الثلاثاء، 26 مايو، 2009

الحتة الخضرا في قلبي


طيب انت عارفة؟؟؟؟؟
والله العظيم كنت باحس انك جوايا
كنت باقول للدنيا خلاص
خفيت
حسيت
وضحكت لأول مرة عليكي
حطيت ايدي في نن عنيكي
وخطفت الفرحة
وجريت خبيتها
حطيتها
في الحتة الخضرا في قلبي
....................................................
ونسيتها
قلت الناس لو عرفت مش هاتسيبنا في حالنا
والفرحة ان بانت .....ظهرت !!!
اتسرقت
..............................................
وسابتني الدنيا
فرحان
سكران
حيران
هي الدنيا مش شايفاني؟
ولا الفرحة كبيرة لدرجة انها عامياني
.................................................
وقفلت عليكي في قلبي
ونسيت مفتاحه معاكي
وقابلت الدنيا بوش جديد
فرحان
وسعيد
...............................................
واتاري
الحتة الخضرا الفاضلة في قلبي
طرحت شجرة شوك
مديت ايدي لجوا
في قلبي
في وسط الشوك
دورت عليكي هناك
خفت عليكي من قلبي
من شوكه
م الحتة الخضرا في قلبي
ولقيتك
بعد مادخت عليكي
واقفة
وفي ايدك دلو الماياه
وبتسقي
شجرة شوك