الأربعاء، 3 ديسمبر 2008

قطر الندي (1)



الصديقة العزيزة اسماء عواد صاحبة المدونة الجميلة (باب الشمس) عدت عليا هنا مرة وقالتلي اجاوب علي اسئلة مجلتها الكميلة هالص هالص هالص قطر الندي ودي اسئلة بتسألها للاطفال وهم بيجاوبوا عليها اجابات ساعات بتكون عاقلة جدا واكبر بكتير من اجاباتنا احنا (ياكبار ياعاقلين) وساعات بتكون تلقائية وكميلة هالص هالص

انا بقي طبعا مش هاقدر اجاري الاطفال وشقاوتهم بس هاحاول اجاوب علي قد ما اقدر وبمنتهي الصراحة علشان ماحدش يزعل

ههههههههههههههههههه

ملحوظة

هاجاوب كل سؤال في بوست علشان الملل

نيجي للسؤال الاول

س1: متي تشعر بالخجل

طبعا سؤال خبيث قوي من قطر الندي وربنا يسسسسسسستر

المواقف اللي الواحد بيتعرض فيها للجل كتيرة جدا منها علي سبيل المثال

1- انا من عادتي اني بانسي بسرعة قوي وذاكرتي ضعيفة خصوصا في الاسماء واكتر المواقف المحرجة اللي باتعرضلها اني اقابل حد من اصحابي قوي واحاول افتكر اسمه وانا باسلم عليه وما اعرفش وياسلام بقي لو قلت اسم وطلع مش هو بتبقي حالة

بس اكتر حاجة بتنقذني في المواقف دي (ازيك ياباشا عامل ايه ياريس واحشني يامعلم )

2- لما المدير بتاعي في الشغل يدخل عليا ويلاقيني بالعب (زوما ) ويخرج بسرعة علشان الغيها وكأنه ما اخدش باله علشان مايحرجنيش (راجل زوق بصراحة ) وبعد شوية يرجع تاني يلاقيني لسة بالعب زومة (ادمان بعيد عن السامعين)

3- لما اركب اتوبيس النقل العام (بتاع الدولة مش الشركات الخاصة _وهاتعرفوا اشمعني في الاخر _) وانا مخنوق والكمسري الرزل يقولي رايح فين يا استاذ وما اعرفش ارد عليه وافضل متنح شوية وفي الاخر اقوله اخر الخط (طبعا باكدب عليه )

4- لما ادخل مطعم واتجعص قوي واطلب واحد فول من غير سلطة خضرا والراجل يبصلي قوي ويقولي ماعندناش تلفزيونات واخرج من المطعم وانا بالعن البانجو واللي بيتعاطوه وابص ورايا علي يافطة المطعم الاقي اسمه كنتاكي ....... (لا تعليق)

فيه بقي مواقف محرجة جدااااااا حصلت معايا ومش قادر انساها ابدا منها

1- كنت في بلد غريب وحبيت اشتري عيش نزلت الشارع ورحت لاقرب محل لقيته قدامي وقلت للراجل ب2 جنيه فينو ياباشا . الراجل بصلي بصة غريبة قوي وقالي مافيش طبعا استغربت قوي من بصة الراجل ليا وماله بيكلمني بقرف كدة ليه سيبته ورحت لفرن كان قريب منه ووانا راجع بابص ناحية المحل ده لقيته بتاع مبيدات حشرية ............... (ماحدش يضحك انا باقول اهه)

2- مرة كنت انا وواحد صاحبي في سنما والدنيا كانت زحمة قوي واحنا خارجين وكنا ماشيين في طابور طويل وصاحبي كان ماشي قدامي فحطيت ايدي علي كتفه علشان ماكنتش عارف احطها فين من الزحمة (عادي يعني بتحصل كتير ) ولما خرجنا برة الضلمة ووصلنا للنور لقيتني حاطط ايدي علي كتف بنت ما اعرفهاش _طبعا عملت عبيط وجريييييييييت _ (شايف واحد هنااااك اهوه بيقول اني كنت عارف وعامل عبيط )

3- اكتر موقف محرج بقي اتعرضتله في حياتي كان من حوالي 3 سنين لما دخلت المستشفي اعمل عملية كبيرة (هاتفرق يعني كبيرة ولا صغيرة يالله ماعلينا عدوها ) ولقيت ناس اصحابي ماشفتهمش من زمان قووووووووي بيزوروني في المستشفي وكنت هاموت واعرف هم عرفوا منين

المهم لما خرجت من المستشفي وشفتهم بعد حوالي شهرين سألتهم انتوا عرفتوا ازاي فواحد منهم قالي ان والده كان في العناية المركزة بتاعة نفس المستشفي وهو شافني وانا داخل العمليات

فتلقائيا وعادي جدا سؤال منطقي خطر علي بالي ...... ووالدك عامل ايه دلوقتي ؟؟؟؟؟؟؟

قالي الله يرحمه

انا ضربت لخمة وماكنتش عارف اقول ايه (موقف محرج جدا علي فكرة واي حد مكاني كان هايتلخبط )

بس اللي حصل معايا كان مختلف

لقيتني باقوله يالله مش مهم ................. قصدي في داهية.......... سوري سوري بجد مش قصدي انا اقصد يعني خد الشر وراح ........................................

هو ضحك وحاول يلطف الموقف وقالي ماتاخدش في بالك انا فاهم

واحد صاحبنا تاني ربنا يجازيه بقي قالي الاربعين النهاردة بلليل تعالي نعزيه علشان انت ماعرفتش وقت الوفاه قلتله طيب قبل اي حاجة المفروض اقوله ايه لما نروح

قالي هم كلمتين ساهلين خالص

البقية في حياتك وتعيش وتفتكر

فضلت من ساعتها لحد ماجه الميعاد اللي اتفقنا عليه عمال اقول البقية في حياتك تعيش وتفتكر البقية في حياتك تعيش وتفتكر البقية في حياتك تعيش وتفتكر

واول ماشفته قلتله اهلالالالالالالالالا ازيك ياراجل كل سنة وانت طيب تعيش وتاخد غيرها

......................................................(اي حد هايشتم هو حر )

هناك 20 تعليقًا:

Kiara يقول...

هههههههههههههههههههههههههههههههههههههه


موتني من الضحك

يالهوي

تعيش وتاخد غيرها

انت نقطت الواد

ههههههههههههههههههههههههههههههه

لالالا بجد انت حكايه

ال تعيش وتاخد غيرها ال

كل سنه وانت طيب

Kiara يقول...

ايه ده

انت شلت الاشراف علي التعليقات


انا اتخضيت


ماسي ماسي

Mina يقول...

ايوة ياست مولان شلت الاشراف
اي خدمة يالله
حاجات ببلاش كدة
ميرسي علي التعليق
دايما كدة اول تعليق بيكون ليكي
كل سنة وانت طيبة
وحمدالله علي السلامة

kochia يقول...

ده صحيح ولا هزار
لو بجد يبقي بتهزر طبعا

دا الذاكرة ضاربة خالص
ربنا يستر متتضربش بسببها في يوم

تحياتي

غير معرف يقول...

انا طبعا عارفه ان كل اللى انت بتقوله ده مش هزار اللى يعرفك كويس يعرف انك مضيع عن كده بمراااااااااااحل انت عارف اكتر حاجه قلقانى ايه انك انشالله لما تتجوز ويكون عندك اطفال تنزل معاهم مره وتنساهم باره البيت....انا كنت اعرف واحد زميلى فى الشغل كانت دماغه مضيعه كده كان كل يوم يجى يركن عربيته قريب من المكتب فى يوم ملقاش مكان فركنها فى مكان بعيد عن المكتب ...اخر النهار واحنا مروحين قعد يدور عليها وانه يفتكر ركنها فين ابداااااااااا وقعد يدور عليها ملقهاش غير بعد 3 ايام...انا هحاول احكيله عنك اصل الواحد لما بشوف ان فى حد اسوء منه بيطمن على مستقبله...هههههههههههههههههههههههههههههههههههههههه

Mina يقول...

kochia
حلوة قوي لو بجد يبقي هزار دي
ههههههههههههههه
علي فكرة انا اتعرضت كتير قوي لمواقف لولا الجري فيها كان زماني متقطع
ههههههههههههههه
بس بيقولوا في المواقف دي الجري نص المجدعة
وانا بقي جدع قووووووووووووي

Mina يقول...

رنا
والله بقي انت ادري واكتر حد باتلخبط في اسمه
ههههههههههههههههههههههه
بس انا عارف انك قلبك طيب وبتعديها بمزاجك ومابتحبيش تحرجيني
وعلي رأي المثل
اللي يشوف بلاوي الناس يبقي ماعندوش دم لو ماساعدهومش
ههههههههههههههههههههههه

mahasen saber يقول...

ههههههههههههههههههههههههههههههههههههههه
وكمان واحده هههههههههههههههههههههههههههه
ربنا يسعدك انا عنيه دمعت بغزاره من كتر الضحك

يا نهار ابيض ده انتا فل دماغك لقطه
بس قولى بئه ايه ال زوما دى اصلى معرفهاش وممكن تقول لها اسم تانى واكون اعرفها

بس بجد ربنا يسعدك ويفرحك زى ما ضحكتنى كده

mahasen saber يقول...

وكل عيد وانتابالف خير
واسرتك وكل من تحب بكل صحه وستر


والنبى اشوف ردك بئه على التهنئه ايه ههههههههههههههه
ده انتا دماغ عسل
بس ايه علاقة التليفزيون بطلب الفول ابو سلطه وفيه حد اصلا بياكل فول بالسلطه

Mina يقول...

العزيزة محاسن
الحمد لله اني قدرت انتزع منك ضحكة وسط مشاكلك وهمومك دي كلها
ده حتي بوست العيد عندك نكد
انا ماعلقتش عندك علشان النكد تقيل علي قلبي شوية
زوما دي بقي ياستي عبارة عن لعبة هبلة كدة فيها مجموعة كور (كمع كورة ) بالوان مختلفة وانت واقفة في النص وبترمي كورة بلون معين علي خط الكور وكل لما تجمع 3 كور او اكتر بنفس اللون بيشالوا ولما الكور كلها تخلص يبقي انت خلصتي اللعبة
وليها اصدار قديم شوية كان اسمه الاقصر ممكن يكون ده تعرفيه
يارب تكون اللعبة كدة وصلت
هي لعبة هبلة قوي وبتاعة العيال الصغيرين بس تقولي ايه بقي مخ مهندسين


اما بقي موضوع التلفزيون ده فانا كنت زيك بالظبط مش فاهم الراجل قصده ايه
وعلشان كدة طلعت العن البانجو اللي الراجل بيتعاطاه وخلاه يقولي مابنبيعش تليفزيونات وانا باقوله عاوز فول
بس لما طلعت وبصيت علي يافطة المحل ولاقيت اسمه كنتاكي فهمت
وافتكرت النكتة بتاعة الصعيدي اللي دخل محل وقال للراجل بكام التليفزيون ده فالراجل قاله مابنبيعش لصعايدة فراح غير هدومه ولبس بدلة شيك وجه قاله بكام التلفزيون ده قاله مابنبيعش لصعايدة فالراجل استغرب وراح لبس برنيطة وعمل خواجه وجه قاله بكام التليفزيون ده قاله مابنبيعش لصعايدة فالصعيدي اتجنن وسأل الراجل انت بتعرف ازاي اني صعيدي قاله اصل دي غسالة مش تليفزيون
هههههههههههههههههههههه
بس
اما بقي الفول ابو سلطة خضرا فده بيبقي حلو جدااااااااااا ممكن ابقي اقولك علي الوصفة بتاعته بس دي محتاجة بوست لوحدها وعلشان كدة انا مش باحبه وكل مرة باطلب فول باطلبه من غير سلطة خضرا وباسمع نفس التعليق من الراجل كل مرة (مش هاقوله علشان الرقابة) ههههههههههههه
انا عارف التعليق هايصدعك ده طلع اطول من البوست نفسه
كل سنة وانت طيبة ويارب يعيد عليكي الايام بخير ومن غير مشاكل ويخليلك عبد الرحمن والسنة اللي جاية كدة تشوفيله عروسة
وربنا يعوضك عن والدك كل خير وتعيشي وتفتكري (يارب اكون قلتها صح وماباعكش )
كل سنة وانت طيبة يامحاسن وعيد سعيد والسنة اللي جاية احسن واجمل واسعد يارب

غير معرف يقول...

ههههههههههههههههههههههههههههههههههههههههه

لا انت بجد ملكش حل


بس على فكرة ده ميمنعش انى زعلانة........آه و لا حتى عبرتنى إن شاالله بشتومة
ماااااااااااااااااااااااشى






على العموم يا سيدى كل سنة و انت طيب و عيد سعيد عليك

Mina يقول...

انا ودماغي
لالالالالالالالالالالالالالالالالالالالالالالالالالا انت عارفة ما اقدرش علي زعلك
بجد اوعي تزعلي
بس اديكي شايفة الزهايمر
كويس اصلا اني بافتكر انا مين واني عندي مدونة وكدة وبادخل ابص عليها
اقولك علي حاجة
انا كاتب ال user name و الباسوورد في فايل علي الجهاز علشان بانساهم
كل سنة وانت طيبة يارب وعيد سعيد عليكي وعلي الاسرة والجيران والاهل والاصحاب وزمايل المدرسة وماما وتيتا وبابا بمناسبة عيد ميلاد جدو
ههههههههههههههههههههههههههه
كل سنة وانت طيبة يارب
وماتحليش بقي
انا ما اقدرش علي زحلك
باي

kochia يقول...

(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)

محمد حويحي يقول...

منامينو
منك لله

انت طبعا عارف ان لما ادعيلك واقول منك لله ابقي بدعيلك حاجه حلوه .. اصلك بجد كنت خايف العيد يعدي من غير ما اضحك من قلبي بجد
شكرا يامعلم

هابي ماااااااااااااااااااااءءء

Mina يقول...

kochia

كل سنة وانت طيبة ويارب العيد اللي جاي تكوني اجمل واحلي واحسن واشقي من اللي فات
وعلي رأي عقل مهوي
هابي ماااااااااااااااء

Mina يقول...

عقل يوزن بلد
ربنا يخليك ياباشا ويارب دايما تضحك من قلبك
واضرب الدنيا بال .......... اصلها ماتستاهلش اكتر من كدة
ومنك لله
ههههههههههههههههههه
وهابي ماااااااااااء

Kiara يقول...

علي فكره

بالنسبه لليوزر والباسورد

انا زيك عاملهم في ملف علي الجهاز

عشان الزهيمرات هئ هئ هئ هئ هئ

Mina يقول...

بجد بامولان
طيب الحمد لله اني لاقيت حد زيي
اصلي بجد كنت خايف علي نفسي قوي
كدة برضو الواحد يتطمن علي نفسه
وعلي راي المثل
اللي يشوف بلاوي الناس يغمض عنيه

أسما عواد يقول...

شوف بقى انا بعلق دلوقتي عشان اطيب خاطرك وخاطر كل الللي دماغهم ضارب زينا
تعليق رانيا سمع عندي لن ليا واحد قريبي نسي ابنه في الشارع وركب الميكرو باص وافتكر في البيت
اما انا فحكايتي حكاية مع النسيان لدرجة ان المسألة اتحولت لعقدة بقيت بحلم اني نسيت حاجات كتير مهمة وانا نايمة واقوم مفزوعة من النوم
ما علينا
المهم انا متشكرة جدااااااا على بوستك الجميل ده وتعليقك كان اجمل في مدونتي
كل سنة وانت وحبايبك طيبين

Mina يقول...

اسماء عواد
حالنا وحال اللي زينا كتير وفيه ناس كتير بتعمل افظع من كدة
المواقف اللي حكيتها دي الشوية اللي افتكرتهم بس
هههههههههههههههههههههههههه
لكن انا اصلا طول عمري كدة
حياتي كلها زهايمر
انا ايام ماكنت في الكلية كنت باكتب مواعيد الامتحانات في ورقة وحطها في جيبي علشان ما انساش وساعات كنت اطلع الورقة من جيبي وابص فيها كويس واحاول المواعيد دي بتاعة ايه ما افتكرش اروح مقطع الورقة وراميها
علشان كدة قعدت في الكلية سبع سنين
هههههههههههههههههههه
متشكر علي الزيارة
واستني مني قريب الرد علي باقي الاسئلة بس لما افوق شوية وكل سنة وانت طيبة