الأربعاء، 29 سبتمبر 2010

حالو ياحالو


خلاص حليتوا وسمعتوا ونضفتوا ودانكم؟ (وش بيطلع لسانه للي مش عاجبه نضافة الودان)
انزل يابني بالساقع 
.............................................................................................
طول عمري باستكشف الحاجات علي كبر
لدرجة اني حاسس اني وانا صغير ماكنتش موجود اصلا (او كنت موجود وبستهبل)
يعني اول مرة سمعت كلمة بغبغان كان عندي 12سنة 
وطول عمري اسمع صوت الكروان بس اول مرة اعرف اسمه كنت تقريبا في ثانوية عامة طول عمري فاكره عصفورة مستحلية صوتها
طبعا مش عارف هل فعلا انا ماكنتش اعرف الحاجات دي انا صغير ولا الزهايمر المبكر عمل عمايله معايا وكان ماشي ورايا علي خط مستقيم بأستيكة (علي رأي السادات)
لا والطامة الكبري بقي اني وانا عندي ييجي 180 سم وداخل علي 29 سنة اكتشف وانا بدعبس في المدونات ان فيه مدونة اسمها phoenix
طيب والعمل في الليلة الطويلة دي
وبعد مباحثات ومداولات ما اسفرتش عن اي حاجة رضيت بالامر الواقع واخدت التاج اللي هي بعتتهولي علي امل اني ابقي اتفاهم معاها بعدين واشوف ايه موضوع فونكس ده 
ندخل بقي علي التاج احسن سايبه في الفون من ساعة ما ابتديت وزمانه شاط (بس هاتيجي في العرضة ان شاء الله
.....................................................................................................................
من أرسل لك الدعوة ؟؟؟؟

طيب يعني خلي اللي بيسأل عاقل واللي بيجاوب عبيط
اكيد اكيد طبعا ولاد ابو اسماعيل 
 ....................................................................

ما هي كتب الطفولة التي بقيت عالقة في ذاكرتك؟ 

والله يعني بصراحةانا من صغري مافيش حاجة بتعلق معايا (انا اللي كنت باتعلق) لو حد شاف معايا حاجة غير كتاب المدرسة فعلشان كدة الكتاب الوحيد اللي كان دايما في ايدي وانا صغير هو كتاب العلوم بتاع رابعة ابتدائي ودايما كان مفتوح علي صفحة 24 وكان فيها شكل مقرف بتاعة الجهاز الهضمي فكنت باضطر اغطيه بكتاب صغنن كدة اسمه ( المغامرون الخمسة) وطبعا لدواعي الملل كان الكتاب ده لازم يتغير كل يوم بس صفحة 24 ماكانتش بتتغير ابدا
طبعا اكيييييييييييد عارفين ليه (بس بقي احسن ح من الرقابة يكون هنا)
.......................................................................

مَنْ أهم الكتاب الذين قرأتَ لهم ؟ 

طبعا نبيل فاروق 
نجيب محفوظ
يحي حقي
جمال الغيطاني
بيرم التونسي
صلاح جاهين
احمد فؤاد نجم
يوسف ادريس
احسان عبد القدوس
يوسف السباعي
طهه حسين
يوسف القعيد
يوسف زيدان
بلال فضل
علاء الاسواني
جلال امين
ستيفن كوفي
باولو كويلهو
جابرييل ماركيز
...........................................................

من هم الكتاب الذين قررت ألا تقرأ لهم مجددا؟ 

بصراحة بصراحة واحد من اصحابي كنت لسة في سيرته من كام يوم للاسف هو مدون وخلاني كرهت امسك اي كتاب مكتوب عليه كلمة مدون
بس ربنا امر بالستر خلي الواد يبيع الكتاب ويلم حقه وهو خلاص حرم ومش هايعمل كدة تاني  ماحدش يضربه (هو وعدني ياجدعاااااان)
 .................................................................

في صحراء قاحلة ، أي الكتب تحمل معك؟ 

طيب وانا ايه اللي هايوديني هناك اصلا وبعدين يعني يوم ما اروح صحراء جرداء لا زرع فيها ولا ماء اقوم اخد معايا كتب؟ طيب اخد زمزمية مياه انفع
انا باقول الوي عنق السؤال (واحتمال تتكسر ونستريح) واقول لو دخلت السجن هاطلب ايه (غير كوك دور

اولاد حارتنا                           (نجيب محفوظ)
 أوراق شاب عاش منذ ألف عام            (جمال الغيطاني)
عصفور الشرق                               (توفيق الحكيم)
رباعيات صلاح جاهين                      (اكيد مش ولاد ابو اسماعيل)
100 طريقة فاشلة للهروب من السجن      (وده انا اللي هاألفه من خبرتي في السجن طبعا)
اوعوا تنسوا العيش والحلاوة انا باقول اهو
................................................................ 

من هو الكاتب الذي لم تقرأ له أبدا ، وتتمنى قراءة كتبه ؟ 

هو انا قريت لنيتشه بس مش كتير للأسف فعلشان كدة عايز اقراله اكتر خصوصا انه كان راجل شراني والناس الشريرين اللي زي حالاتي انا وهو نحب كدة نشجع بعضشينا
................................................................ 

ما هي قائمة كتبك المفضلة ؟ 

طيب ما انا اخدتها معايا في السجن لسة هاطلعها تاني؟
ياجماعة الحاجات دي بتحتاج تصاريح وبلاوي سودا وبعديت مأمور السجن قالي ماشوفش وشك هنا تاني
وبصراحة بصراحة بقي انا اديتهم هدية (لولاد ابو اسماعيل ) وانا خارج اصلهم كانوا جيراني في الزنزانة اللي جنبي
................................................................  
 
ما هي الكتب التي تقرؤها الآن ؟ 

كتييييييييييييير
ومن غير ضرب انا باقول اهو 
انا بقالي فترة كل ما افتح كتاب تصحل ظروف منيلة بستين نيلة تخليني اسيبه ولما ارجع اروح فاتح واحد تاني قبل ما اخلص الاولاني فعندي ييجي 40 كتاب مفتوحين منهم 

الرابح يبقي وحيدا                     باولو كويلهو
ماذا حدث للمصريين                  جلال امين
السكان الاصليين لمصر              بلال فضل
ضحك مجروح                         برضو بلال فضل
العادات السبع                        ستيفن كوفي
صديقي احبك                        مها العباسي
موسوعة وصف مصر                 علماء الحملة الفرنسية
قصة الحضارة                         واحد اسمه غلس ومش فاكره

أرسل الدعوة لأربعة مدونين من أجل مشاركتنا بذكرياتهم مع القراءة ؟ 
(ومش عارف ازاي طلب زي ده يبقي اخره علامة استفهام بس انا نقلته كدة ماليش دعوة) 
اي واحد هايعتب ناحية المدونة ويقرا البوست هاياخده
وده مش اختيار ولا هي عزومة
ده غصم واختصار 
واللي مش هاياخد الدعوة دي ويعملها هاجيبه وانا شايفكم كلكم واحد واحد


هناك 12 تعليقًا:

adel يقول...

هي فونمس دي بتصدنا في نفس اليوم ولا ايه و نفس التاج
دي دسيسة علي فكرة

انا راي نبلغ عنها مباحث المدونات ونشوف هي مين

-----------
حلو قوي قوي كتاب اوراق شاب عشا من الف عام بتاع الغيطاني

Noha Saleh يقول...

اجمل حاجة فى التاج ده
ان كل مابدخل مدونة والاقيه بعرف عناوين كتب احب انى اقراها
انا عملت التاج ده قبل كده يعنى سماح المرة دى

Phoenix يقول...

اطلع من البوست ده بايه ؟؟
يعنى انا عايزة اعرف الدعوة دي بعتها تفاريح مثلا ولا ايه
انا عايزة استفاد ياعالم استفاد ياهووووووو مش معقول كده
بطلوا بقى نظام الطالبة الدحيحة
اعوذ بالله على دول بشر ياجدع
\:

Phoenix يقول...

فونمس !!!
فونمس ياعادل
و انا بقول انك الوحيد اللى هتجبر بخاطري فى موضوع الاسم

لا و كمان بتتفق عليا
ده انت ناوي على موتك شكلك
×_×

Mina يقول...

عادل
ايوة يامعلم انا معاك في الليلة دي
احنا لازم نحط حد للمهزلة دي ونشوف حل للموضوع ده
ونبلغ الناس اللي انت قولت عليهم دول
انت بتجيب الكلام الكبير ده منين ياجدع
حاجة عجييييييييبة ياجدع
قول تاني كدة
ايوة ايوة قول بس تاني
احسن حد يسألني عليها وماعرفش وابقي محرج كدة
............................
لو ماقريتهوش اقراه هايعجبك
زلز قريته كمل باقي مجموعة جمال الغيطاني
راجل تحفة
بس عايز حد رايق علشان مصطلحاته غريبة وعميقة
بيخترع لغة جديدة بتاعته هو لوحده

Mina يقول...

noha saleh
صح معاكي حق المفروض التاجات اللي من النوع ده تبقي علشان الناس تستفيد
بس ابلة الناظرة بتقول ان اجاباتي كلها غلط وادتني صفر من عشرة
عااااااااااااااااااا
انا اللي كنت فاكر اني هاخد عشرة من عشرة ونجمة

Mina يقول...

Phoenix Phoenix Phoenix Phoenix Phoenix Phoenix Phoenix Phoenix Phoenix Phoenix Phoenix Phoenix
عااااااااااااااااااااااااااااااا
ماهو الاجابات كلها موجودة اهي
هو يعني علشان ماقلبتهاش نكد بقي وعملت زي المثقفين اللي شعرهم منكوش ولابسين نضارة قعر كوباية(وعديها حكاية النضارة دي بلاش فضايح)
بس بقي بقي الاجابات كلها موجودة والناس كلها اسمائهم موجودة وكتبهم موجودة
او معظمهم يعني
لاني طبعا مش هافتكر كل اللي قريته في حياتي كلها
دول ييجي مييييييييية كتاب
ههههههههههههههههههههههههههه

Mina يقول...

وبعدين عادل اصلا متفق معايا عليكي وهو اللي قالي انا هاقولها فونمس بعد كدة
زي فونمس بوند كدة
هو قالي كدة اه
بيتريق عليكي علشان شبه امينة رزق في فيلم غبي منه فيه
انا ماليش دعوة هو اللي بيقول
انا بس بهدي النفوس يعني

adel يقول...

انا عندي الكتاب و قريته و قريتله كذا عمل تاني و قعدت فترة كبيرة قوي متابع اخبارا لالدب و مقاله فيها

-------------
ايوة هي فونمس بوند فعلا
تصدق حلوة
بس انت عرفت منين انها شبة امينة رزق في غبي منه فيه
احنا كنا مخابين عليها

Mina يقول...

يا ابو العداديل ياحبيبي مافيش حاجة بتستخبي في الزمن ده
الدنيا ضيقة
واحنا في عصر العولمة والسماوات المفتوحة
اقفلها بقي والنبي شوية احسن حاسس ان الدنيا ابتدت تبرد

Tears يقول...

ح استنى الكتاب اللى ح تألفه

و ح اجيبلك عيش و لانشون اشيك من الحلاوة :)

Mina يقول...

Tears
خايف احسن تستني كتير
وبعدين اللانشون ممنوع في السجون
هناك فيه استخدامات اخري للكلاب غير انهم يعملوها لانشون
:))