (اوعدنا ياااااااااااااااااارب)



هناك 14 تعليقًا:

Gemy يقول...

لا لا لا مش ممكن يا منامينو
اسلوبك جامد جدا والله
وانا كنت هموت من الضحك بجد
تسلم ايدك
وربنا يستر من قوانين المرور
ميخلوش الناس اللى ماشيه على رجليها بعد كده تلبس الحزام ويمسك طفايه الحريق فى ايديه
هههههههههه
تقبل مرورى
اخوك جيـــــــــــــــــمى

Manamino يقول...

gemy
منور ياباشا والله
وبعد الشر عليك (من الضحك طبعا )
وربنا يستر فعلا زي مابتقول
مستني منك ايميل نتفق علي انجازاتنا سوا هههههههههههه
تحياتي ياباشا

Jorge يقول...

Hello friend: it wanted invitarte that you visit blog that I am making with my students of second year of the secondary one on the DISCRIMINATION.
http://nodiscrimine.blogspot.com
arduous and interesting Subject.
Surely it will be of your affability.
We invited to you that you read what pleases of him and makes an opinion on he himself.
Its contribution will be valuable.
In blog it will find a translator of the page in several languages if he needs it.
A hug from Argentina.

غير معرف يقول...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

انا ودماغي يقول...

هههههههههههههههههههههههههههههه
لا بجد أنا دمعت من كتر الضحك
يخرب بيت أسلوبك بجد
ههههههههههههههههههههههههههههههه

ربنا يستر على عبيده و الله

Manamino يقول...

انا ودماغي
منوراني والله ربنايخليكي وسلامتك من الدموع
وربنا يسترها علي عبيده فعلا

Beram ElMasry يقول...

اخى الكريم . Manamino
السلام عليكم ورحمة الله وبركاته
تفديم الشكر لمن يستحق واجب ، فلك كل الشكر
سعدت بزيارة مدونتك ، وركبت معك وعانيت من سلوك صاحب الفخامة رلسب التوجيهية او حامل الاعدادية لا اعرف – انين الشرطة – المفلس وصدقنى توقعت النهاية ، لا ذكاء منى ولكن لتكرارالحدث مع اختلاف فى المفردات ، ولم لستطع الفكاك من المتابعة لحلاوة الاسلوب الا فى بنها
شكرا لك وعندى جديد كل ثلاثاء ، وانى انتظر

Manamino يقول...

استاذي بيرم المصري
والله العظيم منورني
والف شكر علي مرورك وتعلقك
ومستني منك الجديد كل يوم تلات
وعلي رأي الشاعر العظيم حمودة الاشقر
بكرة النكد بكرة
بكرة النكد بكرة
قصدي يعني بكرة التلات
هههههههههههههههههههه
تحياتي ياباشا

Che_wildwing يقول...

وازاي حضرتك تقارن بين امين شرطة قد الدنيا وصاحب العربية
اول زيارة لمدونتك وان شاء الله لن تكون الاخيرة

Manamino يقول...

Che_wildwing
ياباشا شرفتني زيارتك ومستني زياراتك علي نار
تحياتي

Teva يقول...

ههههههههه
كنت حاسس بيه والله وشامم ريحته من اول الحكاية

هو مفيش غيره

البنزين اللي غلى وخلى الناس تقطع في بعضها .

بحييك يا ريس على المدونة الجميلة اولا
والبوست الرائع والأسلوب السهل .

تقبل مروري المتواضع

Habiba يقول...

والله كنت عارفه
اصلها حصلت معايا قبل كده
لا والبعيد ركب جمبى
وكنت عايزة انط فى كرشته
بس بصراحه لو كان غلس
اصل موقفنا كان اهون بكتير منك
ودين انا لو كنت مكانك وشفته انا كنت عرفته مقامه :)

كل سنه وانت طيب
دمت بخير

Manamino يقول...

teva
والله معاك حق هو فعلا البنزين منه لله بقي
شرفتني ياجميل

Manamino يقول...

حبيبة
احنا طبعا شفناه بس هو مين اللي يقدر يهوب ناحية الباشا امين الشرطة
الله انتي مش عارفة احنا عايشين فين ولا ايه ياحبيبة
الباشا الكبير اللي زي ده لما يمشي في اي حتة مصر كلها تقف تحميه
وكلنا فدا امين الشرطة
وبالروح بالدم نفديك يا امين
عايزاني اعادي مصر كلها
تحياتي ياحبيبة