الأربعاء، 31 ديسمبر، 2008

حب وراح



عارفة ؟؟؟!!!
زمان لما كنت باشوفك !!!
كنت باحس الدنيا خلاص فتحت لي ايديها
واجري عليكي
تاخديني في حضن عنيكي
وارتاح
واشكيلك همي
وف جرحي تلمي
وتضمي
وفي حضنك
كنت باحس الدنيا براح
وفي لحظة
كل الحب ده راح

الأحد، 28 ديسمبر، 2008

الارتباط الشرطي



عمنا الكبير سيجموند فرويد عمل تجربة زمان علي كلب
وهي انه جاب كلب وقعد يعزف موسيقي وبعد اداله حتة عضمة فطبعا الكلب ريل (الله يقرفه ) علي حتة العضمة
تاني يوم عمل نفس الموقف ده مع نفس الكلب عزفله موسيقي وجايله عضمه فريل عليها
تالت يوم بقي سمعه مزيكة بس فالكلب ريل لوحده من غير مايشوف العضمة
عمنا فرويد سمي الموقف ده بالارباط الشرطي يعني ان الواحد ( او اي كائن حي) يربط فع معين بفعل تاني

ايه بقي لازمة الحوار ده كله
هاقولكم ماتستعجلوش


من زماااان كدة كان عندي برد ومش لاقي حاجة اعملها فجاوبت تاج كان عندي من زمان ومش لاقي وقت اجاوبه
ومن ساعتها وانا عندي تاجات كتيرة ومش لاقي وقت اجاوبها
ويوم ماقررت اني اجاوب شوية منهم جالي برد
بالظبط زي الكلب اللي ريل علي المزيكا من غير مايشوف العضمة


المهم ماعلينا وعلي راي المثل مابيقول ان كان لك عند الكلب عضمة قولي ياسيدي
بص ياسيدي


ندخل بقي علي التاجات
اول تاج جالي من صديقتين عزيزتين هم

مها زين صاحبة مدونة انها الحياه
وكوشيا صاحبة مدونة قصاقيص

نيجي بقي للتاج

س1
لو كان ينفع تختار عصر تعيش فيه هيبقى انهى؟ ومين الحاكم؟


طبعا طبعا كنت هاختار عصر السلحوقيين الكبار اللي هو قبل السلحوقيين الصغيرين ده عليطول علي ايدك الشمال وانت داخل من ناحية عصر المماليك

الحاكم بقي يبقي اي حد اهلاوي ممكن يكون ابو تريكة او جوزيه اي حد المهم يكون لونه احمر

س2 : أول اولويه فى حياتى ...عيلتى ..شغلى ...أصحابى؟

طيب مافيش اختيارات؟ علي العموم هو اول اولوية في حياتي طبعا طبعا المانجة لاني بحبها جداااااااا وتأتي بعدها في المرتبة التانية عليطول الشوكولاتة بعد كدة بقي اي حاجة تانية مش مهم

س3 إيه اكتر حاجه بتحبها فى رمضان؟

بصراحة بصراحة اكتر حاجة بحبها في رمضان الفانوس ابو شمعة اللي لحد دلوقتي مابيعديش رمضان الا لما اجيب فانوس بشمعة وطبعا مش باولعه علشان الشمعة ماتخلصش

س4 اوصف أجمل فطار ممكن تفطره؟

يكون مع حد بحبه ان شالله يكون الفطار ده عيش حاف

س5 لو انت حاكم هتكون عادل ؟ وهتعرف ازاى؟

طبعا مش هاكون عادل خالص اطلاقا ابدا وابقي عادل ليه انا اسمي منامينو واللي يجولي ياعادل اخزج عينيه

وكلمة في ودنك مافيش حاكم عادل اصلا العدل ده مسألة نسبية والعدل من وجهة نظري ممكن يكون منتهي الظلم من وجهة نظرك انت العدل المطلق لربنا وحده

س6
مين أكتر اعلامى بتحبه؟

ياسمين عبد العزيز في الاعلامات بتاعة المصاصة بتاعة زمان دي (الناس زمان كانت بتقول عليها اعلانات هههههههههههه معلش بقي جهل اعلامي )

س7 لو ممكن شغلانه تانيه تختار ايه؟

ولو اني جاوبت علي السؤال ده مرة قبل كدة في التاج اللي فات بس بعد اللي شفته بيحصل في الحرامية الغلبانين اللي مالهومش حد في الداخلية عدلت عن الموضوع ده
بس لو ممكن اشتغل شغلانة تانية فممكن تكون ريس علي فلوكة في وسط النيل علشان اغلس علي الحبيبة اللي هايركبوا معايا واغرق هدومهم ماياه

س8 تانى بلد تحب تعيش فيه بعد مصر ؟


مصر وبعد كدة مصر وبعدين مصر وبعدها مصر وفي الاخر خالص بقي لو داقت بيا الدنيا تبقي مصر
بالرغم من كل اللي فيها وكل اللي باشوفه فيها بس برضو بحبها بحبها يانااااس بنت ال.......

س9 اوصف ترتيبات أجمل فرح ممكن تحضره؟

فرح اتنين بيحبوا بعض

س10 بتراعى كلام الناس والقيل والقال؟ وليه؟

زمان كنت باراعي كلام الناس لما كنت فاضي (كانت الست ام سوسو جارتنا تجيبلي كلامها وتقولي راعيه وخد بالك منه علي ما ارجع من السوق) بس دلوقتي بقي ماعدتش فاضي اراعي نفسي حتي

اما بقي القيل والقال فده اصلا اصلا قليل الادب ومش متربي ومايستاهلش حد يعبره ولا يراعيه وخليه كدة مرمي في الشارع ان شالله يوعده بسواق اتوبيس اعمي ياخده بالحضن يارب

س11 صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟

انا بحب الحمار اكتر من الحصان (علشان المرة الوحيدة اللي ركبت فيها حصان كان حصان جربان في الهرم وطبعا دي خبرة سيئة جدا لاي واحد عايز يتعرف علي الحصنة )

اما بالنسبة للكمبيوتر فانا طبعا هافرح جدااااااااااا لو صحيت من النوم لقيته اختفي (خصوصا الكمبيوتر بتاع الشركة اللي انا شغال فيها )لاني ساعتها بقي هاقعد فاضي من غير شغل لحد مايشتروا كمبيوتر جديد


س12 السعاده هى ؟

اني اعيش وسط جنينة مانجة وابني وسطها مصنع شوكولاتة وافتح وسطها حضانة علشان بحب الاطفال جداااااااا (بس اهم شرط في الاطفال دول مايكونوش بيحبوا الشوكولاتة ولا المانجة)

س13 : عندك أمل؟ واسبابك؟

لا الحقيقة لسة ربنا مارزقنيش لا امل ولا حتي عبير بس ربنا يسهل اديني بادور علي امهم الاول وبعدين هم ييجوا براحتهم بقي

س14 لما بتحب تهرب من كل حاجه بتروح فين ؟

باروح اي حتة زحمة
(حتة عقل كدة في ودنك ) اللي بيهرب من المشاكل مايقعدش مع نفسه لان كل المشاكل بتبقي طالعة من جواك لما تروح تقعد مع نفسك لوحدك في حتة هادية انت بكدة بترمي نفسك وسط المشاكل لكن لو عايز بجد تنسي مشاكلك روح حتة زحمة وهيصة والعب كورة واركب مراجيح ونط في الهوا وامشي علي دماغك

س15 امتى أول مره أخدت فيها نفس وقلت ياااااااه أنا كبرت؟

لما باشوف ولاد اصحابي بيلعبوا حوالينا في اي خروجة من خروجات زمان

س16 بتشرب سجاير ولا لا؟ وايه رأيك فى الرجاله والستات اللى بتشرب؟

لا الحقيقة انا اخر مرة افتكر اني شربت حاجة كانت شاي وقعدت بتاع 3 ايام مش عارف انام بسببه ومن يومها حرمت اشرب اي حاجة غير اني اشرب من كيعاني

وبالنسبة للرجالة والستات اللي بيشربوا سجاير فانا بانصح كل شاب وكل فتاه بان الجريمة لاتفيد ومن قدم شيء بيداه التقاه ويانمنع الكباري يانوفر الكلة

س17 بتعرف ايدك الشمال ازاى؟

باشوف ايدي اليمين فين وتبقي التانية هي الشمال (اللي عنده اكتر من ايدين هاتبقي مشكلة بالنسبة ليه الحقيقة)

س18 اكتر اله موسيقيه بتحبها؟

زمان كنت باحب الفلوت بس دلوقتي بقيت مدمن كلاكسات عربيات

س19 : ليه الذوق والنخوه اتعدموا؟

اكيد عملوا حاجة وحشة فاتعدموا بسببها ماهو يعني القانون مابيحميش مغفلين
وبعدين ياجماعة لسة في نقض واستئناف ولو شوفنالهم محامي كبير ممكن يطلعهم منها زي السكينة في الحلاوة

س20 ايه الحاجه اللى لو حصلت هبقى سعيد ؟

ياجماعة ولله العظيم انا منامينو ومش عاوز اغير اسمي ليه بقي مصرين اني اغير اسمي وبعدين انا مابحبش سعيد اصلا (مع كل احترامي لاصحابي اللي اسمهم سعيد يعني)

س21 تحب أرض زراعيه ولا اجنس عربيات ولا كام عماره ولا فلوس فى البنك؟

مع اني مهندس معماري وطبعا اكيد هاتتوقعوا اني اقول كام عمارة انما طبعا انا حب ارض زراعية وازرعها كلها مانجة

س22 : تحب؟ البحر ولا النيل؟
البحر

س23 مركب ولا طياره؟

فلوكة وسط النيل

س24 شخص مجنون ولا عاقل؟

شخص عاقل وانا اللي اجننه علي ايدي

س25 : تقرا كتاب ولا تتفرج على فيلم؟
طبعا طبعا طبعا اقرا كتاب

اهداء التاج
نخلي المرحلة دي لبعد التاج التاني

نيجي بقي للتاج التاني وهو تاج قديم شوية كانت بعتتهولي الصديقة ضد التيار
وعلي رأي البت كيارا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد يا ضد
مع الاحتفاظ بحقوق الملكية الفكرية طبعا
المهم ندخل بقي علي التاج

أذكـــــــــر ستة أسرار قد لا يكتشفها من يقابلك لأول مره!!!

اني عندي 27 سنة ودي حاجة فعلا اللي يشوفني اول مرة هايتفاجأ لما يعرفها لان اكبر واحد اداني سن وطلع قريب من سني كان 17 سنة


ان مناخيري كبيرة شوية اكبر من الطبيعي بس النظارة مدارياها بس اللي يدقق هاياخد باله

اني الدغ في حرف ال (س) وبانطقه (ث) بس برضو مابتبانش الا للي يدقق معايا في الكلام

اني نكدي ورزل وغلس ودمي تقيل بس اللي بيشوفني لاول مرة ممكن يفتكر غير كدة

اني بخيل

اني انطوائي جدااااااااا

اني ذاكرتي قوية جداااااااااااااااااااااا

سبع حاجات نفسك تعملهم!!!!

1- اتعلم الشتيمة اللي بجد علشان لما اتضايق من حد اشتمه بجد من غير مايتريق عليا
2- اشتري اتوبيس ويكون الباب بتاعه واسع وكبير علشان اعرف اتشعبط فيه براحتي (ومش هاخلي حد يتشعبط غيري)
3- اتخن ولو 2 كيلو بس علشان الاقي هدوم مقاسي
4-اتعلم الطبيخ
5- اخف من البرد العجيب ده
6- اتجوز بقي
7- الاقي وقت (ما اكونش مكسل فيه) اعمل النظارة اللي عملت الكشف بتاعها بقالي اسبوعين

سبع حاجات معرفتش تعملهم!!!!

اسوق عربية
اركب الصاروخ في الملاهي
اعمل بوفتيك
اروح الشغل مرة واحدة في ميعادي
اكل مرتين في يوم واحد
اكره حد بيكرهني
انسي اصحابي القدام

سبع حاجات دايما بتقولهم !!!؟

يارااااااااااجل
لا ياشيخ
يالله في داهية
عااااااااااادي
يالله غور بقي خليني انام
بس خلاص

سبع مشكلات فى حياتك ممكن تحلهم بالفلوس!!!

كل المشاكل اللي في الدنيا اساسها الفلوس وفي نفس الوقت مافيش مشكلة في الدنيا ممكن تتحل بالفلوس
بس لو علي المشاكل فانا باكسل افكر فيها لانها كتير والتفكير فيها مش هايحلها فتقدر تقول ماعنديش مشاكل غير اني عايز اشتري لبس العيد
بس

سبع أماكن بتحبها!!!!!

حضن امي
السرير
الكنبة اللي قدام التليفزيون في بيتنا بس لما يكون التليفزيون مقفول
بلكونة بيتنا لما كانت مليانة زرع والعيال اخواتي سابوه يموت لما انا بقيت باسافر
اي حتة ممكن يتلم فيها الناس اللي بحبهم
كلية هندسة طنطا لما كانت لوحدها قبل ماينقلوا جنبها اداب وحقوق وتربية


سبع أشخاص بحبهم غير بابا وماما واخواتى!!!

سنو هوايت
توم وجيري
مازنجر
سيمبا
اصحابي كلهم

سبع حاجات بتحبهم قوى!!!!

المانجة
الشوكولاتة
المطرة خصوصا وانا لابس نص كم
بطانية في عز البرد
دش ساقع ساعة عصاري في شهر اغسطس وكباية نيسكافية ووقفة في البلكونة واقزقز لب وارمي القشر علي اللي ماشيين تحت ويبصوا فوق يلاقوني يقولولي مساء الفل ياجميل (من غير شتيمة تفتكروا ده ممكن يحصل؟)يالله ممكن برضو

سبع مدونات بتحب تقرالهم!!!!

لا دول كتير قوي بس اولهم المدونات اللي عندي في اليمين علي الجنب بس فيه غيرهم كتير مكسل احطهم يعني مش اكتر

اهدى التاج لمين بقى؟

دول بقي تاجين هاهديهم لكل اللي يدخل هنا ويقراهم واللي جاوب واحد منهم يجاوب التاني ومنهم طبعاااااااا

كوشيا ............. مدونة قصاقيص

مها زين .........مدونة انها الحياه

ضد التيار ............مدونة ضد التيار

طبعا دول هم اللي اهدولي التاج اصلا بس كل واحدة فيهم اداتني تاج واحد تيجي بقي تاخد التاني
نيجي بقي للناس التانيين

عقل مهوي ............مدونة غمض عينك تعيش مبسوط

مها العباسي .................مدونة لافندر

انا ودماغي .............مدونة انا ودماغي

محاسن صابر ...................مدونة عايزة اتطلق

اسماء عواد.................مدونة باب الشمس

كيارا ...................مدونة عالم مولان

ماي ..................مدونة قصاقيص مشاعر

نور ..................مدونة كلمات الصمت

الجمعة، 26 ديسمبر، 2008

المؤامرة الصينية في العملية الحذائية



مش من عادتي اوجع دماغ الناس بحاجات تقيلة
يعني علي رأي المثل مابيقول خليك خفيف خفيف ياجدع
وكمان من عادتي اني مش باحب الزحمة ولا التهليل
يعني اول لما حاجة بتحصل بتلاقي الدنيا قامت وماقعدتش والكل بيتكلم اللي ليه فيها واللي مالهوش ماهو لازم يتكلم يعني امال الناس تقول عليه لامؤاخدة مابيعرفش (يتكلم يعني)
علشان كدة استنيت لما لاهوجة خلصت والمولد انفض وقولت اقول رأيي اشمعني انا يعني
ممكن رأيي ده مايعجبش ناس كتير
والغالب انه مش هايعجب معظم الناس (اللي ممكن يسعدهم حظهم ويقوره يعني) بس برضو هاقوله ورزقي علي الله

واحد ضرب واحد بالجزمة

انا مالي ؟؟؟؟؟؟؟؟؟؟

مالك ؟؟؟ يانهار اسود انت مش عارف اللي انضرب ده يبقي مين

ياعم يبقي اللي يبقي طالما الضرب بعيد عن قفايا انا مااااااااالي

انت شكلك مش عايش في الدنيا
دي الناس كلها مالهاش سيرة الا اللي حصل

بص ياسيدي هاقولك حاجة
الفعل بياخد اهميته من المفعول به
يعني مثلا لو واحد ماشي في الشارع وضرب كلب بطوبة تفتكر ده هايكون حاجة مهمة ؟

اكيد لا

طيب لو نفس الشخص ده ماشي في نفس الشارع وبنفس الطوبة ضرب المحافظ ولا وزير ولا رئيس الجمهورية

طبعا هايكون خبر مهم والناس كلها هاتتكلم عنه

طيب منتظر (ولا ايا كان اسمه ) ضرب بوش بالجزمة ... ايه المشكلة دلوقتي ايه الهليلة اللي الناس عاملاها دي
بوش ده كلب (مع تحفظي علي اللفظ انما اختارته لتوضيح الفكرة لان بوش في الاخر انسان ليه مني احترامه حتي لو الناس كلها اختلفت معاه ) ومنتظر ده واحد عادي ومنتظر ضرب كلب بطوبة او بجزمة او بمدفع رشاش ايه اللي يفرح في كدة ؟

بس بوش ماهواش كلب هو انا معاك انه كلب بس ده مش اي كلب ده كلب سعران كلب متوحش

طيب انا معاك وخليني معاك للاخر
عندنا في بلدنا (اللي هي ميت ابو كبير قوي ) كلب سعران كل يوم ينهش واحد اتنين تلاته هو وظروفه والمتاح قدامه
وماحدش قادر عليه
جه واحد ماشي في الشارع قابله الكلب ده فراح راميه بطوبة كانت في ايده
تفتكر ده حدث مهم قوي؟
لا
الطوبة دي قللت من توحش الكلب؟
لا
بس ممكن في اسوأ الاحتمالات تزيد توحش الكلب وممكن كمان الراجل اللي ضربه مايلمش منه ويبقي راح هدر

بس هو علي الاقل عمل حاجة عبر عن الغضب اللي جواه فش غله يا اخي

حطيت ايدك علي مربط الفرس فش غله
ليه بقي يفش غله هو الغل ده حاجة وحشة خايفين منها قوي ومش طايقينه جوانا
مين قال ان الغل حاجة وحشة بالعكس الغل لما بيزيد ويتراكم ويتوجه ويترابط مع غلي وغلك وغلنا كلنا هايبقي قوة جبارة مافيش كلب في الدنيا يقدر يقف قدامه

الغضب والغل لما نفشه نبقي خسرنا طاقة جوانا وياريت جوانا وبس انما كمان جوا ناس كتير
حتي الناس اللي بتتفرج واللي ماعملتش حاجة هاتحس ساعتها ان بوش ده خلاص كدة خد جزاءه هو وبلده وسياسته
وبدل ماكانوا المفروض يعملوا حاجة توقفه عند حده ارتاحوا وفشوا غلهم ماهو انضرب بالجزمة خلاص بقي هانعمله ايه اكتر من كدة ده صعب علينا والله
والمشكلة ان فيه ناس كبار وكتاب كبار قالوا كدة

تفتكر معايا زمان اول ابراهيم عيسي ما ابتدي يشتم في الريس تفتكر فيه ناس قالوا ايه ساعتها
قالوا ياعم ده تلاقيه قابض منهم علشان يشتمهم علشان يهدي الناس من ناحيتهم
مش هايوصل بيا خيالي طبعا ولا نظرية المؤامرة جوايا لاني اتصور ان منتظر قابض من بوش ولا متفق معاه انه يعمل كدة

و بعدين لما تحب تعمل حاجة اعمل حاجة مفيدة
مش الاسم عمل حاجة
يعني ايه الاسم عمل حاجة هي الحاجات اللي بتتعمل بقت بالاسم ولا المفروض انها تكون بالنتيجة اللي هاتوصلها
تقدر تقولي وصلنا لايه .
تقدر تقولي اخدنا ايه او استفدنا ايه ولا هو استفاد ايه؟
هو الله اعلم بيتعمل فيه ايه دلوقتي
واحنا مافيش حاجة اتغيرت
العراق لسة زي ماهي وفلسطين برضو زي ماهي
لا العراق رجعت اغني دولة في المنطقة ولا فلسطين رجع يرفرف عليها العلم الفلسطيني
ولسة الغاز بيتصدر لاسرائيل ولسة حماس وفتح بيموتوا في بعض ولسة امريكا راكبة علي نفسنا وبتدينا بالامؤاخذة قبل الاكل وبعده

بس الراجل اكيد مافكرش في كل ده الراجل حس بغضب وعبر عنه ببساطة

بص اي فعل مش محسوب بتبقي نهاياته مش محمودة
الراجل حس بغضب وعبر عنه ببساطة.... الكلام ده لما نكون قاعدين بنلعب حوكشة مع بعض
انما دي سياسة دول ده رئيس دولة ودولة عظمي يعني اي فعل مش محسوب هايكون رد الفعل ليه مايعرفوش الا ربنا لوحده
وبعدين كلامي هنا مش عن منتظر
منتظر غلط بس هو انسان ومن حقه جداااااا انه يغلط لان الغلط حق مكفول لكل البشر

الفكرة مش في اللي عمله منتظر ولا غيره الفكرة في الهليلة اللي احنا عملناها
الاشعار نزلت ترف علي جزمة المنتظر والكتاب كتبوا مقالات رنانة توصف وتعبر عن جمال جزمة المنتظر وجمال خطوتها
والمشكلة ان فيه منهم ناس كبار وكتاب محترمين المفروض انهم بيقودوا فكر الناس في البلد
وطلعنا بمظاهرات نتطالب بتحرير المنتظر
خد بالك بقي بعد ماكنا بنطالب بتحرير العراق وفلسطين لا دلوقتي بقينا بنطالب بتحرير المنتظر
يعني شتتنا نفسنا وشتتنا قوتنا وبعد ماكان لينا هدف واضح ومحدد دخلنا نفسنا في اهداف فرعية
لا والانكت بقي ان الجزمة دي بقت بتتباع بملايين
هاسألك سؤال واحد
لما واحد غريب لا يعرفني ولا يعرفك يعرف ان فيه واحد ضربني بالجزمة فانت رحت اشتريت الجزمة دي بكام مليون
تفتكر الراجل ده هايقول ايه عليا وعليك
اكيد هايقول اني باديك بالجزمة كل يوم ومطلع عينك ومسببلك عقدة في حياتك وانت ماصدقت لقيت حاجة تطلع فيها غلك وعقدك وتغيظني بيها وتقولي انا عندي الجزمة اللي انت انضربت بيها
لما واحد يشتري جزمة انضرب بيها عدوه (ايا كان عدوه ده حتي لو الشيطان نفسه ) بكام مليون ونص شعبه بيموت من الجوع
تفتكر ده ينفع يتقال عليه ايه

وبعدين فيه حاجة مهمة قوي ناسينها ومش واخدين بالنا منها
تخيل انت قاعد كدة فرحان ومنشكح قوي باللي عمله المنتظر وعمال تهلل وتقول يحيا البطل يعيش الهمام وقاعد جنبك ابنك الصغير ابو 7 سنين وسألك هو عمل ايه يابابا البطل ده علشان انت فرحان قوي كدة
طبعا هاترد وبكل فخر وتقوله ده ضرب بوش بالجزمة ياحبيبي
هايقولك ليه يابابا ضرب بوش بالجزمة ليه
هاتقوله اصل بوش ده راجل وحش ياحبيبي ويستاهل الضرب بالجزمة وماحدش كان قادر يضربه خالص والبطل ده هو اللي قدر يعملها

تخيل بقي معايا بعد 3 ايام الولد صحي من النوم قبل انت ماتنزل الشغل وقالك بابا ماتنساش تجيبلي شوكولاتة وانت جاي من الشغل النهاردة
وحضرتك طبعا بعد اللي شفته طول اليوم من شحططة في الاوتوبيسات وقرننة المدير بتاعك عليك لا افتكرت الواد ولا حتي ام الواد وماجيبتش الشوكولاته
ودخلت علي ابنك زي الشاطر وسألك فين يابابا الشوكولاته هاتقوله طبعا نسيت ياحبيبي
تفتكر ساعتها هاتبقي انت ايه في نظر ابنك

هاتبقي وحششششششش (وحش بكسر الواو مش الوحش اللي هو اسد ونمر والحاجات دي)

وانت لسة قايله من شوية ان اللي يضرب الوحش بالجزمة يبقي بطل وشجاع والناس تهيصله
تخيل انت بقي ساعتها ابنك هايعمل ايه
انا مش هاقول
قول انت
ولما الموضوع ده يبقي في فكر ابنك وابني وابنه وابنها
ويطلع لنا جيل كامل فاهم ان الوحش بينضرب بالجزمة وان الوحش ده انا اللي باقرر بيني وبين نفسي انه وحش
تفتكر ساعتها هانبقي عاملين ازاي
المستفيد الوحيد من الموضوع ده هو الصين
لاننا ساعتها هانستورد منها جزم بالهبل وشوف بقي ساعتها سعر الجزمة الواحدة هايكون كام

ومن هنا نستنتج وبوضوح جدااااااا ان منتظر اصله صيني (خاصة انه شيوعي )

اقول ايه بس
ربنا يسترها علينا


تحديث مهم جدااااااا

ساعات كتيرة بيكون في اي مقال فكرة محتاجة شوية تفكير من القاريء علشان يفهمها
وانا من انصار الاسلوب ده لان اللي بيقرا لازم يتعب نفسه شوية علشان يفهم اللي ورا المقال والكاتب عايز يقول ايه (يانهار يانهار ده انا بقيت كاتب ياجدعان وباكتب مقالات وحاجت ايه الحوارات اللي باقولها دي هههههههه) المهم
واحد صاحبي قرا الموضوع وقالي اني مش موفق في الموضوع بتاع الاب وابنه ده لانه شايف انه بعيد عن الموضوع
فهمته وجهة نظري في الموضوع ده وهاكتب انا قلتله ايه علشان لو حد ليه نفس رأيه يبقي انا رديت عليه هو كمان


لا

مش بعيد

انا هاقولك قصدي ايه

دلوقتي احنا عاملين هيصة وهليلة علشان واحد ضرب واحد بالجزمة

وبنقول عليه بطل

بغض النظر بقي عن المضروب ده يستاهل ولا مايستاهلش فالاسلوب نفسه ماينفعش

ماينفعش استبدل الجزمة بالفكر

وخصوصا ان اللي ضرب بالجزمة ده اعلامي

يعني المفروض انه بيقود فكر الناس

فلما يستبدل قلمه وعقله وفكره بجزمة

يبقي المفروض ننقده مش نعمل منه بطل

والاطفال بالذات الحاجات دي بتترسب جواهم من غير مايحسوا

انا ماقصدتش بالمثل معناه الحرفي

الواد عمره ماهايقدر يضرب ابوه بالجزمة حتي لو كان شايف انه ابن كلب مش وحش بس

بس في الاخر انا بارسب جوا الواد اخلاقيات سيئة

وهي اني استبدل العنف بدل الفكر

فاهم؟

العنف ده ممكن يكون جزمة بقي ممكن يكون شتيمة

ممكن يكون اي حاجة فيها مظهر للعنف بدل مايفكر ويعبر عن رأيه بطريقة محترمة

الاثنين، 15 ديسمبر، 2008

(ستيك) لعلاج الزعل



اولا انا باشكر كلللللل الناس الحلوين الطيبين الكميلين خالص خالص خالص اللي سألوا عليا في البوست اللي فات لما حسوا اني متضايق شوية
وبما اني الزعل تقيل علي قلبي ومابحبهوش ومابيعمرش معايا كتير فقررت امبارح اني اعمل انتفاضة عليه ويا انا ياهو
فقررت اني اعمل حاجة اطلع فيه طاقاتي المكنونة (دي غير المجنونة ركزوا معايا)

البوست ده ممنوع للي عنده القلب و المرارة والكبد والطحال والضغط والاطفال اقل من 30 سنة واكبر من30 سنة برضو
من الاخر اطلع برة احسنلك قبل ما يجيلك شلل رعاش

المهم ما اطولش عليكم قولوا طول روحت من الشغل فتحت التلاجة لقيت الستيك اللي الست الوالدة ربنا يخليهالي كانت شاحناهولي مع عربية المؤونة الغذائية بتاعة كل اسبوع
قلت خلاص انا هاعمل انتفاضة بالستيك النهاردة
ركزوا معايا بقي شوية علشان هاقولكم علي وصفة هايلة جدااااااااا للستيك بس هي وصفة صعبة شوية وكمان طويلة علشان فيها خطوات كتيرة
فارجوكم جيبوا ورقة وقلم وياريت كاميرا وممكن كمان موبيل وبلاي ستيشن وبيجامتين وجوزين جزمة وكام شراب علشان تكتبوا المقادير علشان ماتتوهوش مني

ندخل بقي علي الوصفة


اولا طلعت الستيك من الفريزر وحطيته في الحوض علشان التلج يفك وبعدين نزلت عند البقال اللي جنبنا اللي مش عارف احفظ اسمه لحد دلوقتي - زهايمر بعيد عن السامعين - وجبت من عنده كيس بريل اللي هو قاهر الدهون ده ورجعت البيت تاني وفتحت الكيس بالسكينة علشان ماعنديش مقص وحطيت تلات ارباعه في طبق بعد ماغسلته وحطيت عليه شوية ماياه وقعدت اقلب فيه لحد ماعمل رغوة كبييييرة كدة واخدت من الرغوة دي شوية علي الاسفنجة بتاعة المطبخ وقلت استعنا علي الشقة بالله
ومسكت الاطباق والحلل اللي كانت في الحوض من قبل اجازة العيد - اي حد هايشتم او يقول معفن او اي الفاظ خارجة هاطرده برة المدونة كلها - وقعدت اغسل الاطباق لحد حيلي ما اتهد - ربنا يكون في عون الستات والعذاب اللي زي حالاتي - وبعدين اخدت القلاية بعد ما اتغسلت وحطيت فيها شوية زيت من القزازة اللي نزلت اشتريتها من البقال - اللي ما اعرفش اسمه - بعد ماخلصت غسيل لاني اكتشفت ان الزيت اللي عندي خلص
وبعدين حطيت القلاية اللي انا لسة حاطط فيها الزيت من شوية علي البوتاجاز ودورت شوية كتير علي الولاعة علشان اولع البوتاجاز لحد مالاقيتها وقعدت اولع فيها كتير لحد ماولعت لانها تقريبا الغاز اللي فيها خلص واخيرا ولعت وبعدين قربتها من البوتاجاز وفتحت الزرار بتاع الغاز بتاع البوتاجاز اللي هو لونه اسود ده - لون المفتاح مش البوتاجاز - الله مش قلت ركزا بقي
المهم البوتاجاز مارضيش يولع
قلت بس تبقي الانبوبة اكيد فضيت - لسة مادخلوش عندنا غاز طبيعي وماحدش يتريق- طيب وبعدين في الورطة دي انا لسة هاستني لما الراجل بتاع الانابيب يعدي واخليه يركبلي انبوبة
طيب انا هافكها واستني لما يعدي اناديله وابقي وفرت شوية وقت
بس انا ماعنديش مفتاح انابيب اعمل ايه اعمل ايه
طلعت خبطت علي اصحاب البيت اللي انا مأجر منهم الشقة اللي قاعد فيها وجيبت منهم مفتاح للانبوبة ونزلت حاولت افكها
وانا بافكها اكتشفت انها كانت مقفولة فتحتها طلعت لسة فيها غاز وانا كنت قافلها قبل ما انزل اجازة العيد ونسيت
المهم قلت كويس خير الحمد لله ارجع بقي تاني للبوفتيك
طبعا البوفتيك كان التلج اللي عليه فك من زماااااااان فقلت ميزة برضو ان الانبوبة كانت فاضية - علي اعتبار ما كان يعني-
ولعت البوتاجاز وحطيت القلاية اللي انا لسة غاسلها من شوية بالبيريل اللي اشتريته من عند البقال - اللي ما اعرفش اسمه - اللي لسة حاطط فيها زيت من القزازة اللي لسة شاريها من شوية من عند نفس البقال - اللي ما اعرفش اسمه - واستنيت شوية لحد ما الزيت ابتدي يبقي صوته عالي في القلاية ورحت شايل حتة بوفتيك وراميها بسرعة بسرعة في القلاية وطلعت اجري علشان الزيت مايلسعنيش
استنيت شوية لحد ما حسيت انها ممكن تكون اتحمرت كويس وبعدين قلت اقلبها علي الناحية التانية
دورت علي شوكة مالقتش اتاري كل الشوك مرمية في الحوض وانا نسيت اغسلها لانها مش باينة من الماياه اللي بصابون اللي مالية الحوض بعد ما الحوض اتسد من بقايا الاكل اللي رميتها فيه مكان الاطباق اللي اتغسلت - ياريت الجماعة بتوع الهندسة الصحية يخترعوا احواض تقدر تستوعب بقايا الاكل امال يعني هانوديها فين - المهم قعدت الغوص شوية في الماياه لحد ماطلعت بشوكة وغسلتها من الرغاوي اللي لسة مالية الطبق اللي حطيت فيه شوية ماياه علي البيريل اللي فضيته من الكيس اللي اشتريته من البقال - اللي ما اعرفش اسمه-
وقلت اقلب بقي حتة البوفتيك اللي في القلاية رايح ناحية القلاية كدة لقيت فيها حتة فحمة ايه ده ايه اللي جاب فحم في القلاية هو انا نسيت احط بوفتيك ولا ايه
طبعا فاهمين اللي حصل
ماكدبتش خبر رحت مطلع الفحمة -البوفتيك سابقا- ومسكتها في الشوكة ووقفت قدامي مشكلة تانية اني عايز اجيب طبق من علي المطبقية من الاطباق اللي لسة غاسلها من شوية وحطيتها علي المطبقية علشان الماياه تتصفي
طيب اجيب طبق ازاي وانا شايل البوفتيك في الشوكة ومادد ايدي علي اخرها علشان ابعد البوفتيك عني -علشان خايف من العدوي ماهو ماحدش يعرف برضو البقرة قبل ماتدبح كان عندها ايه-
المهم رحت رامي الفحمة اللي في ايدي في القلاية تاني ورحت جبت طبق من المطبقية وحطيته علي الرخامة اللي جنب الحوض - اللي نسيت اقولكم اني غسلتها بعد ماخلصت غسيل الاطباق ومش هاقلكم اني غسلتها بالبيريل اللي جبته من عند البقال اللي ما اعرفش اسمه علشان حاسس انكم هاتضربوني لو قلت كدة تاني-
برضو المهم
طلعت البوفتيك تاني من القلاية وحطيته في الطبق وشيلت حتة بوفتيك تانية وحطيتها في القلاية ووقفت جنبها المرة دي خوفا من تكرار اللي حصل قبل كدة
كررت العملية دي مع كل حتة بوفتيك لحد ماخلص وطلع كله في الطبق
طبعا كانت الوان البوفتيك اللي في الطبق مختلفة يعني فيه منها الاحمر وفيه الاسود وفيه البني والروز والبنك
كل تدرجات الالوان اللي بتبتدي من لون اللحمة النية لحد ماتبقي فحمة
ورشيت عليهم شوية ملح وبالهنا والشفا
اخدت الطبق وطلعته برة في الصالة ونزلت اشتريت عيش من عند نفس البقال ولسة هابتدي اكل افتكرت اني ........................................
تفتكروا ايه
افتكرت اني صايم وماينفعش اكل بوفتيك
تيييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييت

دي الجملة اللي قلتها لنفسي ساعتها بس البلوجر بيمسحها كل لما اكتبها مش عارف ليه
يالله ماعلينا بلوجر قليل الادب
طبعا اخدت البوفتيك زي ماهو كدة ورميته في الزبالة وعملت مكرونة وبطاطس
البوست اللي جاي بقي هاحكيلكم علي طريقة عمل المكرونة والبطاطس

بعد الرحلة دي ابقي قابلني اصلا لو افتكرت اسمك مش تفتكر انت كنت زعلان من ايه
ايه رايكم بقي في طعم البوفتيك
يالله دوقوه وقولولي وانا مستنيكم في الحلقة اللي جاية من طبق منامينو

الأربعاء، 3 ديسمبر، 2008

قطر الندي (1)



الصديقة العزيزة اسماء عواد صاحبة المدونة الجميلة (باب الشمس) عدت عليا هنا مرة وقالتلي اجاوب علي اسئلة مجلتها الكميلة هالص هالص هالص قطر الندي ودي اسئلة بتسألها للاطفال وهم بيجاوبوا عليها اجابات ساعات بتكون عاقلة جدا واكبر بكتير من اجاباتنا احنا (ياكبار ياعاقلين) وساعات بتكون تلقائية وكميلة هالص هالص

انا بقي طبعا مش هاقدر اجاري الاطفال وشقاوتهم بس هاحاول اجاوب علي قد ما اقدر وبمنتهي الصراحة علشان ماحدش يزعل

ههههههههههههههههههه

ملحوظة

هاجاوب كل سؤال في بوست علشان الملل

نيجي للسؤال الاول

س1: متي تشعر بالخجل

طبعا سؤال خبيث قوي من قطر الندي وربنا يسسسسسسستر

المواقف اللي الواحد بيتعرض فيها للجل كتيرة جدا منها علي سبيل المثال

1- انا من عادتي اني بانسي بسرعة قوي وذاكرتي ضعيفة خصوصا في الاسماء واكتر المواقف المحرجة اللي باتعرضلها اني اقابل حد من اصحابي قوي واحاول افتكر اسمه وانا باسلم عليه وما اعرفش وياسلام بقي لو قلت اسم وطلع مش هو بتبقي حالة

بس اكتر حاجة بتنقذني في المواقف دي (ازيك ياباشا عامل ايه ياريس واحشني يامعلم )

2- لما المدير بتاعي في الشغل يدخل عليا ويلاقيني بالعب (زوما ) ويخرج بسرعة علشان الغيها وكأنه ما اخدش باله علشان مايحرجنيش (راجل زوق بصراحة ) وبعد شوية يرجع تاني يلاقيني لسة بالعب زومة (ادمان بعيد عن السامعين)

3- لما اركب اتوبيس النقل العام (بتاع الدولة مش الشركات الخاصة _وهاتعرفوا اشمعني في الاخر _) وانا مخنوق والكمسري الرزل يقولي رايح فين يا استاذ وما اعرفش ارد عليه وافضل متنح شوية وفي الاخر اقوله اخر الخط (طبعا باكدب عليه )

4- لما ادخل مطعم واتجعص قوي واطلب واحد فول من غير سلطة خضرا والراجل يبصلي قوي ويقولي ماعندناش تلفزيونات واخرج من المطعم وانا بالعن البانجو واللي بيتعاطوه وابص ورايا علي يافطة المطعم الاقي اسمه كنتاكي ....... (لا تعليق)

فيه بقي مواقف محرجة جدااااااا حصلت معايا ومش قادر انساها ابدا منها

1- كنت في بلد غريب وحبيت اشتري عيش نزلت الشارع ورحت لاقرب محل لقيته قدامي وقلت للراجل ب2 جنيه فينو ياباشا . الراجل بصلي بصة غريبة قوي وقالي مافيش طبعا استغربت قوي من بصة الراجل ليا وماله بيكلمني بقرف كدة ليه سيبته ورحت لفرن كان قريب منه ووانا راجع بابص ناحية المحل ده لقيته بتاع مبيدات حشرية ............... (ماحدش يضحك انا باقول اهه)

2- مرة كنت انا وواحد صاحبي في سنما والدنيا كانت زحمة قوي واحنا خارجين وكنا ماشيين في طابور طويل وصاحبي كان ماشي قدامي فحطيت ايدي علي كتفه علشان ماكنتش عارف احطها فين من الزحمة (عادي يعني بتحصل كتير ) ولما خرجنا برة الضلمة ووصلنا للنور لقيتني حاطط ايدي علي كتف بنت ما اعرفهاش _طبعا عملت عبيط وجريييييييييت _ (شايف واحد هنااااك اهوه بيقول اني كنت عارف وعامل عبيط )

3- اكتر موقف محرج بقي اتعرضتله في حياتي كان من حوالي 3 سنين لما دخلت المستشفي اعمل عملية كبيرة (هاتفرق يعني كبيرة ولا صغيرة يالله ماعلينا عدوها ) ولقيت ناس اصحابي ماشفتهمش من زمان قووووووووي بيزوروني في المستشفي وكنت هاموت واعرف هم عرفوا منين

المهم لما خرجت من المستشفي وشفتهم بعد حوالي شهرين سألتهم انتوا عرفتوا ازاي فواحد منهم قالي ان والده كان في العناية المركزة بتاعة نفس المستشفي وهو شافني وانا داخل العمليات

فتلقائيا وعادي جدا سؤال منطقي خطر علي بالي ...... ووالدك عامل ايه دلوقتي ؟؟؟؟؟؟؟

قالي الله يرحمه

انا ضربت لخمة وماكنتش عارف اقول ايه (موقف محرج جدا علي فكرة واي حد مكاني كان هايتلخبط )

بس اللي حصل معايا كان مختلف

لقيتني باقوله يالله مش مهم ................. قصدي في داهية.......... سوري سوري بجد مش قصدي انا اقصد يعني خد الشر وراح ........................................

هو ضحك وحاول يلطف الموقف وقالي ماتاخدش في بالك انا فاهم

واحد صاحبنا تاني ربنا يجازيه بقي قالي الاربعين النهاردة بلليل تعالي نعزيه علشان انت ماعرفتش وقت الوفاه قلتله طيب قبل اي حاجة المفروض اقوله ايه لما نروح

قالي هم كلمتين ساهلين خالص

البقية في حياتك وتعيش وتفتكر

فضلت من ساعتها لحد ماجه الميعاد اللي اتفقنا عليه عمال اقول البقية في حياتك تعيش وتفتكر البقية في حياتك تعيش وتفتكر البقية في حياتك تعيش وتفتكر

واول ماشفته قلتله اهلالالالالالالالالا ازيك ياراجل كل سنة وانت طيب تعيش وتاخد غيرها

......................................................(اي حد هايشتم هو حر )

الثلاثاء، 2 ديسمبر، 2008

المرأة (نص) المجتمع




اول امبارح كنت باتمشي وحاطط في وداني السماعات وباسمع نجوم اف ام (مش لاني باحب اسمعها لا سامح الله ) انما من مبدأ اخنق علي نفسك قبل ماحد يخنق عليك
المهم كانوا بصراحة بيناقشوا موضوع هاااااادف جدا واخدلي بالك انت من هادف دي
برضو المهم الموضوع كان اذا كانت الست تسمح لجوزها انه يخرج برة البيت كتير مع اصحابه ويسيبها محبوسة بين اربع حيطان ولا لا
الرسايل كانت كتيرة ومعظمها برضو رسايل هاااااااادفة بس اللي لفت انتباهي كانت رسالة واحدة وكانت فحوي هذه الرسالة (حلوة فحوي دي )
ان الراجل الجواز بالنسبة له بداية حياه لانه اول لما بيتجوز وبيستقر بيدور علي شغل احسن وحياه احسن يوفرها ليه ولبيته ومستقبل عياله (اللي جابلك يخليلك ياسيدي)
انما الست الجواز بالنسبة ليها نهاية يعني الجواز بالنسبة للست غاية وهدف مش وسيلة
الست بتفضل حياتها كلها مستنية اليوم ده انه يتحقق وكل اللي بتعمله قبل اليوم ده انها بتجهز نفسها للجواز
الرسالة كانت بتقول كدة بالنص
الجواز بالنسبة للراجل بداية حياه وبالنسبة للست نهاية
ياتري الكلام ده يعجب البنات والستات؟
انا مش هاقول رأيي انما الموضوع مطروح للمناقشة