الأحد، 26 أكتوبر 2008

سواق تاكسي من العصر البائد


النهاردة ركبت تاكسي وانا رايح الشغل علشان كنت نازل متأخر (وماحدش يفتكر اني والعياذ بالله باركب تاكسي كل يوم )
المهم
وطبعا سواقين تاكسي القاهرة مابيصدقوا حد يركب معاهم ويبتدوا في الحواديت اياها بتاعة الحالة والقرف والبلد والزباين والحر
بس المرة دي كان حوار مختلف
الراجل سواق التاكسي كان مواليد 1930
وانا لقيته راجل عجوز فنكشته بسؤال عادي جدا
السؤال كان

انت عشت في عصر الملك فاروق ياحاج؟؟؟؟؟؟؟؟؟؟؟

هاسيبكم انتوا تسمعوا الاجابة بنفسكم وتعلقوا علشان انا ماعنديش اي تعليق علي اللي سمعته
بس بجد بجد حاجة تفرح والله
بجد ماكنتش عايز انزل من مع الراجل

لما هم دول سواقين التاكسي بتوع زمان امال البشوات كانوا شكلهم ازاي

مش ده العصر البائد اللي قالبين دماغنا بيه
شوفوا الراجل حتي وهو بيفكر يشتم بيشتم ازاي
مش هاتكلم كتير وهاسيبكم معاه تسمعوا بنفسكم
ــــــــــــــــــــــــــــــــــــــ
ملاحيظ نفسي اقولها
ـــــــــــــــــــــــــــــــــ

الملحوثة رقم واحد
(حاولت بقدر الامكان صوتي مايبانش علشان صوتي وحش ههههههههههه وبعدين اصلا هو ماكانش محتاج اني اتكلم هو ماصدق واتفتح لوحده )

الملحوثة رقم اتنين

انا مش مؤيد لكلامه في المطلق ولا بارفضه في المطلق انا بس حبيت انشر وجهة نظر الراجل (انا باقول اهو احسن اروح بلالالالالاش ياجدعاااااااان )

هناك 10 تعليقات:

كـــيــــــــارا يقول...

موضوع مصر قطعه من باريس

كان الخديو اسماعيل اللي قالها

اما في نقاط في الحوار اتفق فيها معه

وفي نقاط وضحتها دكتوره لو جاردن في مذكرتها

واتكلمت فيها عن حاجات كتير اوي في مصر

---------

عنده 37 حفيد و16 عيل يانهاري

ماشاء الله

----------

متخش يااستاذ وهيضيعوا صيامنا

اللهم اني صائم

يالهوي ده الناس بتشتم حاجات تانيه مش يااستاذ وهيضيعوا صيامنا

-----
الباقي بقي

حسه انس قدام جدي بالضبط

علي فكره جدي مواليد الثوره ربنا يديه الصحه

وبالنسبه لاننا مداينين الجيش البريطاني

ده فعلا حقيقي

----------

اما علي علاقه المسحيين بالمسلمين

اصلا الفتن اللي بتم ماهي الا شذرااااااااااات

--------

حوار شيق فكرني بقعده جدي لما بكشه النكشه مش بيسبني الا وانا مروحه :)

Mina يقول...

كيارا
فعلا مصر كانت حتة من باريس ايام الخديوي اسماعيل اللي مشردينه في التاريخ
ولو محمد علي هو اللي عمل مصر الحديثة يبقي اسماعيل هو اللي كمل بعديه

ـــــــــــــ
وبعدين انت هاتقري علي الراجل ولا ايه ربنا يخلي ياستي والعيال عزوة برضو
ــــــــــــــــ

ياريت بتبقي علي قد الشتيمة وخلاص الحياه زمان كانت نضيفة قوي والافاظ كمان كانت كمان نضيفة ماكانش فيه يابن ..... وعلي فكرة الراجل ماكانش يعرف اني باسجله علشان يمسك نفسه ومايشتمش
وكمان يومها ماكانش صيام هو كان بيهزر في موضوع الهم اني صايم
ـــــــــــــــــــــــ

وموضوع اننا مداينين بريطانيا لسة المصري اليوم كانت ناشرة مقال من كام يوم بتقول اننا مداينين بريطانيا بما يعادل ضعف ديون مصر كلها مش فاكر كانوا كام مليار جنيه كدة
ــــــــــــــــــــ

الفتنة بين المسلمين والمسيحيين شذرات زي مابتقولي بس هي موجودة والشزرات دي ساعات كتيرة قوي بتعمل مصايب
بس في معظم الاحيان بتكون الشذرة الاولانية بسبب ناس (ربنا يجعل كلامنا خفيف عليهم ) بيكونوا قاصدينها علشان تغطي علي حاجات تانية
ــــــــــــــــــــ

تحياتي يا كيارا علي المرور

bakkali_2007@live.fr يقول...

وااااااااااااااو

Mina يقول...

prince
ولو اني مش فاهم قصدك ايه من وااااااااو دي
انما برضو مشكور عليالمرور ياريس وتحياتي
ودايما منورني

كلام على بلاطة يقول...

,hkh
,وانا مش محتاج اسف
البساط احمدى

Mina يقول...

كلام علي بلاطة
ياباشا البساط احمدي وتنور وتشرف في اي وقت
منورني

د/ رامي شهاب الدين يقول...

واضح إن العصر بتاعنا هو العصر البائد .. مش بتاع زمان زى ماكنا فاكرين


تحياتى

Mina يقول...

د/ رامي
معاك حق والله
احنا بقينا عصر بائد ورث وممزق
امتي بقي نلاقي حد يرقعنا
تحياتي

mahasen saber يقول...

ياه مسابش حاجه متكلمش فيها
من مجانية التعليم للاستعمار للخصخصه
انسان واسع الافق ومثقف ثقافة الحياه مش الكتب

بس 37 حفيد ربنا يعينه ويباركلهفيه وفى ال16 عيل
اهم دول بالنسبه ليه هما ثروته فى الدنيا

Mina يقول...

الست محاسن
معاكي حق فعلا الثقافة مش ثقافة الكتب وعلي راي المثل العلم في الراس مش في الكراس ههههههههههههه
وربنا معاه في ال 37 حفيد ويقويه عليهم
ده ممكن بيهم يعمل دولة ويعمل فيها اللي هو عايزه ويستقل بقي عن مصر هههههههههههههه
تحياتي يا افندم