الثلاثاء، 1 مايو 2012

ابن ستين كلب

لما تبقي عارف انها مستنياك في البيت

وبتتسخن الاكل كل مايبرد

وترميه وتعمل غيره

وهاتاخدك بالحضن اول لما تفتح الباب

ومش هاتعاتبك ولا هاتلومك

لانك هجرتها

او خنتها

او سيبتها زي الكلبة سنين لوحدها

او فعصت قلبها برجليك

وكل اللي هاتعمله انها تاخدك في حضنها وتقولك

ماتقولش اي حاجة

انت بس وحشتني قوي

لما تبقي عارف ومتأكد من كل ده

تبقي حيوان وابن ستين كلب

لو مامرمطتش كرامتها في الارض قبل ماترجع

لو ماخنتهاش مع طوب الارض قبل ماترجع

لو ماكسرتش قلبها بدل المرة الف قبل ماترجع

لو ما اهنتهاش وعايرتها وانبتها الف مرة قبل ماترجع

لو ماهجرتهاش وتجاهلتها سنين ولا كانها موجودة قبل ماترجع

تبقي حيوان وابن ستين كلب

لو اصلا رجعت

هناك 8 تعليقات:

bent ali يقول...

أبدعت والله يا مينا :)

هو فعلاً يبقى ابن ستين كلب لو معملش كدة، وتبقى بنت عشرتلاف كلب اللي تأله شخصيات زي دي ،ويقال لأمثلهن ما قاله اخوانا الشوام (صحتين على قلبا)

رحاب صالح يقول...

لية مفيش كرامة
مين اللي قال ان الحب مفيهوش كرامة
لو عمل كدة انا مش هرد عليه ولا هعبره

الميكروباص يقول...

انا لسه من 3 اسابيع فقط رأيت ما كتبته هذا بعيني مع احد الأقربين!

shery يقول...

بجد بحس دايما ان في جانب مظلم في حياة كل بني ادم
جانب مرضي : تعذيب الذات
محدش عجبه لا الحلو ولا الوحش
على طول في حالة تذمر
اذا رضيته ...يدوس الرقاب
واذا اهنته ..يبوس الايادي
علشان كده محدش مرتاح ...ولا بنفكر ازاي نرتاح ..
نحن مغرمون بتعذيب الذات وفقط
وبغض النظر يامينا ..
بجد الموضوع عجبني وانت كمان صيغته بشكل خفيف ومميز
تحياتي ياقمر

شمس النهار يقول...

اول ماقريت العنوان قلت يالهوي مينا ماله

:))))

بس بجد هو كده يستاهل تشتمه
وانت تستاهل كل خير وبرافوا علي الاحساس الغاضب الجميل

لاسع افندى يقول...

مينا

كل سنه وانت طيب وحشنى كلامك

Boneta يقول...

يبقي بوبي وابن ستين بوبي كمان
بس اللي ترضي علي نفسها تعرف شخص بالسلوك ده تبقي هي اللي تستحق الشتيمه
تحياتي يا منامينو :)

Unknown يقول...

بصراحه هما الإتنين يستاهلوا الشتيمه
و هي أكتر!