الجمعة، 26 ديسمبر 2008

المؤامرة الصينية في العملية الحذائية



مش من عادتي اوجع دماغ الناس بحاجات تقيلة
يعني علي رأي المثل مابيقول خليك خفيف خفيف ياجدع
وكمان من عادتي اني مش باحب الزحمة ولا التهليل
يعني اول لما حاجة بتحصل بتلاقي الدنيا قامت وماقعدتش والكل بيتكلم اللي ليه فيها واللي مالهوش ماهو لازم يتكلم يعني امال الناس تقول عليه لامؤاخدة مابيعرفش (يتكلم يعني)
علشان كدة استنيت لما لاهوجة خلصت والمولد انفض وقولت اقول رأيي اشمعني انا يعني
ممكن رأيي ده مايعجبش ناس كتير
والغالب انه مش هايعجب معظم الناس (اللي ممكن يسعدهم حظهم ويقوره يعني) بس برضو هاقوله ورزقي علي الله

واحد ضرب واحد بالجزمة

انا مالي ؟؟؟؟؟؟؟؟؟؟

مالك ؟؟؟ يانهار اسود انت مش عارف اللي انضرب ده يبقي مين

ياعم يبقي اللي يبقي طالما الضرب بعيد عن قفايا انا مااااااااالي

انت شكلك مش عايش في الدنيا
دي الناس كلها مالهاش سيرة الا اللي حصل

بص ياسيدي هاقولك حاجة
الفعل بياخد اهميته من المفعول به
يعني مثلا لو واحد ماشي في الشارع وضرب كلب بطوبة تفتكر ده هايكون حاجة مهمة ؟

اكيد لا

طيب لو نفس الشخص ده ماشي في نفس الشارع وبنفس الطوبة ضرب المحافظ ولا وزير ولا رئيس الجمهورية

طبعا هايكون خبر مهم والناس كلها هاتتكلم عنه

طيب منتظر (ولا ايا كان اسمه ) ضرب بوش بالجزمة ... ايه المشكلة دلوقتي ايه الهليلة اللي الناس عاملاها دي
بوش ده كلب (مع تحفظي علي اللفظ انما اختارته لتوضيح الفكرة لان بوش في الاخر انسان ليه مني احترامه حتي لو الناس كلها اختلفت معاه ) ومنتظر ده واحد عادي ومنتظر ضرب كلب بطوبة او بجزمة او بمدفع رشاش ايه اللي يفرح في كدة ؟

بس بوش ماهواش كلب هو انا معاك انه كلب بس ده مش اي كلب ده كلب سعران كلب متوحش

طيب انا معاك وخليني معاك للاخر
عندنا في بلدنا (اللي هي ميت ابو كبير قوي ) كلب سعران كل يوم ينهش واحد اتنين تلاته هو وظروفه والمتاح قدامه
وماحدش قادر عليه
جه واحد ماشي في الشارع قابله الكلب ده فراح راميه بطوبة كانت في ايده
تفتكر ده حدث مهم قوي؟
لا
الطوبة دي قللت من توحش الكلب؟
لا
بس ممكن في اسوأ الاحتمالات تزيد توحش الكلب وممكن كمان الراجل اللي ضربه مايلمش منه ويبقي راح هدر

بس هو علي الاقل عمل حاجة عبر عن الغضب اللي جواه فش غله يا اخي

حطيت ايدك علي مربط الفرس فش غله
ليه بقي يفش غله هو الغل ده حاجة وحشة خايفين منها قوي ومش طايقينه جوانا
مين قال ان الغل حاجة وحشة بالعكس الغل لما بيزيد ويتراكم ويتوجه ويترابط مع غلي وغلك وغلنا كلنا هايبقي قوة جبارة مافيش كلب في الدنيا يقدر يقف قدامه

الغضب والغل لما نفشه نبقي خسرنا طاقة جوانا وياريت جوانا وبس انما كمان جوا ناس كتير
حتي الناس اللي بتتفرج واللي ماعملتش حاجة هاتحس ساعتها ان بوش ده خلاص كدة خد جزاءه هو وبلده وسياسته
وبدل ماكانوا المفروض يعملوا حاجة توقفه عند حده ارتاحوا وفشوا غلهم ماهو انضرب بالجزمة خلاص بقي هانعمله ايه اكتر من كدة ده صعب علينا والله
والمشكلة ان فيه ناس كبار وكتاب كبار قالوا كدة

تفتكر معايا زمان اول ابراهيم عيسي ما ابتدي يشتم في الريس تفتكر فيه ناس قالوا ايه ساعتها
قالوا ياعم ده تلاقيه قابض منهم علشان يشتمهم علشان يهدي الناس من ناحيتهم
مش هايوصل بيا خيالي طبعا ولا نظرية المؤامرة جوايا لاني اتصور ان منتظر قابض من بوش ولا متفق معاه انه يعمل كدة

و بعدين لما تحب تعمل حاجة اعمل حاجة مفيدة
مش الاسم عمل حاجة
يعني ايه الاسم عمل حاجة هي الحاجات اللي بتتعمل بقت بالاسم ولا المفروض انها تكون بالنتيجة اللي هاتوصلها
تقدر تقولي وصلنا لايه .
تقدر تقولي اخدنا ايه او استفدنا ايه ولا هو استفاد ايه؟
هو الله اعلم بيتعمل فيه ايه دلوقتي
واحنا مافيش حاجة اتغيرت
العراق لسة زي ماهي وفلسطين برضو زي ماهي
لا العراق رجعت اغني دولة في المنطقة ولا فلسطين رجع يرفرف عليها العلم الفلسطيني
ولسة الغاز بيتصدر لاسرائيل ولسة حماس وفتح بيموتوا في بعض ولسة امريكا راكبة علي نفسنا وبتدينا بالامؤاخذة قبل الاكل وبعده

بس الراجل اكيد مافكرش في كل ده الراجل حس بغضب وعبر عنه ببساطة

بص اي فعل مش محسوب بتبقي نهاياته مش محمودة
الراجل حس بغضب وعبر عنه ببساطة.... الكلام ده لما نكون قاعدين بنلعب حوكشة مع بعض
انما دي سياسة دول ده رئيس دولة ودولة عظمي يعني اي فعل مش محسوب هايكون رد الفعل ليه مايعرفوش الا ربنا لوحده
وبعدين كلامي هنا مش عن منتظر
منتظر غلط بس هو انسان ومن حقه جداااااا انه يغلط لان الغلط حق مكفول لكل البشر

الفكرة مش في اللي عمله منتظر ولا غيره الفكرة في الهليلة اللي احنا عملناها
الاشعار نزلت ترف علي جزمة المنتظر والكتاب كتبوا مقالات رنانة توصف وتعبر عن جمال جزمة المنتظر وجمال خطوتها
والمشكلة ان فيه منهم ناس كبار وكتاب محترمين المفروض انهم بيقودوا فكر الناس في البلد
وطلعنا بمظاهرات نتطالب بتحرير المنتظر
خد بالك بقي بعد ماكنا بنطالب بتحرير العراق وفلسطين لا دلوقتي بقينا بنطالب بتحرير المنتظر
يعني شتتنا نفسنا وشتتنا قوتنا وبعد ماكان لينا هدف واضح ومحدد دخلنا نفسنا في اهداف فرعية
لا والانكت بقي ان الجزمة دي بقت بتتباع بملايين
هاسألك سؤال واحد
لما واحد غريب لا يعرفني ولا يعرفك يعرف ان فيه واحد ضربني بالجزمة فانت رحت اشتريت الجزمة دي بكام مليون
تفتكر الراجل ده هايقول ايه عليا وعليك
اكيد هايقول اني باديك بالجزمة كل يوم ومطلع عينك ومسببلك عقدة في حياتك وانت ماصدقت لقيت حاجة تطلع فيها غلك وعقدك وتغيظني بيها وتقولي انا عندي الجزمة اللي انت انضربت بيها
لما واحد يشتري جزمة انضرب بيها عدوه (ايا كان عدوه ده حتي لو الشيطان نفسه ) بكام مليون ونص شعبه بيموت من الجوع
تفتكر ده ينفع يتقال عليه ايه

وبعدين فيه حاجة مهمة قوي ناسينها ومش واخدين بالنا منها
تخيل انت قاعد كدة فرحان ومنشكح قوي باللي عمله المنتظر وعمال تهلل وتقول يحيا البطل يعيش الهمام وقاعد جنبك ابنك الصغير ابو 7 سنين وسألك هو عمل ايه يابابا البطل ده علشان انت فرحان قوي كدة
طبعا هاترد وبكل فخر وتقوله ده ضرب بوش بالجزمة ياحبيبي
هايقولك ليه يابابا ضرب بوش بالجزمة ليه
هاتقوله اصل بوش ده راجل وحش ياحبيبي ويستاهل الضرب بالجزمة وماحدش كان قادر يضربه خالص والبطل ده هو اللي قدر يعملها

تخيل بقي معايا بعد 3 ايام الولد صحي من النوم قبل انت ماتنزل الشغل وقالك بابا ماتنساش تجيبلي شوكولاتة وانت جاي من الشغل النهاردة
وحضرتك طبعا بعد اللي شفته طول اليوم من شحططة في الاوتوبيسات وقرننة المدير بتاعك عليك لا افتكرت الواد ولا حتي ام الواد وماجيبتش الشوكولاته
ودخلت علي ابنك زي الشاطر وسألك فين يابابا الشوكولاته هاتقوله طبعا نسيت ياحبيبي
تفتكر ساعتها هاتبقي انت ايه في نظر ابنك

هاتبقي وحششششششش (وحش بكسر الواو مش الوحش اللي هو اسد ونمر والحاجات دي)

وانت لسة قايله من شوية ان اللي يضرب الوحش بالجزمة يبقي بطل وشجاع والناس تهيصله
تخيل انت بقي ساعتها ابنك هايعمل ايه
انا مش هاقول
قول انت
ولما الموضوع ده يبقي في فكر ابنك وابني وابنه وابنها
ويطلع لنا جيل كامل فاهم ان الوحش بينضرب بالجزمة وان الوحش ده انا اللي باقرر بيني وبين نفسي انه وحش
تفتكر ساعتها هانبقي عاملين ازاي
المستفيد الوحيد من الموضوع ده هو الصين
لاننا ساعتها هانستورد منها جزم بالهبل وشوف بقي ساعتها سعر الجزمة الواحدة هايكون كام

ومن هنا نستنتج وبوضوح جدااااااا ان منتظر اصله صيني (خاصة انه شيوعي )

اقول ايه بس
ربنا يسترها علينا


تحديث مهم جدااااااا

ساعات كتيرة بيكون في اي مقال فكرة محتاجة شوية تفكير من القاريء علشان يفهمها
وانا من انصار الاسلوب ده لان اللي بيقرا لازم يتعب نفسه شوية علشان يفهم اللي ورا المقال والكاتب عايز يقول ايه (يانهار يانهار ده انا بقيت كاتب ياجدعان وباكتب مقالات وحاجت ايه الحوارات اللي باقولها دي هههههههه) المهم
واحد صاحبي قرا الموضوع وقالي اني مش موفق في الموضوع بتاع الاب وابنه ده لانه شايف انه بعيد عن الموضوع
فهمته وجهة نظري في الموضوع ده وهاكتب انا قلتله ايه علشان لو حد ليه نفس رأيه يبقي انا رديت عليه هو كمان


لا

مش بعيد

انا هاقولك قصدي ايه

دلوقتي احنا عاملين هيصة وهليلة علشان واحد ضرب واحد بالجزمة

وبنقول عليه بطل

بغض النظر بقي عن المضروب ده يستاهل ولا مايستاهلش فالاسلوب نفسه ماينفعش

ماينفعش استبدل الجزمة بالفكر

وخصوصا ان اللي ضرب بالجزمة ده اعلامي

يعني المفروض انه بيقود فكر الناس

فلما يستبدل قلمه وعقله وفكره بجزمة

يبقي المفروض ننقده مش نعمل منه بطل

والاطفال بالذات الحاجات دي بتترسب جواهم من غير مايحسوا

انا ماقصدتش بالمثل معناه الحرفي

الواد عمره ماهايقدر يضرب ابوه بالجزمة حتي لو كان شايف انه ابن كلب مش وحش بس

بس في الاخر انا بارسب جوا الواد اخلاقيات سيئة

وهي اني استبدل العنف بدل الفكر

فاهم؟

العنف ده ممكن يكون جزمة بقي ممكن يكون شتيمة

ممكن يكون اي حاجة فيها مظهر للعنف بدل مايفكر ويعبر عن رأيه بطريقة محترمة

هناك 12 تعليقًا:

محمد حويحي يقول...

منامينو صديقي .. سعيد انا اني اكوناول تعليق .. كما سعادتي باني اول واحد يسمع منك الكلام ده اون لاين .. واهنيك علي الاسلوب الجميل وفكره الحوار .. واحجز لنفسي من دلوقتي مكان عشان حرجع تاني اقول رايي في كام نقطه لو تسمحلي ..

Mina يقول...

عقل مهوي
طبعا انت اكيد فاكر المحادثة دي
ههههههههههههههههههههه
علي العموم ياريس البيت بيتك وترجع في اي وقت
وقول اللي انت عايزه
بس من غير شتيييييييمة
اه احسن بازعل
هههههههههههههههههه

محمد حويحي يقول...

صديقي ابو قلب كبيييير وصدر واسع كده وبراح .. تسمع؟؟ .. طب اسمع

واحد ضرب واحد بالجزمة
انا مالي ؟؟؟؟؟؟؟؟؟؟
.. لا معلش مش وانا مالي دا مالي ونص لان دي رد فعله حيجي عليا بما اني واحد من الشعوب المقهوره اللي حتتضرب بالحذمه .

و بعدين لما تحب تعمل حاجة اعمل حاجة مفيدة .. معاك انا في دي .. بس تخيل اننا وصلناان اكبر حاجه يقدر يعملها واحد اعلاااااامي يعني ليه صوت .. اكبر حاجه يقدر يعملها هي دي .. ومش احنا وبس لا وكل الشعوب اللي في انحاء العالم من مشرقه لمغربه اللي خرجوا في مظاهرات رافعين الجذم كرمز ..

بالنسبه للباقي انت عارف اني معاك فيه .. بس لنقطه تربيه الاطفال .. يعني هو انت شايفنا احنا اللي فينا الامل لما العيال الاصغر حيبقي فيهم امل .. يا اخي

maha zein يقول...

اممممممممممم
مش عرفة
كلامك فيه جانب كويس ومنطقي
وجانب تاني واللى هو الناس بتتكلم عنه وهو احساس منتظر الزيدي انه عمل حاجة فعلا هدت من احساسه بالظلم
هو مش في ايده اكتر من اللى عمله
هو اصلا كان محبوس قبل كده سنة بالظبط السنة اللى فاتت
وبدون سبب كل المشكلة انه كان شغال مع قناه البغدادية دي واللى هي يعني المفروض انها ضد امريكا وكده
قام اتحبس سنة ظلم
ده غير بقه اللى اتعمل في بلاده
ده غير حجات كتي
وهو ولا اي حد في ايده حاجة
وعقبال ما نعد نقول كلنا نتحد وكلنا معرفش ايه هتكن الدنيا خربت
وهو عنده احساس كبير بالظلم
طيب يعمل ايه
استطاع انه يعمل حاجة ليها قيمة معنوية كبيرة جدا ليه ولغيره
انما ماديا ممكن متكنش بذات الاهمية
الا انه صدقني الانسان اللى توصل معاه انه ينسي اي حاجة ومتكنش عنده اي ذرة تردد انه يعمل كده
صدقني انت مش دايق الذل اللى هو داقه
بيتهيقلي هو مرتاح دلوقت بغض النظر عن اللى بيحصل فيه
انا لو منه
وعملت كده هرتاح جدا بغض النظر عن اي حاجة هتحصلي

بس يعني
ده راى
ورأيك عموما مرتب وفيه جانب مقع كبير اشكرك عليه

Mina يقول...

الواد ابو عقل يوزن بلد
اسمحلي اصدعك وارد علي النقط اللي بتتكلم فيها
اولا موضوع انا مالي
انا ماقصدتش انا كشخص انما باتكلم احنا عامة في الاول خالص
يعني لو ساعتها كل الناس قالت انا مالي وبرضو مش انا مالي اللي هي سلبية
لا انا قصدي يعني انا استفدت ايه من ده
واحد ضرب واحد انا ايه اللي عاد عليا يعني من ده
ولا حاجة
ده اولا

ثانيا فعلا انا معاك في دي اذا كان الصحفي الاعلامي اللي هو المفروض بيقود فكر البلد تفكيره هداه ووصله لانه يستخدم الجزمة مكان عقله اللي هو المفروض اداته في التعبير عن نفسه
حط الجزمة مكان مخه
معلش مش هاقدر اقول اكتر من كدة لانه ممكن يكون معذور انما احنا اللي مشمعذورين في اللي بنعمله

اما بقي موضوع العيال فلو كنا احنا خلاص راحت علينا ومش قادرين نعمل حاجة ليه نحبط جيل جاي ليه ندمرهم قبل مايطلعوا
لو احنا فقدنا الامل في نفسنا وانتحرنا خلاص علي الاقل مانقتلش ولادنا يمكن يقدروا يعملوا اللي احنا ماقدرناش عليه
ولا ايه ياريييييييييس

Mina يقول...

مها زين بقي
انا معاكي في كل اللي قولتيه
وموافقك جدااااااا
بس مش معني كدة انه ماغلطتش
هو غلط
وممكن اجرؤ واقول انه يستاهل كل اللي يجراله
بس هو من حقع جدااااااا انه يغلط
عادي ده انسان
عبر عن اللي حاسس بيه
عبر عن ثورته علي الظلم اللي وقع عليه
يمكن بطريقة غلط
بس عاااااااااادي
ماياما ناس كتير بتعبر بطرق غلط عن اللي حاسة بيه
واولهم بوش نفسه
حس انه اتظلم وحس انه اتهاجم من العرب فقام يدبح في العرب كلهم
بس انا لما انتقد الغلط ما اروحش اعمل غلط زيه واقول ماهو عمل كدة
برضو ده مش موضوعنا
في الاخر برضو منتظر من حقه يغلط
هو حر
في الاخر ده فرد وبيعبر عن نفسه وبسسسس

المشكلة بقي فينا احنا
في اللي حصل بعد كدة
في الهليلة اللي حصلت علشانه
ماكانش هايبقي فيه مشكلة ابدا لو حاولنا بطرق دبلماسية نطلعه من اللي هو فيه ونخلصه من اللي ممكن يحصله
مافيش مشكلة خالص لما نتعاطف معاه ونديله عذره
وان كنا ساعتها ممكن نبقي بنتجاوز شوية انما برضو ماكانتش هاتبقي ازمة يعني اخويا وحسيت انه بيتألم ورفع صوته شوية مش هاعاقبه علي الازعاج والصداع اللي عملهولي
كل ده كان هايبقي في الاطار المقبول

انما لما كل العالم العربي يتحول لمظاهرة حذائية
لما كل الشعرا ينسوا كل الهاماتهم وملهميهم وتبقي الجزمة هي الملهم الوحيد ليهم
لما كل الكتاب يوصفوا في جمال الجزمة وشكلها ومنظرها وخامتها والرباط شكله ايه
ومش بعيد كمان يومين يطلعلنا ماركة جزم اسمها جزمة منتظر وشوف هايبقي سعرها كام
لما احنا نعمل بطل من واحد غلط وحط الجزمة مكان عقله اللي المفروض انه اداته اللي بيعبر بيها عن نفسه واللي جواه لانه اعلامي وصحفي
لما يحصل كل ده تبقي هنا المشكلة
المشكلة مش في خوفنا من اللي ممكن يحصل ليه ولا لينا
مش هايحصل اكتر من اللي حصل
لكن المشكلة في الحلول البديلة
المفروض نعمل حاجة ليها قيمة توقف بوش وامريكا عند حدها مش مجرد شو اعلامي
لما نستبدل المدفع بالجزمة
ولما نستبدل العقل بالجزمة
ولما نستبدل القلم بالجزمة
ولما نستبدل الفكر بالجزمة
افتكر ساعتها احنا فعلا هايبقي عندنا ازمة جزماوية
القوة الانتاجية للجزم اللي عندنا مش هاتبقي كافية ابدا للطاقة الاستهلاكية لجزم

وفي الاخر برضو رأيك باحترمه وانا معاكي فيه وباشكرك عليه وعلي مرورك وتعليقك

kochia يقول...

اللي عمله مجرد تعبير عاوز بيه يفش غله او يفش غل البشرية
بس هو تعبير عن رايه باسلوب مش هقدر اقول انه راقي او مكش راقي لانالطرف الاخر لا يستحق رقي في التعامل

لكن منطقك كويس في الموضوع
وفعلا مصنع الجزمة مطلوب منه طلبيات اكتر من اللي بيعملها في سنتين

حظوظ
تحياتي

Mina يقول...

كوشيا
انت معاكي حق الطرف التاني مايستاهلش اي رقي
بس احنا نستاهل نتعامل برقي افضل من كدة
والدليل هاقولك مثل

لو كلب عضني تفتكري علشان اخد حقي منه اروح اعضه؟؟؟؟

برضو هارجع تاني واقول اللي عمله منتظر من حقه وهو لو غلط فده مسموحله
الغلط في اللي احنا عملناه مش فيه هو
تحياتي ياكوشيا

ليـــالي يقول...

انا بعد ما قريت البوست هنا وقريتها عند عقل مهوي وشوفت قد ايه انت متمسك برأيك واصلا ماشاء الله اسلوبك في الاقناع عالي اووي .. اقدر اقولك انت في رأيك معاك حق

بس مع تعديل او تقدر تقول ايضاح بسيط ..وهو ان احنا مغلطناش لما فرحنا بـ منتظر وبالجزمة

هاتقوللي ازاي ؟
هاقولك هاتلي البديل ؟؟!!!!

فيه بديل للي عمله منتظر ده يخلينا نفش غلنا ونفرح بأننا خدنا ولو جزء من حقنا ؟؟

بوش بقاله قد ايه عمال يقتل ويدبح في العرب ؟؟؟
بقاله قد ايه دايس فوق راسنا ومورينا الويل ؟؟

اينعم احنا كمصريين الحمدلله لحد دلوقتي بعيد عن موضوع القتل ده
بس انت شخصيا بوش ده حرق دمك قد ايه وجابلك ارق واتنكدت عليك عيشتك في يوم بصيت فيه علي شريط الاخبار - بس وهو بيعدي تحت .. مش هاقولك النشرة - كاااام مرة ؟؟

طب هاااه ؟؟ قوللي ؟؟ عملت ايه ؟؟
قصدي يعني خدت حقك ؟؟ طب خدته ازاي ؟؟؟

طبعا محصلش .. ومش لوحدك كلنا هذا الرجل اللي جاب اخره من بوش ومش عارف يعمل ايه عشان مفيش في ايده حاجة يعملها اصلاااااااا !!!!

بعدين الموضوع بالنسبة للكل .. كل اللي كتبوا وألفوا قصص علي بطولة المنتظر ..وحتي اللي عملوا الالعاب الفلاش بتاعة مين يضرب بوش بالجزمة اكتر .

الموضوع مع كل دول مش موضوع جزمة وبس

الموضوع موضوع فعل

حد اهو قدر يعمل حاجة مننا قدام بوش
حد قدر يفتح بوءه
حد قدر يعترض
حد قدر يشتمه في وشه

واراهنك .. انت نفسك لو كنت في نفس ظروف منتظر كعراقي ..وكمان سوابق سجن بالظلم ...و جتلك الفرصة ..كنت هاتعمل كده واكتر من كده كمان يا منامينو

وبما اننا كلنا لو كنا مكان منتظر كنا نتمني نعمل كده
يبقي لينا الحق اننا نفرح ونهلل
نشكره انه عمل اللي كان نفسنا كلنا نعمله

طريقه همجية سوقية ..مهلبية بقي مفرقتش

المهم .. انه عمل كده !!! :)

كل المشكلة .. انه مالقاش وسيلة يقدر يعبر بيها عن غيظه غير (((الجزمة))))

فبقت هي الجزمة :D
هي الشعار والرمز والاتجاه والتعامل وكله كله

فصدقني كلنا معزورين اننا نفرح بيه شوية ونهدي حبتين من جوا .. وما يمعنش لو دلعنا الجزمة كمان :D
---------------
انما بقي لحتة ان الجزمة تتباع بالملايين واننا نعتبر ان خلاص كده بوش خد جزاءه وخلصت الحكاية او اننا نفضل نقول ونزيد ونعيد في الجزمة لحد اما يبقي سلوك عام مش فردي قدام الكبار والصغار فده انا معاك في رأيك فيه كله


وووبس علي كده :)

Mina يقول...

ليالي
رأيك انت لخصتيه في اخر جملتين
وانا معاكي في كل اللي قلتيه ومش شايف انك بتعترضي علي كلامي ولا حاجة
لاني انا فعلا معاكي
وانا اول واحد فرحت باللي حصل لبوش
مش معني كلامي اللي قلته اني زعلت علس بوش ولا ماكنتش اتمني اكون انا منتظر
بالعكس كلنا اتمنينا في لحظة اننا نكون مكانه

بس لما يبقي مالناش كلام الا اللي حصل
وكلنا نقعد نهيص ونهلل ونعمل منه بطل
لما مجرد الفرحة تطلع وتبقي ثورة جزمية
هنا نبقي بنغلط
انا قلت انه حتي لو كنت انا شايف ان منتظر غلط فهو من حقه جدا انه يغلط

لكن الغلط الحقيقي فينا احنا
من حقنا اننا نفرح
بس التعبير عن الفرح ليه اصوله
اللي عملناه هو اللي انت لخصتيه في الاخر
اننا هيجنا وهيصنا وفرحنا ونزلنا علي ماتفيش
تعالي دلوقتي شوفي اصلا كام واحد فاكر اللي حصل
شوفي كام واحد بيتكلم عن الموضوع ولا عن بوش ولا غيره
خلاص الموضوع انتهي
هي دي بلادنا وشعبنا
نهيص نهيص وننزل علي مافيش

كل اللس استفدناه من اللي حصل ان سعر الجزمة ماعرفش بقي بكام
وكمان المصنع اللي اتعملت فيه الجزمة دي زي ماقالتلي كوشيا انطلب منه طلبيات ما انطلبتش في السنتين اللي فاتوا
وحاجة تانية مهمة استفدناها
ان الفعل ده اترسب في عقول الاطفال اللي ربنا يستر عليهم بعد كدة
بس بجد مبسوط قوي من زيارتك واسلوبك الشيق في التعليق وكمان في الاقناع
تحياتي ياليالي

غير معرف يقول...

عم مينو

طبعا انا متفقه معاك في كل اللي قلته

انا مش شايفه اي فايدة من كل ده

زي نظام المظاهرات .. والهتافات .. ويحرقوا العلم ويرقصوا

وفي المقابل بيتحرق بشر وناس

احنا شعب جعجاع لا اكثر ولا اقل

Mina يقول...

جومانا حمدي
اديكي جبتي البقين اللي فيهم الفايدة
احنا شعب جعجاع علي الفاضي
يالله ربنا يسترها علينا بقي وخلاص
تحياتي وباشكرك عليالمرور