الثلاثاء، 14 أكتوبر 2008

لمليء الفراغ

الواد جيمي الله يجازيه كل خير بقي من فترة طويلة كدة كان رمالي تاج وبصراحة لاني مابحبش اتكلم عن نفسيتي او بمعني اصح مابعرفش اصلا اتكلم عنها (اصلها صعبة قوي ومابتحبش حد يجيب سيرتها ) فقررت اقلب التاج بتاع الواد جيمي
بس بما اني بقالي فترة طويلة مش لاقي حاجة اكتبها (او بمعني اوضح شوية زهقان وقرفان ده غير اني عند دور انفلوزة شديد قوي ومش مستطعم اي حاجة ) فقلت اتسلي كدة في التاج ده واهي حاجة تسد وقت الفراغ التدويني

نيجي بقي للمهم

ان ان ان ااااااااااااااااااااااان

س1 : بدأت التدوين امتي؟ودخلت عالم التدوين ازاي؟

ج 1 : ابتديت تدوين في يوم نادي ان شاء الله مش فاكر كان امتي بالظبط بس هو كان السنة دي وبصراحة لقيتها موضة وكل واحد عامله مدونة فقلت اشمعني انا يعني هاعمل مدونة واسيبها زي ما عملت حاجات كتيرة قوي قبل كدة ومكنت باقف في نص المشوار وما اكملش

س2 :
إيه كان إنطباعك في البداية؟

ج2: عادي زي انطباعات اكس بالظبط (الانطباعات الاولي تدوم)
زي ماقلت قبل كدة انا عملت مشاريع كتيرة قوي وكنت بابقي معجب بالفكرة واجي ساعة التنفيذ اشتغل وابقي متحمس قوي وبعدين اقف من غير سبب
الاختلاف الوحيد هنا اني يوم ماعملت المدونة صاحبي الدكتور (اكيد فاكرينه) كان قاعد معايا اون لاين واديته لينك المدونة بعد ماكتبت فيها اول 3 بوستات (وكانوا ورا بعض وفي نفس الوقت ) وصاحبنا ده لقيته عمال يقولي كلام غريب قوي
من بتاع استمر واسلوبك مميز ومختلف (قصده متخلف) وكلام كبير قوي من ده
ما اضحكش عليكم انا صدقته ساعتها واتغريت بقي (بقيت مغرور يعني للي مابيفهمش عربي) وفضلت اكتب كل اللي يخطر علي بالي واديني اهه زي ما انتوا شايفين ...............(اللي مش شايف يلبس نظارة ده مش ذنبي انا)

س3 :
مين أكثر واحد بتحب تعليقه علي بوستك الجديد؟

ج 3: كل الناس واي حد يكلف نفسه ويعبرني وياخد شوية من وقته ويعلق حتي لو شتمني (ما انا برضو هاشتمه يعني مش هاقوله شكرا)
بس مايمنعش ان فيه ناس معينة بفرح قوي لما الاقي تعليقاتهم زي (انا ودماغي - حبيبة - زمردة - حزينة - جيمي - بيرم المصري - )

س4 :
ايه أهم حاجة اتعلمتها من عالم التدوين؟

ج4 : ياااااااه اتعلمت حاجات كتيرة قوي منها علي سبيل المثال
1 الرغي (ابقي رغاي يعني والرغي من الرغيان ويرغي فهو رغاي اي بقه مابيوجعوش من كتر الكلام)
2 الكلام الكتير
3 اتعلمت حاجة مهمة قوي وهي ازاي تقدر تقرف اللي حواليك في عيشتهم وتنكد عليهم (بطريقة مضحكة )السم في العسل يعني

س5 :
حاسس إن التدوين له تأثير؟

ج5: طبعا ليه تأثير كبير قوي (ماحدش رزل يقولي تأثير علي ايه بلاش احرااااااااج)

س6 :
اذكر 5 أحلام علي الأقل تخص ماضيك وتحلم فيها بتغيير أشياء ما ماذا ستعدل؟ وماذا ستترك؟

ج6 : ولو اني مش فاهم السؤال انما هاحاول اجاوب
1- كان نفسي اطلع حرامي (هم اللي ماسكين البلد اليومين دول - اللي هي كفر ابو عبده يعني ماحدش يفهم غلط- )
2- حاجة مش مهم حد يعرفها (حاجة خاصة بقي الله)
3- ......................... (انا كتبت بس الرقابة شالتها)
4- مش فاكرها
5- مكسل افتكرها

لو عايزين 6 ولا 10 انا مستعد (مافيش اسهل ولا اكتر من الحاجات اللي كان نفسي اعملها )

س7:
اذكر 5 أحلام تخص مستقبلك؟

ج7 : ياجماعة احلام تخص مستقبلي طيب انا مالي وماله نخوض ليه في سيرة الناس
علي العموم هاحاول افتكر
1- اشوف شغلانة تانية غير الهندسة (وطبعا مااكونش دكتور ولا صحفي ولا محامي ومحاسب ولا ....... حد يكمل بقي علشان زهقت)
2- عايز اتجوز بقي زهقت من حياة العزوبية
3- نفسي شعري مايطولش علشان باتخنق من مشوار الحلاق (بس ما ابقاش اقرع يعني)
4- اجيب عربية ان شالله زقزوقة علشان ترحمني من شحططة الاتوبيسات
5- اخف من البرد اللي عندي ده علشان زهقت منه (البرد ده غبي قوي عامل زي العيل الرزل الغلس )

س8 :
أذكر شخصين علي الأقل متواجدين في حياتك حاليا كنت تود وجودهم قبل الأن بزمن؟

ج8: ناس كتير قوي بس ممكن اغير السؤال واخليه شخصين موجودين دلوقتي وكنت اتمني مايكونوش موجودين
هم الموبيل (علشان بيصحيني من احلاها نومة ) والكمبيوتر (علشان خلاني اقابل اصحابي كلهم علي النت ومش باشوفهم لايف زي زمان)

س9: ده سؤال انا ماليش نفس اجاوب عليه بقي (الله انا حر مدونتي وانا حر فيها)

س10 : تدبس مين في السلطانية دي

ج10 : اي حد فاضي وعنده الجرأة يتكلم عن نفسه واخص بالذكر (حلوة اخص بالذكر دي)

مخنوق جدا و memo و كوشيا و انا ودماغي و عايزة تطلق و
Che_WildWing و بنت الشمس و سوووو و بنت عادية جدا و كلمات الصمت و قطة الصحراء و زوايا السحاب و وزة و عجبي

هناك 31 تعليقًا:

Sweet Violet يقول...

هههههههههههههههههههههههههههههه

بجد اجاباتك دمها خفيف

بس السؤال الخامس مال احلامك صغيره كدا ليه ههههههههههههههههههههههه

لالالا و موضوع الشغل اللى انت نفسك تبطله امال عايز تشتغل ايييييييييييييه

هربت من الاجابات بطريقه طريفه ماشى ياعم الواحد مش هايقوم عليك ولا يقول انك هربت من الاسئله ولا حاجه

ولا هاقول انك قلبت التاج فى خمس دقايق

ولا اى حاجه من دول

هههههههههههههههههههههههه

Mina يقول...

الله الله الله ايه ياضد
طيب ده حتي يعني ربنا امر بالستر
ليه كدة بس
علي العموم ياستي متشكر قوي علي مرورك وتعليقك كمان وليكي التاج مني هدية متواضعة وهاجي اقراه لما اخف من دور البرد الرزل ده
ومافيش نقاش الهدية لا ترد
تحياتي

كـــيــــــــارا يقول...

هههههههههههههههه

اجاباتك عثوله اوي وتلقائيه جدا

بس انا بقي هسال التاثير ايه هههههههه

وانت رافض كل الشغلانات

ههههههههههههههههه

لا بجد الاجمل من التاج اجابات

تحياتي

Sweet Violet يقول...

لالالالا ماينفعش ابدا بتاتا نوهاااااائى خااااااااااالص

انا جوبت تاجات كتير فى المدونه السابقه بتاعتى و دا كان واحد فيهم يعنى مكرر

نيهاهاهاهاهاهاهاهاها فرحانه انا فرحانه ههههههههههههههه

بس للأسف مافيش غير تاج اللى جالى البارح مش مكرر للأسف عااااااااااااااااااااا

بس مدام انت كريم فالازم انا اكرم طبعا وبالتالى جهز نفسك للى جاى هيع هيع هيع

انا لازم برضه ارد الهديه ولا ايه؟؟؟؟

mohamed ghalia يقول...

إجابات لذيذة قوى
ربنا يحققلك أحلامك إلى إحنا مفهمناش منها حاجة .
تقبل تحياتى

غير معرف يقول...

ههههههههههههههههههههههههههههههه
على فكرة أنا مت من الضحك و كنت قاعدة فى أوضتى و بابا فاكرنى بذاكر و بيقولى أنتى بتذاكرى نكت

لا بجد إجابات زى العسل

بصراحة جالى إنشكاح كدة و أنا شايفة اسمى
طب و الله فيك الخير

يللا إن شاء الله تحقق كل أحلامك
و بالذات الحلم اللى أنت مش فاكره ده ده أناأهم واحد فيهم ماشى

و عجبى أوى التأثير بتاع التدوين اللى أنت كتبته
من الآخر أنا كنت حاسة إنك عايز تتضرب جيمى عشان أداك التاج
أصله بصراحة تدبيسة آخر حاجة

بص أنا إن شاء الله حاخد التاج ده بس مش دلوقتى
أصل بعيد عنك و عن السامعين عنتى مذاكرة و مش فاضية


يااااااااااااارب كدة تكبر و أشوفك حرامى قد الدنيا
آآآآآآمين

Mina يقول...

كيارا
انت اللي عثولة
وبعدين التأثير واضح جدا معقولة مش واخدة بالك منه
لالالالالالالا انت لازم تشوفي دكتور
وموضوع الشغلانات ده انا مش رافض ولا حاجة
هم اللي رافضين بيقولولي عايزين واحد بيفهم (شكلها شتيمة مش كدة؟ اه والله شكلهم بيشتموني وانا مش واخد بالي)
تحياتي ياكيارا

Mina يقول...

ضد التيار
لالالالالالالالالالالالالا السابقة حاجة والحلية حاجة لازم ولابد ومافيش كلام ولا نقاش ولا سفسطائية وماتخليناش ندخل في السياسة
تاج يعني تاج ده مش هزار
تحياتي ومستني اقرا اجاباتك عندك

Mina يقول...

mohamed ghalia
ياباشا ربنا يخليك
ومين فينا اصلا فاهم احلامه علشان يفهم احلام الناس
خلينا ساكتين وماتخليناش نخوض في اعراض الناس بقي
تحياتي ياريس

Mina يقول...

انا ودماغي
ياريت تذاكري نكت كويس انت عارفة تنسيق النكت الايام دي بقي عالي قوي
لازم تضحكي 400 ضحكة في الدقيقة علشان تلحقي حاجة عليها القيمة
وبعدين اصلا ماحدش فينا فاكر حلمه
وده طبعا مش عيب ده ميزة كبيرة جداااااا تفتكري يعني لو كنت فاكره هاتفرق كتير؟
ماهو كدة كدة مش هايتحقق يبقي انساه احسن
يالله بقي ماتقلبيش علينا المواجع
المهم مستني اجاباتك علي التاج قريب اوعي تقلبيه زي ما انا قلبته
تحياتي

Soooo يقول...

الف شكر على مباصاتك للتاج لي
وان شاء الله في اقرب وقت هفضى فيه هحاول اجاوب عليه

ملحوظه
بقى مش عايز شعرك يطول بسرعه ومش عايز تقرع .. طب ده مافيش احسن من العالم القرعه يا جرع





سلاموووووووووووووز

Mina يقول...

سووووو
ياباشا اي خدمة هو انا في ديك الساعة لما ادبسك
اعيش وتاخد غيرها ههههههههههههههه
ومعاك حق مافيش احلي من النظافة
ناس دماغها نضيفففففففففة ولا بيحتاجوا حلاق ولا يحزنون
بيقولك البني ادم بيضيع من عمره حوالي 3 سنين عند الحلاق
شوف انت بقي الاقرع ممكن يعمل ايه في التلت سنين دول
يالله مستني اجابتك علي التاج
تحياتي

Unknown يقول...

لا مش هزعج حضرتك ولا حاجة

الاجابات جميلة مع ان حضرتك عملت انك جاوبت بعض الاسئلة !!!

شكرا على اهداء التاج .. ان شاء الله اجاوبه قريب

mahasen saber يقول...

احمدك يا رب متجاوب التلج قبل كده...
هههههههه شوفت بقه التاج اليى بعته او السلطانيه دى جاوبتها من حوالى 3 بوستات فاتوا
بس الف الف شكر على الهديه وعلى ذوقك
وشكرا جزيلا انك فاكرنى بتاج حلو يا ريت بقه تفتكرنى بدعوه يبقى حلو قوى....
الف شكريا بتاشمهندس الف الف شكر
وهديه متجاوبه ومقبوله..

mahasen saber يقول...

بعدين تعالالى هنا تهدى التاج لاى حد فاضى يعنى ايه يعنى مين قالك انى فاضيه...بعدين عنده الجراه يتكلم عن نفسه اه كده ماشى انا عندى البجاحه كمان مش الجراه بس...
انما احلامك لذيذه وبالذات العربيه يعنى مقولتش فرارى مثلا ولا بورش اتمنتها محندقه وقزوقه ربنا يديك اكتر مما تتمنى ...
ام عجبنى قوى قوى موضوع كرهك للموبايل والكمبيوتر شفت الامور برؤيه مختلفه ...
بس لو مش عايز ولا شغلانه من اليى قلتهم نفسك تشتغل ايه عاطل مثلا..
الهندسه مش وحشه على فكره ده المهندس المفروض مبدع وبيعمل بيوت ومبانى حلوه يعنى تعتبر فن برضه...
يله اجابات جميله وتاج متجاوب وكا عام وانتا بالف خير
وربنا يصلح حالك ويوفقك فى كل ما تصبو اليه...

Mina يقول...

نور
هي الاسئلة كلها اصلا عملت اني جاوبتها
بس عادي يعني اهو تاج يفوت ولا حد يموت
ومستني اجاباتك اللي بجد مش تعملي انك بتجاوبي
تحياتي

Mina يقول...

الست محاسن
فرحانة قوي حضرتك علشان طلع تاج قديم ماشي عليالعموم مرضوضالك بكرة اجيبلك تاج جديد نووووووفي وهافصله انا عليايدي
وموضوع انك عندك بجاحة تتكلي عن نفسك ده اشك فيه اصلا
ماحدش يقدر يتكلم عن نفسه بصراحة مطلقة الا نوعين بس من الناس
الاولاني ما اعرفهوش
والتاني بادور عليه
هههههههههههههههههه
والاحلام بسيطة ولا كبيرة بقت صعبة تححق في الايام دي
الاحلام كلهااااااا بقت رفاهية غالية ماحدش اصلا فاضي يحلم
وموضوع الموبيل والكمبيوتر بقوا شر لابد منه مابنحبهمش بس مانستغناش عنهم
لابحبك ولا بقدر علي بعدك علي راي الست
اما بقي موضوع الشغل فانا قلت كان نفسي اشتغي ايه بس ربنا ماارادش وماطلعتش حرامي (تنسيق الحرامية كان عالي قوي سنتها )
والهندسة حلوة قوووي للي بيشوفها من برة
بس هي دي فعلا مهنة البحث عن المتاعب
وبمنظور عام كدة كل شغلانة ليها قرفها اللي مابيشوفوش الا اللي يدخل جواها
فاحسن حاجة الواحد يشتغل عاطل فعلا
اما بقي موضوع ماتصبو اليه ده فياريت توضحي قصدك ايه (اخوكي حمار عربي) هههههههههههههههههههههه
تحياتي ياافندم

عايش... ولكن !!!! يقول...

اجاباتك جميله اوى
بس للأسف مش هينفع اتدبس المرادى
لانى جاوبت عليه قبل كده :)

Mina يقول...

عايش ولكن
علي عيني ياباشا والله
بس ملحوقة يعني هو ده اخر التاجات ؟
بكرة ربنا يرزقها بتاج تاني وهاتروح مني فين يعني (ده احنا هانروقوكي ياشابة)

Sweet Violet يقول...

تعالى خد الهديه بتاعتك من عندى

D:

Mina يقول...

اهيء اهيء اهيء
والله حرام ياضد
ده حتي تاجين في الراس توجع
علي العموم ياستي متشكر علي الهدية ومسيري اجاوبه في يوم من الايام ماتقلقيش
ميرسي يا افندم

سارة درويش يقول...

ههههههههههههههههههههههههههههه اجابات زي العسل بجد خاصة احلامك والحاجات اللى اتعلمتها من التدوين

Mina يقول...

سمو الاميرة سارة
شرفتيني سموك ومتشكر قوي علي الزيارة الغالية
تحياتي لسموك

mahasen saber يقول...

انتا مصر تدبسنى ماشى انا عامتا متدبسه طبيعى
.....
بس ضحكتنى قوى بتنسيق الحراميه دى معلش كنت حسن نصب وربنا كان وفقك كان زمانك راكبلك عشره خمستاشر عربيه اشى فيرارى على جاكوار على مرسيدس كابروليه ...شعب غاوى فقر فعلا...
.........
بس كارو الحلال احلى برضه..واسرع

Mina يقول...

صح يامحاسن والله معاكي حق
كارو حلال احسن من لامبورجيني
كرباج ورا ياسطي
تحياتي

catroz يقول...

اجاباتك عثوله اوى ..:D

Mina يقول...

cartoz
,الله ياقمر انتي اللي عثولة
تحياتي وشكري علي المرور

أسما عواد يقول...

أجب الدم الخفيف في الاجابة على الأسئلة لذا ادعوك للإجابة على اسئلة باب الشمس انت شرفتني بالزيارة من زمان وانا يا دوب لسه معلقه عليها النهاردةسوري على التاخير
باي

أسما عواد يقول...

موش عارفة ليه تعليقي متنشرش
على ايه حال انا معجبة بإجاباتك خفيفة الدم
انت شرفت مدونتي من زمان وانا بكل اعتذار يا دوب معلقة على زيارتك النهاردة بس
يا ريت تجاوب على اسئلة باب الشمس بتاعتي بنفس خفة الدم دي

Mina يقول...

اسماء عواد
معلش انا اسف ان تعليقاتك ما اتنشرتش مباشرة بس اصلي عامل خاصية الاشراف علي التعليقات
مش لاني لا سامح الله بامسح او بامنع اي تعليق انما بس علشان لما يكون فيه تعليق يوصلني علي الايميل علشان اقراه اقراه وارد عليه اول لما افتح الايميل

وعلي العموم انا متشكر قوي علي اهتمامك وردك
وحاضر هارد علي الاسئلة اللي في باب الشمس بس معلش انا مزنوق قوووووي اليومين دول اديني فرصة بس الم فيها نفسي وارد عليها
متشكر تاني علي الاهداء
تحياتي

l0ma يقول...

هيييييييية اخيرا جالى تاج انا مبسوووووووطة :]:]:] بس شكلوا صعب اوى
عمومان ميرسى عالتاج وسورى عاتاخير ظروف نتية بقى اكيد لما تيجى تزورنى المرة الجاية هتعرف سبب التاخير