الأربعاء، 23 ديسمبر 2009

وطن بالألوان الطبيعية

scan0001

الواد كـــــــيمو عمل فكرة جميلة وعمل مدونة اسمها هنرســــــــم وطـــــــن وجمع فيها مجموعة كبيرة من الناس اللي نفسهم يغيروا واقع مر كلنا عايشين فيه وقال كل واحد يكتب الوطن اتللي نفسه فيه وبيتمناه

وقالي اعمل بوست اقول فيه الوطن اللي انا باتمناه فقولتله

..................................................................................................

ناولني فرشة ياعم وشوية الوان

اصلي ناويت ارسم وطن

ماتخافش ...مافيش قلق

دي كلها شخابيط ورق

لا فيه حكومة ولا معارضة ولا برلمان

ده اصل الحكاية كلها

شوية هلفطة في منام

لواحد صبح لقي نفسه عريان

.......................................................................

الوان ايه !!!؟؟؟

هو انت ماتعرفش مطلوب الاوطان؟

شكلك تعليمك خواجاتي ياعم وهاتتعبني وياك

طيب قول عندك ايه وانا اخد اللي اشوفه كسبان

................................................................

ابيض ؟؟؟

يانهار الوان

وده اعمل بيه انا ايه

باقولك هارسم وطن

مش باقولك شكلك نعسان

ياعم قالولنا زمان

في القراءة والمطالعة والتاريخ وكل اشي كان

ان الوطن يعني اشجان

يعني ناس بتنداس بالقطارات

وناس بتموت بالسرطانات

وناس في عبارات غرقانة

وعيون بالدموع مليانة

وسما معبية دخان

طيب قولي انت بقي بزمتك

منين الابيض هايبان؟؟؟؟؟!!!!!!!!

............................................................................

احمر ايه ياعم انت

اسمع كلاي

دي بضاعة خسرانة ولون ماهواش مطلوب

الدم بس دلوقتي علي السكك وفوق الرصفان مسكوب

الدم في عروق الجدعان ؟؟؟؟

بخ

كان زمان

لا كانت بنات بتتعاكس

ولا عجوز واقف بيفكر

هايلاقي كرسي في اتوبيس

ولا خطفوه الشبان؟؟؟

ولا اقولك

اديني منه شوية

ده برضو ساعات الاحمر يكسب

هي مش سهرات كباراتنا بتترسم بالوان؟؟؟؟

.......................................

ازرق؟

استني .....مش عارف

ياتري لسة فيه نيل بيترسم ومية وشطآن

ولا الحكاية خلصت

واتباعت قصور وفيلات ونايل فيو

ومخلفات مصانع

واشرب ياغلبان

ولا ارسم مراكب في النيل بتغرق

ورشيد اهي هناك

اسألها تشهد

هي هدوم الغرقانين بيميزوا فيها الوان؟

............................................

استني

قبل ماتمشي

لو عندك ازرق غامق ......هاته

ياشيخ ده ريحته تجنن

واهو برضو ليه سهراته

ده حتي ساداتنا زمان

ياما عاشوا في ملذاته

واخر الحدوتة نهبونا

وسابونا في كل حتة بنتهان

..............................................................

الاصفر اه ده هات منه كتير

دي اصلها صحرا كبيرة وقالولنا في كل خطوة بير

اشي بترول وفحم

ودهب وحديد وقصدير ....

قولي صحيح ...هي الانابيب لونها ايه ؟

ايوة ياعم دي بتاعة الغاز

بتاع اخواتنا شلومو وشامير

ولا دي في الصورة مش هاتبان؟

ماهي مدفونة

وفي بلدنا علمونا

ان اللي مش علي السطح مالهوش مكان

خايف ارسمها خطوط سودا في وسط اللوحة

ساعتها مش هالاقي للاصفر مكان

........................................................

قالولنا في حصص العلوم زمان

ان الاسود يعني مافيش الوان

يعني كل شيء عن الرؤية اتحجب

يعني الدنيا باظت

والشمس غابت

والليل وجب

واديك شايف حال البلد

ليل طويل من غير امل

في فجر من الليل يتولد

اقولك كلمة ياعم وتسمعها ؟

لو عندك باقي من الاوان. بيعها

واشتري لون الاحزان

ده في بلدنا دايما هو الكسبان

......................................................................

استني

انت هاتمشي ولا ايه ياعم.....

هو انت كدة عليطول بتخم ؟

لسة فيه حاجات كتيرة مالقتلهاش الوان

هو الوطن ينفع من غير كوسة وقرع وبتنجان ؟

طيب الرشوة ...اعمل فيها ايه ؟

والجهل... والفساد... والنهب

طيب انتخابات مجلس الشعب

كل ده مش في الحسبان ؟

بلاش كل ده

طيب الجرايد القومية

وفرق المطبلاتية

والواسطة ...والمحسوبية

كل ده ماتعرفهوش ؟... ما ارسمهوش ؟

ولا كأنه ما كان ؟

تصدق بايه ياعم

انت قرفتني

زهقتني

وعلشان خاطرك بقي

انا مش عايز وطن

وهاتنازلك عن السكن

تحب اكتبلك وصيتي بالكفن ؟

روح ياعم

مش عاوز منك الوان

بايدي انا هاعمل الواني

بايدي انا هارسم اوطاني

بايدي وبايدين الجدعان

هانرسم علم

معمول هنا

مكتوب عليه صنع الوطن

لا هو صيني

ولا امريكاني

ولا مصنوع في ايران

………………………………………………….

صورة الوطن الجميلة اللي فوق دي مرسومة بايدين فنانة صغننة عندها سبع سنين (من الجيل اللي ان شاء الله هايعمل اللي ماقدرناش عليه ) هــــنا عزمــــي بنت داليــــــــا قـــــوس قــــــــزح

ميرسي كتيييييييير ياهنا وتسلم ايدك بجد

هناك 12 تعليقًا:

!!! عارفة ... مش عارف ليه يقول...

ايه يا عم الحلاوة دي

فؤاد حداد يا ناااااااااس

---------

بجد بجد روعة وتستحق مليون تحية

على الحكاية ديه

فعلا "وطن بالألوان الطبيعية"

الموضوع ده مينا حرام ميشوفش النور

وكلامي ده مش تقليل من وجوده في المدونة

إنما محتاج يتشاف بشكل أكبر من كده محتاج يتشاف في أي مطبوعة من المطبوعات اليومية

محتاج تشيله على ايدك وتحاول تسوقه كويس مش تكتفي بمكانه هنا

-------
تحياتي لهنا ... مشاء الله بنت الوز عواااام

ربنا يخليها لمامتها وباباها :)

بالتوفيق يا مينا

وياريت تفكر في كلامي كويس

وليد

Cute Kitty **sookra يقول...

بجد يامينا
تفوقت على نفسك اوى فى البوست دا
انا ماليش فى النقد الادبى لانى موش درسته
بس هاقولك انت وضحت وجهتين نظر
واحده متفائله وواحده متشائمه
الاتنين عندهم حق
المتفائل من حقه يحلم بوطن احسن ويحاول يحقق حلمه والا هنموت
والمتشائم برده عند حق يفضفض ويطلع كل الهم واليأس والكبت اللى جواه من اللى شايفه من حال البلد اللى لابيسر عدو ولاحبيب على رأى تيته
وعاجبنى اوى جدا الجزء دا
قالولنا في حصص العلوم زمان ان الاسود يعني مافيش الوان يعني كل شيء عن الرؤية اتحجب يعني الدنيا باظت والشمس غابت والليل وجب واديك شايف حال البلد ليل طويل من غير امل في فجر من الليل يتولد اقولك كلمة ياعم وتسمعها ؟ لو عندك باقي من الاوان. بيعها واشتري لون الاحزان ده في بلدنا دايما هو الكسبان
وبعدين ياعم منامينو انا بحب اللون الاسود وبعتبره لون الفرح الخاص بيا
هو كدا بقى كل واحد ولونه فلو سمحت اسحب كلامك وموش تقول عليه لون احزان
مساك شيكولاته بالالوان اللى هنلون بيها بلدنا لو قدرنا

حـــلـــم كـــان يقول...

ابيض ؟؟

معتش له مكان والبركه فى الانسان

مهو هو اللى غدر وباع وخان

::::::::::::::::::::
احمر
اهو ده اللى لسه له مكان

تصدق انه غط الارض وخبا كل الالوان

ومن كتر خوفى منه جالى فى المنام


ولسه بتقولى الوان

Somaya Kamal El Din يقول...

اولا البوست حلو اوووى

ثانيا ده احلى جزء

روح ياعم مش عاوز منك الوان بايدي انا هاعمل الواني بايدي انا هارسم اوطاني بايدي وبايدين الجدعان هانرسم علم معمول هنا مكتوب عليه صنع الوطن لا هو صيني ولا امريكاني ولا مصنوع في ايران

فعلا احنا احسن ناس نقدر نبنى وطننا

وفى الاخر نكتب صنع فى مصر
ههههههههههههه

walaa tulip rose يقول...

يااااااااه فكرننا بالاوطان
كان دايما والدي رحمه الله يحكي عن الوطن وايام زمان والاحترام والالتزام
وكانه بمنطق الالوان بيحكي عن لون ابيض منور بضوء الشمس

ياريت حتى نلاقي في وطنا اللون الاصفر ولو شوية منه بس لسة وطنا مش ملوث

kochia يقول...

مسا الخير
والله انا مبسوطة ان موجودة هنا وبقرأ لك وبرد كمان
وحشتني المدونة
ووحشني رغيك الحلو برده

المهم ايه الكلام الجميل ده
نرسم وطن
ده حلم اننا نقدر نرسم وطن
ويبقي جميل زي ما بنحلم
فكرة حلوة اوي
بس هنرسم حلو مش بالوام وحشة ولا الوان الموت والدم
تحياتي

نورت مدونتي علي فكرة
سلام

мαησηα يقول...

انا ع فكرة شفت كل البوستات اللى اتكتبت عنموضوع تعالوا نرسم وطن

رغم انى زعلانة علشان محدش قالى تعالى ارسمى معانا وطن بس متابعة الحملة دى وبرسم الوطن من مكانى مع نفسى وخلاص ف المجتمع اللى حواليا

المهم بجد وبدون مجاملة اكتر بوست عجبنى هو البوست ده

بجد تسلم الايادى يا مينا وتستحق شوكولاته

انا كل يوم باجى هنا بس انا بغبائى بدخل من لينك اخر بوست انا علقت فيه وطبع المدونة بالنببة لى كانت واقفة عند اخر بوست اللى هو قبل ده هههههههههه

غباء معلش البرد عامل احلى شغل معايا

http://farm2.static.flickr.com/1397/540136472_228725ae50.jpg

ماتغيبش عن هنا عايزينك تهرينا ازعاج
سلام

شمس النهار يقول...

اولا عجبتني الرسمه جدا بتاعت بنوتت داليا

والاجمل انك تحطها عندك في المدونه


ثانيا انا قريت الرسم في مدونة هنرسم وطن
بس انت عارف انا ماكنتش بروح لحد في البلوجر

دلوقتي جه وقت الجد انت كده رسمت الوطن الموجود لكن بحرفنه جامده
بجد تسلم ايدك
لكن فين الوطن الجديد صحيح انت وصفته في كلمتين في سطرين
بس نفسي انك ترسم الوطن ده وبنفس حرفنة الاول

حتي لوتعتبره مطلب ولو تنزله بوست
عندك هنا

سلام

صوت من مصر يقول...

مينا
انا قولتلك تعليقى
لا تعليق على ما هو اجمل من التعليق

-_- يقول...

وطنك عجيب

mahasen saber يقول...

انا علقت على البوست فى هنرسم وطن

هنا بئا هعلق على الصوره

تسلم ايد وروح هنا ومامة هنا كمان

الصوره جميله يا منامينو والاجمل ان هنا الليى رسماها

نور الدين (محمد الجيزاوى) يقول...

تحفة ياصديقى
كلماتك بجد كان لها اثر كبير فى نفسى فعلا فى حاجات بدون الوان الكوسة والمحسوبية وفعلا فى حاجات الازرق مبقاش بيعبر عن جمالها النيل اللى خلوه ملكية خاصة والفساد اللى ساد
كلماتك كلها احساس وصدق يامينا
والرسمة بريئة وجميلة سلمت يد الطفلة الجميلة
تحياتى لك يامينا
....................
نورالدين محمود