الخميس، 7 أكتوبر 2010

علي حين غرة



واحد صاحبي النهاردة اخدني علي خوانة وخلاني قاعد في امان الله وراح رميني سؤال خبط راسي في الحيطة اللي ورايا
مستعد تحارب وتموت علشان مصر؟
سؤال خبط في وشي 29 سنة عدت هي عمري كله عدت قدامي في لحظة واحدة كلها ورا بعضها كأنها شريط سينما
29 سنة مليانة بعصارة تاريخ ورثته  من اب وجد عمرهم سبع الاف سنة
عاشت فيهم مصر ذليلة للهكسوس ومركز للامبراطورية المصرية , انتصرت مع رمسيس وداسها الفرس , عمل منها الاسكندر الاكبر منارة للشرق وعملها الرومان مخزن غلال , حضنت يهود الشتات وكانت ملجأ للمسيح وامه وداب جواها جنود عمرو بن العاص , بني عاصمتها الفاطمي وخربها المماليك ولمها محمد علي , أكلت العالم كله من اللي فاض من قمح يوسف وقتل اهلها بعضهم علشان رغيف عيش , مهندسيها بنوا معجزات تتحدي الزمن وهدموا علي روس اهلها عمارات علشان شيكارة اسمنت , دكاترتها خلدوا ذكراهم وحنطوا موتاهم وسرقوا اعضاء العيانين من المستشفيات , اهلها ماتوا جنب بعض قدام رصاص نابليون وفريزر وتشرشل وديان , وقتلوا بعض برشاشات وقنابل وسيوف وخناجر , استشهد شبابها غرقا تحت كوبري عباس وانتحروا من فوق كوبري قصر النيل .
اموت علشانها ليه ؟ عملتلي ايه ؟ اخدت منها ايه ؟ اموت علشان بلد بادخل بيتنا كل يوم بلليل احمد ربنا اني فلت من مؤامراتها النهارية عليا علشان تموتني ؟!  - تحت عربية ولا في بلاعة ولا مخنوق بدخان ولا لازق في عامود متكهرب ولا بسكينة طايشة من خناقة – وبادعي ربنا يكمل ستره عليا ويحميني من مؤامراتها الليلية – كهرباء مقطوعة وحر يفطس ولا مية بمجاري وفشل كلوي ولا خضار متسرطن لو لقيت اشتريه ولا صخرة تقع ع البيت وتساويني انا وهو بالأرض-
هل دي بلد تستاهل اموت علشانها؟
بلد باتشتم فيها في اليوم مية مرة علشان مسيحي وباشتم جاري متين مرة علشان مسلم ؟
بلد بيذلني فيها شوال فيه فلوس وباطلع ذلي علي البواب ولا كشاف النور؟
بلد ولادها مستعدين يموتوا 4 مرات غرقانين علشان يعرفوا يهربوا منها وهي بتتفرج عليهم وتقولهم جاتكم خيبة ماعرفتوش تموتوا المرة دي حظ اوفر المرة القادمة
فقت فجأة لقيت صاحبي لسة ماخلصش كلمة (مصر) اللي في السؤال واكتشفت ان كل الحوار ده مر عليا في جزء من الثانية
ولقيتني باقوله من غير ماحس ولا اعرف انا باقول ايه
اه طبعا
طلعت من بقي ومعاها دموع حقيقية وقشعريرة ورعشة ولد بيترمي في حضن امه بعد غياب سنين , شعري وقف وقلبي دق بسرعة واتمنيت احضن بايدي تراب الشارع
سرحت تاني ولقيت قدامي الحرامي والنصاب والفهلوي والشباب الضايع والجزار الجشع والمهندس المرتشي والدكتور اللي باع ضميره واللي قتل ابنه واللي خان اخوه واللي المخدرات هرت بدنه
لقيت كل دول كل واحد فيهم حاضن بأيدة حفنة تراب وفاتح صدره للموت علشان خاطر مصر
مش حلم لا دي حقيقة وواثق منها
مافيش واحد فيكي يامصر مش مستعد يضحي بنفسه ودمه علشانك وقت ماتناديه – وعلشان كدة لسة صالبة حيلك من سبع تلاف سنة

هناك 9 تعليقات:

adel يقول...

لا تعليق
!!!

Tears يقول...

النظام الفاسد قتل الانتماء و الشباب بيرمى نفسه فى المية عشان يهرب من مصر

نور الدين (محمد الجيزاوى) يقول...

الله يامينا
والله من اجمل ما قريت فى حياتى من الصدق والبساطة
يمكن مقدرش اقولك قد ايه اثر فيا كلامك وتعبنى فى نفس الوقت
عندك حق كل ما فيها بشع لكن مستعدون دائما لدفع فاتورتها من دمنا واحنا مبتسمين
تحياتى ليك صديقى العزيز النبيل

أم الأندلس الحبيب يقول...

اختلف معنى التضحية من عصر لعصر .. لأن الهدف لم يعد نبيل كما كان!!!

لاسع افندى يقول...

ماهى فى الاخر برضه بلدنا

مالهاش غيرنا ولا لينا غيرها


تحيه لاسعه

اتمنى تكون بخير

Noha Saleh يقول...

البوست حلو اوى
انا مش هتفذلك واقول المصرى هو المصرى والكلام بتاع مواضيع التعبير ده
بس فعلا كلنا بنحب مصر

شمس النهار يقول...

انا جاني صداع

هرجع تاني

بس الصداع يروح

واستوعب كل هذه الحقائق

وارجع لك

ومش هسيبك

:)

الميكروباص يقول...

مهما وصل درجة الاختلاف ستجد دائما الخير في الناس ناحية بلادهم
لو شعر المسؤولين بالناس لتغير كل شيء
ولكن ساعة الحرب سيخرج من البلد الأغنياء وأصحاب الاعمال ويتركوها لمن يحررها
وهم البسطاء

bent ali يقول...

اهى مصر دى اغرب لغز او احنا اغرب مرضى عشان كلنا بنشتم فيها ليل نهار ومن قلبنا لكن وقت الجد نعمل عيال

افتكر من كام سنة كان فيه موضوع ارتباط وجواز مع شخصية اكتر من رائعة بس ما كانش مصري، وانا كنت عارفة انى مش هاستقر فى مصر وبقول احسن بلا قرف زهقت من كل حاجة فيها، لكن وقت ما جه الجد ولاقتنى فى وش حقيقة انى مش هاعيش فى مصر تراجعت كأكبر عيلة فى الوجود!!!!!