الثلاثاء، 2 ديسمبر 2008

المرأة (نص) المجتمع




اول امبارح كنت باتمشي وحاطط في وداني السماعات وباسمع نجوم اف ام (مش لاني باحب اسمعها لا سامح الله ) انما من مبدأ اخنق علي نفسك قبل ماحد يخنق عليك
المهم كانوا بصراحة بيناقشوا موضوع هاااااادف جدا واخدلي بالك انت من هادف دي
برضو المهم الموضوع كان اذا كانت الست تسمح لجوزها انه يخرج برة البيت كتير مع اصحابه ويسيبها محبوسة بين اربع حيطان ولا لا
الرسايل كانت كتيرة ومعظمها برضو رسايل هاااااااادفة بس اللي لفت انتباهي كانت رسالة واحدة وكانت فحوي هذه الرسالة (حلوة فحوي دي )
ان الراجل الجواز بالنسبة له بداية حياه لانه اول لما بيتجوز وبيستقر بيدور علي شغل احسن وحياه احسن يوفرها ليه ولبيته ومستقبل عياله (اللي جابلك يخليلك ياسيدي)
انما الست الجواز بالنسبة ليها نهاية يعني الجواز بالنسبة للست غاية وهدف مش وسيلة
الست بتفضل حياتها كلها مستنية اليوم ده انه يتحقق وكل اللي بتعمله قبل اليوم ده انها بتجهز نفسها للجواز
الرسالة كانت بتقول كدة بالنص
الجواز بالنسبة للراجل بداية حياه وبالنسبة للست نهاية
ياتري الكلام ده يعجب البنات والستات؟
انا مش هاقول رأيي انما الموضوع مطروح للمناقشة

هناك 10 تعليقات:

Kiara يقول...

لا مش يعجبني

لو نهايه يبقي ليه تخلف وتربي وتوصل عيالها لبر الامان

لو نهايه يبقي ليه تحب اصلا جوزها لانها مش هتتجوز الا اللي بتحببه (بتكلم عن نفسي مليش دعوه بغيري )

الجواز مش فسحه ولا نزهه اصلي رايحه الجونينه ده مسئوليه بتكون علي الاتنين الزوج والزوجه
مش نهاية ابدااا

كمان ايه المشكله ان الزوج يقابل اصحابه هما منعو الصداقه بعد الجواز ولا ايه

Mina يقول...

مولان
طبعا كل اللي بتقوليه صح
بس واضح ان اللي بعت الرسالة كان راجل طهقان من مراته
ههههههههههههههههههه
بس هي فكرة البرنامج كانت ان الراجل بيسيب مراته كل يوم ويخرج
وطبعا من حقها انه يقعد معايا ولو حتي يوم في الاسبوع
ماهي مش الخدامة بتاعة اهله يعني
برضو انا ماباقولش رأيي
انا بس باعرض الاراء ولكم المناقشة
تحياتي مولان

Kiara يقول...

هههههههههههههههه

هو احنا عكسناها ولا ايه لا يقعد مع اصحابه مره في الاسبوع وهي بقيت الاسبوع امال اتجوزته ليه ماكانوا يقضوها خطوبه علي الاقل هتكون وحشاه وهتشوفه علطول


وعاوزه رايك بقي هه بس

Mina يقول...

ماهي المشكلة يامولان ان فيه ناس حتي اليوم اللي في الاسبوع ده مابيديهوش لمراته
شايف ان مراته دي حد اشتراه علشان يخلف ويربي العيال (بطريقة مثالية مش اي حاجة يعني لامؤاخذة) وبس
مالهاش حقوق عليه غير الاكل والشرب والذي منه (ماحدش يفهمني صح )
فالستات دي بتطالب انها يبقي ليها يوم في الاسبوع بتاع اصحابه
وبرضو مش هاقولك رأيي هه بس يالله ههههههههههههههه
هاخليه في الاخر

Kiara يقول...

ههههههههههههههه

ياسلام لو فاكراها كده يبقي مش ممكن تكون مراته البنتت اللي حبها وعمل المستحيل عشان يبقي معاها علطول

يبقي اتجوزها اهو جوازه والسلام

الست مش بهيمه في زريبه سيادته دي انسانه بتحس وبتشعر ولها كيانها اللي لازم يقدره

وعاوزه اسمع رايك دلوقتي هه بس مش في اخر البوست

عاااااااااااااااااااااااااااااااا

Mina يقول...

صدقيني حتي لو كانوا متجوزين عن حب
ساعات بعد فترة الحب بيبرد وبيفتر
طبعا بعد العيال والبهدلة وريحة الطبيخ اللي في هدومها
انا مش باقول للرجالة يعملوا كدة
وبرضو ماباقلهومش مايعملوش
كل واحد حر
ههههههههههههههههههههههههه
ومش هاقولك رأيي
بس من غير عياط
ههههههههههههههههه

Kiara يقول...

طيب ما بابا علطول في البيت ادام مش عنده شغل بيبقي في البيت وبيزور اصحابه كل يوم سبت

اشمعني بقي ماهما برده بقالهم 24 سنه متجوزين

لالالا مش مساله عيال وجواز الود والالفه والعشره لها طعم تاني بس هما مش جربوه

وهفضل اعيط عشان اسمع رايك بقي هه بس وعااااااااااااااااااااااااااا

mahasen saber يقول...

معلش بئه افهم مين اليى قال كده عشان اضيق عليه الخناق انا
يعنى ايه اليى قريته ده
مين اليى معندوش اى خبره بالنساء ده وقال كده

الست طول عمرها بتدور على الاستقرار وبتحلم انها تعيش فى كنف رجل ما يحميها ويحسسها بالامان اليى بتدور طول عمرها عليه

اما الراجل فى الغالب الجواز بالنسبه ليه اشباع رغبه والحصول على منفث ينفث فيه عن كل كبته وغضبه وعقده من الدنيا ولو المنفث منطقش بيستمر معاه اما لو نطق واسترد وعيه فبيرميه فى الشارع

وبرضه مش كل الرجاله
ومش كل الستات
بس الكلام والسؤال اليى قلته ده مستفذ يا منامينو
ومستفذ جدا كمان

Mina يقول...

مولان كلاكيت رابع مرة ههههههههههههههه
طبعا مش كل الرجالة زي بعض
بس عايز اقولك ان النوع بتاع باباكي ده والناس اللي من سنه ماعادش موجود دلوقتي
الشباب دلوقتي زي مابتقول محاسن كل اللي يهمه في الست انها حد يطلع فيه عقده ورغباته المدفونة
وطبعا مش كل الرجالة بالشكل ده
لان فيه لسة من النوع بتاع باباكي اللي اهم وقت واحب وقت بيقضيه في بيته وبين ولاده ومع الست اللي عاشت طول عمرها في خدمته وخدمة ولاده
لكن النوع التاني برضو موجود بدليل الرسالة الغبية اياها اللي بناقشها دلوقتي
يارب تكوني عرفتي رأيي ايه

Mina يقول...

محاسن
وانا باكتب البوست ده كنت عارف ومتأكد انك اول واحدة هاترد عليه وعارف انك اكتر واحدة هاتضايقي من الكلام ده
هههههههههههههههههههههههه
بس مولان بقي سبقتك معلش
المهم
طبعا الست طول عمرها بتدور عليالاستقرار والراجل كمان
وهو ده الوضع الطبيعي
واللي بيحصل غير كدة في الاتنين فهو من الشواذ (شواذ القاعدة يعني محدش يفهم حاجة تانية)
اما النوع اللي بيتجوز علشان يطلع عقده في البني ادمة اللي هايتجوزها فده موجود انا ما انكرش وممكن تكون نسبته كتيرة الايام دي بس مش معني كدة ان هو ده القاعدة
ومن ناحية ان الكلام ده مستفز فانا معاكي جداااااا انه مستفز وجداااااا كمان
ولو ماكانش استفذني ماكنتش كتبت البوست اصلا
تحياتي