الثلاثاء، 30 سبتمبر، 2008

وتتوالي الخصومات

طبعا فاكرين الخصم الاخراني بتاع قانون المرور الجديد واكيد فاكرين اني ساعتها قلتلكم اكيد مش هاتأخر عليكم في الخصم الجديد وقد كان
ما عداش اسبوعين وجيتلكم بخصم جديد
بس المرة دي مش بسبب اي قوانين موضوعة (يعني لا قانون مرور ولا قانون ايجار ولا اي قوانين من دي)
المرة دي كان بسبب قانون الطبيعة (قوانين الطبيعة اللي هي زي قانون الجاذبية كدة وخدوا بالكم فيه فرق بين قانون الجاذبية بتاع اكس ولوكس وقانون الجاذبية بتاع عمنا نيوتن)
برضو مش ده موضوعنا ولا دي قوانينا اللي انا قصدي عليها
القانون المرة دي كان قانون مختلف تماما
بص ياسيدي انا هاحكي الموقف وانتوا احكموا بنفسكم
ركبنا الميكروباظ اللي باركبه كل اسبوع (يارب توب عليا بقي) والناس كلها ركبت والعربية حملت وماكانش فيه فاضي غير مكان واحد والراجل راح قافل الباب وقال ده محجوز
طيب ياعم محجوز لمين قال لصاحب العربية جاي دلوقتي
ماشي نستني الباشا صاحب العربية وفضلنا نستني نستني لحد ما الصبر طال علي راي ام كلثوم
بعد حوالي نص ساعة افتكرنا اننا المفروض نمشي (احنا كنا نسينا اصلا ان الميكروباظ بيمشي)
المهم الناس هاجت علي السواق يالله ياعم يالله ياعم والراجل في الاخر طلع زوق وراح ماشي
مشينا حوالي ربع ساعة والسواق جاله تليفون من صاحب العربية المزعوم يقوله انت فين (صاحب العربية اياه كان بيبعت رسالة كلمني شكرا والسواق هو اللي يتصل) السواق قاله انا طلعت من بدري وقربت علي قويسنا (انا باركب من طنطا للي مايعرفش وقويسنا دي بينها وبين طنطا حوالي 20 كيلو)
طبعا صاحب العربية راسه والف جزمة قديمة ان السواق يرجع علشان ياخده من الموقف
-- ياعم انت اللي اتأخرت والناس هاجت وماقدرتش استني اكتر من كدة وكل لما اكلمك الاقي تليفونك مقفول (ده كلام السواق)
-- ................................ كلام ماسمعناهوش بس لاحظنا رد فعله علي وش السواق (واضح انه كان من قبيل يابن تييييييييت)
وفضلنا من قويسنا لحد بنها (حوالي 20 كيلو كمان) علي هذا المنوال صاحب العربية يبعت كلمني شكرا والسواق يتصل يتهزق ويقفل ويشتم في سره والركاب يتريقوا علي السواق اللي خايف وعايز يرجع (بس علي مييييين ده كان اتقطع لو فكر يرجع)
كل ده مافيهوش مشكلة طالما اننا مش متعطلين والسواق زوق وماشي
المشكلة فين بقي
لما صاحب العربية وصل لحل جهنمي وعبقري انه هايركب عربية تانية من الموقف رايحى مصر (يااااااااه بصراحة الراجل تعب جدا في التفكير لحد ماوصل للحل العبقري ده )
بس فين المشكلة بقي اننا هانستناه في بنها لحد ما العربية اللي راكبها سيادته تعدي علينا علشان السواق الغلبان ( اللي احنا راكبين معاه) يدفع الاجرة بتاع سيادته للسواق ( اللي هو راكب معاه)
حد فاهم حاجة ؟
اقول تاني
احنا هانقف في بنها نستني الباشا اللي لسة طالع من طنطا في ميكروباظ تاني (يعني هانستني اكتر من 45 دقيقة)
ليه بقي ؟؟؟؟!!!!!!!!!
علشان الباشا والله اعلم مافيش في جيبه 7 جنيه يدفعها اجرة لميكروباظ اللي هو راكبه
وطبعا ماكانش فيه حل تاني قدام السواق الغلبان الا انه يستني الباشا والا كان هايقطع عيشه
وبائت كل محاولاتنا لثني السواق عن عزمه بالفشل
لا تهديد نفع معاه ولا وعيد ولا استرحام الناس (وخصوصا الستات ) لقلبه المسكين علشان يودينا مصالحنا
ياجماعة اللي عايز ينزل يتفضل ينزل انا لازم استناه هنا
والي هنا انتهت المشكلة وانتهي الكلام وادرك شهرزاد الصباح

ملحوظة مهمة جداااااااااااااااا

الباشا ماطلعش صاحب العربية ولا حاجة
الباشا طلع امين شرطة قد الدنيا (اوعدنا ياااااااااااااااااارب)



الاثنين، 15 سبتمبر، 2008

قانون الوقوف الجديد

بقالي كام يوم عمال اسمع عن قانون (عدم ) المرور الجديد وبما اني ماعنديش عربية فمش متابع القانون قوي عادي يعني من مبدأ طالما الضرب بعيد عن قفايا يبقي ماليش دعوة
واتطبق القانون الجديد يوم الجمعة اللي كان اجازة والناس نزلت شغلها يوم السبت وتقف تستني اي حاجة توديك اي حتة مافيش
اي سواق اول مايسمع كلمة (مصر يا اسطي ) ياخد ديله في سنانه ويطلع جري
وبعدين ياجماعة الساعة بقت 10 والناس الي اتجمعت في الموقف يملوا عبارتين من بتوع ممدوح سالم
المهم بعد ساعتين قدرنا بالجهود الذاتية نوقف ميكروباص بالعافية وفتحناه عنوة وانتشينا بفرحة الفتح العظيم للميكروباص وركبنا في الميكروباص حوالي 30 بني ادم من مختلف الاحجام
واطلع ياسطي وصاحبنا قال اطلع فين ياجماعة انا مش باحمل اصلا
يانهار ابوك مش باينله لون بعد كل اللي عملناه ده تقول مش باحمل لا مافيش حاجة اسمها مش بتحمل هاتطلع يعني هاتطلع وادينا قاعدين ان شالله لبكرة
المهم قعدنا علي الحال ده اكتر من نص ساعة السواق يقول مش طالع واحنا نقول مش نازلين وافي الاخر السواق الغلبان رضخ للامر الواقع وطلع بينا علي مصر (ام الدنيا ) واحنا بقي هيصنا وفضلنا نسقف ونحيي عم السواق الهمام الشجاع البطل المغوار اللي هايودينا مصر ويخترق صفوف الاعداء
ويافرحة ماتمت اخدها النسر وطار احنا يادوب وصلنا بنها ولقينا الدنيا زحمة والطريق واقف ياجماعة فيه ايه قالوا فيه لجنة علي الطريق يادي النيلة هي ناقصة كمان لجنة طبعا عم السواق المغوار ركبه خبطت في بعضها علشان ال30 نفر اللي راكبين ورا وماعرفش يعمل ايه وطبعا لو قال لاي واحد فينا انزل هاينط في كرشه
فين وفيييييين بعد ييجي ساعة ونص وصلنا للجنة ولقينا طابور طوييييييييييل من العربيات اللي راكنة جنب اللجنة دخل عم السواق والظبوطة (برتبة رائد) بصله بصة غريبة وكانه بيقوله ايه اللي انت مهببه ده يابن الهبلة وراح مشاورله علي اخر صف العربيات اللي راكنه من غير مايتكلم
طبعا السواق فهم اللي فيها وراح راكن ورا العربيات واحنا نزلنا يهديك ياعم الظابط يرضيك ياعم الظابط ده احنا ورانا مصالح ومافيش حاجة تانية ممكن تودينا شغلنا مافيش فايدة كاننا بندن في مالطة
طبعا احنا زي الهطل فاكرينه موقفنا علشان العدد الزيادة
اتاري الفولة ومافيها ان الست اللي راكبة جنب صاحبنا السواق كانت من الحجم التقيل شوية والحزام ماكانش مقاسها فراحت رامياه والسواق ما اخدتش باله
وخلص اليوم واحنا في الطريق وكل واحد اتشعبط في مواصلة تانية بمعرفته علشان يلحق يمضي علي امر الخصم بتاع اليوم اللي ضاع منه قبل دفتر الخصومات ما يترفع
وربنا يسترها علينا وكل قانون وانتم طيبين
واستنونا في الخصم اللي جاي ان شاء الله مش هانتأخر عليكم

الخميس، 4 سبتمبر، 2008

اخ يابنت الكلب

ما اتعودتش احط في المدونة كلام مش بتاعي بس بصراحة البوست ده ماينفعش ما احطوش هنا

قريته عند الزميلة "نسرين " في مدونة (اسكندرية اذكريني) وباستأذن منها انا تسمحلي احط البوست ده هنا ودي اول مرة اعملها لانه بصراحة كل كلمة فيه كان نفسي اقولها من زمان

هاسيبكم مع البوست



كنا معاً فى الجامعه نعيش معا يوما بيوم لاربع سنوات كامله
اتابع معها سطرا بسطر قصه حبها من"الحلو الاسمر"كما كنت اسميه انا
كانت تجربتهم جزء منى ربما لانى عاطفيه اكثر من اللزوم ولانى كنت احبها واحبه واحب ما بينهما
تحكي لي سرا عن حياتهم الخاصه ويخبرني هو سراً عن خطته لما بعد التخرج لتحقيق المستحيل والزواج منها"اول خطوه الشقه ولازم يا نسرين اخد كورس ال سي دي ال ولازم اتعلم لغه تانيه ولازم 0000و و و و و "
كان طموح جدا مفعم بالحلم والحياه والحب
افكر فى نفسي ان لديهم كل ما يهم فى هذه الحياه وان لا عائق امام حبهم سوي ان يموت احدهما
قبل ان اترك مصر حضرت خطوبتها-لغيره-كانت تبكي على كتفي وتؤكد انها ستترك خطيبها "اول ما تمسك عليه غلطه"وانه لن يلمسها ولن يري منها سوي القسوه-والجلاخه والغتاته-حتى يتركها-يطفش-لتعود الى حبيبها الذي وبدوره تمسك بها ولم يتركها
وجاب الشقه والتى كان يعدها اول خطوه
وسافرت وبالتدريج انقطعت اخبارهماسمعت انها تزوجت
تذكرت دموعها ودعوت لها ان يصبرها الله على ما ابتيلت به تذكرت كرهها لخطيبها الثري الذي يكبرها ب15سنهبالامس وجدتها على الاميل-الله يخرب بيت الماسنجر-لم اصدق عيني فانا وهى لم نتحدث منذ اكثر من 10شهور لا موبايلات ولا اميلات ولا اي شئ
تحدثنا قليلا عني-قليلا جدا-ثم سألتها بحزن-وقلبي كان واجعنى والله العظيم-عن زواجها وما تشعر به الان-والله يخرب بيت مامتك اللى كانت السبب ويخرب بيت ابوكي اللى معندوش شخصيه قدام امك وقعدت البخ فى الكلام وانا محموقه اوى-
لتسارع فى مقاطعتى وتحدثني عن رحله شهر العسل وغرفه الفندق الفاخره والبوفيه المفتوح والكافيار والجمبري الجامبو-يا بت المحرومه-والبيت الجديد والاثاث الفخم والهدايا الثمينه والمويايل الجديد وعائله الزوج المحترمه-عشان معاهم فلوس بقو محترمين-
راحت دموع الحب وسهر الليالي واغاني عمرو دياب ومش حاتنازل عنك ابدا-
نظرت الى كتفي الذي تبلل بدموع الحب يوما ما وشعرت بغثيان-والله العظيم معدتى وجعانى لغايه دلوقتى-
وبدأت تشكو لي من اخوها وزوجته واولاده اللى كل يوم بيزوروها وفاضحينها قدام زوجها المحترم
وتشكو من احساسها بالضيق من زياره صديقه مشتركه بيننا من اصدقاء الجامعه والتى وبدون شك تحقد عليها لانها تزوجت وهى عانس-يا بنت الكلب ديه فى نفس سنى يعني انا عانس وغيرانه منك-وانها-الصديقه-اصبحت لا تناسبها فهي تسكن فى حي غير راقي وليس لديها سياره ولا لدي والديها سياره وترتدي ملابس رديئه ومش سينيه
احيه
لا اعرف كيف حضرتني سرعه البديهه لارد عليها"وفيها ايه يا نونه يعني ما انا كنت مصحباكي مع ان انا ابويا وامي عندهم عربيات وانتم مكانش حيلتكم حاجه ده غير اننا ساكنين فى منطقه راقيه وانتى قبل ما تتجوزي كنتى مع اهلك فى العشوائيات نياهاهاهاهاهاهاهاهاهاهاها"
لتسارع بنت الكلب فى الرد عليا"اه على فكره بابا وماما طالعين عمره رمضان انتى باباكي ومامتك لسه متطلقين يا نسرين"A seven A
الدروس المستفاده
_ان انا كنت مصاحبه بنت كلب طبقيه واطيه_
ان عمرو الدياب كداب ابن كلب هو كمان
_ان البنات بيفكرو باسلوب غريب جدا مش قادره افهمه ولا اوصله
_ان الزهايمر متفشي
_انى لازم انضف الليست بتاعه الماسنجر اول باول عشان مينوطليش حد من الماضي يعكنن عليا حياتي اكتر ما هى متعكننه
_ان فيه ناس كتير شايفين ان انا عانس
_ان موقفي من الحب والزواج موقف شاذ جدا وان العيب فيا مش فى البنات التانيه لان كلهم بيعملو زى بنت الكلب اللى فوق ديه وانا بس اللى عايشه الوهم
_ان اللى يبقي واطي مع حبيبه اكيد يبقي واطي مع اهله اكيد اوطي مع اصحابه اكيد مالوش خير فى اى حد ولا اى حاجه ولا عنده مبدأ خالص
_ان علاقات الصداقه فى الكليه مش بتظهر اى حد على حقيقته والحقيقه بتظهر بعد التخرج وخوض كل منا فى الحياه وعلى ارض الواقع
_انى مش قادره اتعامل مع اللغه العربيه محاولاتى الكتابه باللغه العربيه هى قمه جبل الفشل ولازم اخدلى كورسين تلاته عند بنت القمر"امانى خليل