waiting

كُتب علي البعض الانتظار دونما انتظار لنهاية انتظارهم

................................................................

في الصميم .......

وحشتيني قوي يابنت قلبي

علي حين غرة

واحد صاحبي النهاردة اخدني علي خوانة وخلاني قاعد في امان الله وراح رميني سؤال خبط راسي في الحيطة اللي ورايا

مستعد تحارب وتموت علشان مصر؟

سؤال خبط في وشي 29 سنة عدت هي عمري كله عدت قدامي في لحظة واحدة كلها ورا بعضها كأنها شريط سينما

29 سنة مليانة بعصارة تاريخ ورثته  من اب وجد عمرهم سبع الاف سنة

عاشت فيهم مصر ذليلة للهكسوس ومركز للامبراطورية المصرية , انتصرت مع رمسيس وداسها الفرس , عمل منها الاسكندر الاكبر منارة للشرق وعملها الرومان مخزن غلال , حضنت يهود الشتات وكانت ملجأ للمسيح وامه وداب جواها جنود عمرو بن العاص , بني عاصمتها الفاطمي وخربها المماليك ولمها محمد علي , أكلت العالم كله من اللي فاض من قمح يوسف وقتل اهلها بعضهم علشان رغيف عيش , مهندسيها بنوا معجزات تتحدي الزمن وهدموا علي روس اهلها عمارات علشان شيكارة اسمنت , دكاترتها خلدوا ذكراهم وحنطوا موتاهم وسرقوا اعضاء العيانين من المستشفيات , اهلها ماتوا جنب بعض قدام رصاص نابليون وفريزر وتشرشل وديان , وقتلوا بعض برشاشات وقنابل وسيوف وخناجر , استشهد شبابها غرقا تحت كوبري عباس وانتحروا من فوق كوبري قصر النيل .

اموت علشانها ليه ؟ عملتلي ايه ؟ اخدت منها ايه ؟ اموت علشان بلد بادخل بيتنا كل يوم بلليل احمد ربنا اني فلت من مؤامراتها النهارية عليا علشان تموتني ؟!  - تحت عربية ولا في بلاعة ولا مخنوق بدخان ولا لازق في عامود متكهرب ولا بسكينة طايشة من خناقة – وبادعي ربنا يكمل ستره عليا ويحميني من مؤامراتها الليلية – كهرباء مقطوعة وحر يفطس ولا مية بمجاري وفشل كلوي ولا خضار متسرطن لو لقيت اشتريه ولا صخرة تقع ع البيت وتساويني انا وهو بالأرض-

هل دي بلد تستاهل اموت علشانها؟

بلد باتشتم فيها في اليوم مية مرة علشان مسيحي وباشتم جاري متين مرة علشان مسلم ؟

بلد بيذلني فيها شوال فيه فلوس وباطلع ذلي علي البواب ولا كشاف النور؟

بلد ولادها مستعدين يموتوا 4 مرات غرقانين علشان يعرفوا يهربوا منها وهي بتتفرج عليهم وتقولهم جاتكم خيبة ماعرفتوش تموتوا المرة دي حظ اوفر المرة القادمة

فقت فجأة لقيت صاحبي لسة ماخلصش كلمة (مصر) اللي في السؤال واكتشفت ان كل الحوار ده مر عليا في جزء من الثانية

ولقيتني باقوله من غير ماحس ولا اعرف انا باقول ايه

اه طبعا

طلعت من بقي ومعاها دموع حقيقية وقشعريرة ورعشة ولد بيترمي في حضن امه بعد غياب سنين , شعري وقف وقلبي دق بسرعة واتمنيت احضن بايدي تراب الشارع

سرحت تاني ولقيت قدامي الحرامي والنصاب والفهلوي والشباب الضايع والجزار الجشع والمهندس المرتشي والدكتور اللي باع ضميره واللي قتل ابنه واللي خان اخوه واللي المخدرات هرت بدنه

لقيت كل دول كل واحد فيهم حاضن بأيدة حفنة تراب وفاتح صدره للموت علشان خاطر مصر

مش حلم لا دي حقيقة وواثق منها

مافيش واحد فيكي يامصر مش مستعد يضحي بنفسه ودمه علشانك وقت ماتناديه – وعلشان كدة لسة صالبة حيلك من سبع تلاف سنة

حالو ياحالو

خلاص حليتوا وسمعتوا ونضفتوا ودانكم؟ (وش بيطلع لسانه للي مش عاجبه نضافة الودان)

انزل يابني بالساقع 

.............................................................................................

طول عمري باستكشف الحاجات علي كبر

لدرجة اني حاسس اني وانا صغير ماكنتش موجود اصلا (او كنت موجود وبستهبل)

يعني اول مرة سمعت كلمة بغبغان كان عندي 12سنة 

وطول عمري اسمع صوت الكروان بس اول مرة اعرف اسمه كنت تقريبا في ثانوية عامة طول عمري فاكره عصفورة مستحلية صوتها

طبعا مش عارف هل فعلا انا ماكنتش اعرف الحاجات دي انا صغير ولا الزهايمر المبكر عمل عمايله معايا وكان ماشي ورايا علي خط مستقيم بأستيكة (علي رأي السادات)

لا والطامة الكبري بقي اني وانا عندي ييجي 180 سم وداخل علي 29 سنة اكتشف وانا بدعبس في المدونات ان فيه مدونة اسمها phoenix

طيب والعمل في الليلة الطويلة دي

وبعد مباحثات ومداولات ما اسفرتش عن اي حاجة رضيت بالامر الواقع واخدت التاج اللي هي بعتتهولي علي امل اني ابقي اتفاهم معاها بعدين واشوف ايه موضوع فونكس ده 

ندخل بقي علي التاج احسن سايبه في الفون من ساعة ما ابتديت وزمانه شاط (بس هاتيجي في العرضة ان شاء الله) 

.....................................................................................................................

من أرسل لك الدعوة ؟؟؟؟

طيب يعني خلي اللي بيسأل عاقل واللي بيجاوب عبيط

اكيد اكيد طبعا ولاد ابو اسماعيل 

 ....................................................................

ما هي كتب الطفولة التي بقيت عالقة في ذاكرتك؟ 

والله يعني بصراحةانا من صغري مافيش حاجة بتعلق معايا (انا اللي كنت باتعلق) لو حد شاف معايا حاجة غير كتاب المدرسة فعلشان كدة الكتاب الوحيد اللي كان دايما في ايدي وانا صغير هو كتاب العلوم بتاع رابعة ابتدائي ودايما كان مفتوح علي صفحة 24 وكان فيها شكل مقرف بتاعة الجهاز الهضمي فكنت باضطر اغطيه بكتاب صغنن كدة اسمه ( المغامرون الخمسة) وطبعا لدواعي الملل كان الكتاب ده لازم يتغير كل يوم بس صفحة 24 ماكانتش بتتغير ابدا

طبعا اكيييييييييييد عارفين ليه (بس بقي احسن ح من الرقابة يكون هنا)

.......................................................................

مَنْ أهم الكتاب الذين قرأتَ لهم ؟ 

طبعا نبيل فاروق 

نجيب محفوظ

يحي حقي

جمال الغيطاني

بيرم التونسي

صلاح جاهين

احمد فؤاد نجم

يوسف ادريس

احسان عبد القدوس

يوسف السباعي

طهه حسين

يوسف القعيد

يوسف زيدان

بلال فضل

علاء الاسواني

جلال امين

ستيفن كوفي

باولو كويلهو

جابرييل ماركيز

...........................................................

من هم الكتاب الذين قررت ألا تقرأ لهم مجددا؟ 

بصراحة بصراحة واحد من اصحابي كنت لسة في سيرته من كام يوم للاسف هو مدون وخلاني كرهت امسك اي كتاب مكتوب عليه كلمة مدون

بس ربنا امر بالستر خلي الواد يبيع الكتاب ويلم حقه وهو خلاص حرم ومش هايعمل كدة تاني  ماحدش يضربه (هو وعدني ياجدعاااااان)

 .................................................................

في صحراء قاحلة ، أي الكتب تحمل معك؟ 

طيب وانا ايه اللي هايوديني هناك اصلا وبعدين يعني يوم ما اروح صحراء جرداء لا زرع فيها ولا ماء اقوم اخد معايا كتب؟ طيب اخد زمزمية مياه انفع

انا باقول الوي عنق السؤال (واحتمال تتكسر ونستريح) واقول لو دخلت السجن هاطلب ايه (غير كوك دور ) 

اولاد حارتنا                           (نجيب محفوظ)

 أوراق شاب عاش منذ ألف عام            (جمال الغيطاني)

عصفور الشرق                               (توفيق الحكيم)

رباعيات صلاح جاهين                      (اكيد مش ولاد ابو اسماعيل)

100 طريقة فاشلة للهروب من السجن      (وده انا اللي هاألفه من خبرتي في السجن طبعا)

اوعوا تنسوا العيش والحلاوة انا باقول اهو

................................................................ 

من هو الكاتب الذي لم تقرأ له أبدا ، وتتمنى قراءة كتبه ؟ 

هو انا قريت لنيتشه بس مش كتير للأسف فعلشان كدة عايز اقراله اكتر خصوصا انه كان راجل شراني والناس الشريرين اللي زي حالاتي انا وهو نحب كدة نشجع بعضشينا

................................................................ 

ما هي قائمة كتبك المفضلة ؟ 

طيب ما انا اخدتها معايا في السجن لسة هاطلعها تاني؟

ياجماعة الحاجات دي بتحتاج تصاريح وبلاوي سودا وبعديت مأمور السجن قالي ماشوفش وشك هنا تاني

وبصراحة بصراحة بقي انا اديتهم هدية (لولاد ابو اسماعيل ) وانا خارج اصلهم كانوا جيراني في الزنزانة اللي جنبي

................................................................  

 

ما هي الكتب التي تقرؤها الآن ؟ 

كتييييييييييييير

ومن غير ضرب انا باقول اهو 

انا بقالي فترة كل ما افتح كتاب تصحل ظروف منيلة بستين نيلة تخليني اسيبه ولما ارجع اروح فاتح واحد تاني قبل ما اخلص الاولاني فعندي ييجي 40 كتاب مفتوحين منهم 

الرابح يبقي وحيدا                     باولو كويلهو

ماذا حدث للمصريين                  جلال امين

السكان الاصليين لمصر              بلال فضل

ضحك مجروح                         برضو بلال فضل

العادات السبع                        ستيفن كوفي

صديقي احبك                        مها العباسي
موسوعة وصف مصر                 علماء الحملة الفرنسية
قصة الحضارة                         واحد اسمه غلس ومش فاكره

أرسل الدعوة لأربعة مدونين من أجل مشاركتنا بذكرياتهم مع القراءة ؟ 

(ومش عارف ازاي طلب زي ده يبقي اخره علامة استفهام بس انا نقلته كدة ماليش دعوة) 

اي واحد هايعتب ناحية المدونة ويقرا البوست هاياخده

وده مش اختيار ولا هي عزومة

ده غصم واختصار 

واللي مش هاياخد الدعوة دي ويعملها هاجيبه وانا شايفكم كلكم واحد واحد

أوقاتي بتحلو

Don't Speak

كلهم أنتِ

تعددت اشكال العلاقات الانسانية وتباينت واختلفت فيما بينها واتخذت مسميات عديدة
فالانسان بطبعه كائن اجتماعي والفردية او الانعزالية سلوك استثنائي , واختلفت العلاقات باختلاف المجتمعات والثقافات والمشاعر ولكنها جميعا اتفقت علي انها تنشأ بين اكثر من فرد ، فقد تكون علاقة تنشأ بين شركاء عمل واحد او مهنة واحدة وتسمي زمالة او بين طرفين - او اكثر – اشتركا في روح واحدة فدعيت صداقة او تدخل في نطاق اسرة واحدة فهي بين اب وابن واخ واخت .. وقد يحمل نفس الشخص اكثر من صفة في علاقة واحدة او اكثر من علاقة ، فقد يكون زميل العمل هو نفسه الصديق المقرب او اخ او اب ……

وهكذا انا ..
لي الكثير من زملاء الدراسة والعمل وحتي زملاء السفر ولكنك انت رفيقة دربي في كل ما افعل ، عندي الكثير من الاصدقاء ولكنك صديقتي التي انسي معها كل ماسواها ولا اشعر بطعم فرحة الا برؤية ابتسامتها ولا يزول عني هم الا علي كتفيك ، لي اخوة ولكنك توأمي التي لا اطيق الانفصال عنها لحظة ،
عندي اب وام ولكني مسؤول منك في كل تفاصيلي مهما كانت صغيرة ، لم انجب بعد ابناء ولكنك ابنة روحي التي اشعر تجاها بمسؤلية وحب وخوف وحنان لم اشعره تجاه قطعة من جسدي ،
كم خضعت لسلطة رئيس في عمل او سواه ولكني ابدا لم انفذ امر بسعادة او استمتع بدكتاتورية سوي التي تصدر منك ، كم كان لي مرؤوسين ولم اشعر بالعطف والحنان في اصدار امر الا عندما يوجه اليك فيصبح طلبا فالتماس فرجاء ثم توسل .

من اجل كل هذا واكثر بكثير ..
فأنت حبيبتي .

اعشق تفاصيلك الصغيرة

لا اعلم منذ متي تسكنين قلبي
ولكني استيقظت ذات صباح لاجد اشيائي مبعثرة
تركتك تلهين مثل طفلة فرحة واكتفيت بمشاهدتك
لم اشأ ازعاجك حتي لا تهربين من عيني
لم اتسائل كثيرا ماذا اتي بك الي هنا ولم يدلك احد علي عنواني
فلم ارد ان تفسد علي اسألتي متعة مشاهدتك تمرحين بداخلي
لم تطل حيرتي كثيرا حين علمت انني حينما احتجتك بقوة وجدتك تمتزجين بدمي
ظللت اراقبك من بعيد
امتزجت بكياني
فوجدتني اعشق هدوئك ومرحك
ضحكاتك المجنونة
واصطناع الغضب
طفولتك البريئة
خجلك من اشيائك النسائية
احمرار وجنتيك ليتحولا لتفاحتين تزينان وجهك
عنادك واصرارك علي ماتريدين
عدم جدوي النقاش معك
رائحة عطرك
حبك لعرائس الاطفال
رغبتك في الصراخ في وجه كل من يخالفك
ملابسك الطفولية
وجدتني دون ان ادري اعشق كل مايرتبط باسمك
وجدتني اعشق كل اشيائك كبيرة كانت ام صغيرة

حالة واغنية

لم اكن اعلم ان هناك من يستمد روحه من كلمات مكتوبة

حتي وجدتني اتسمر امام رسالتك اقرؤها واعيدها

استنشقها

اتلهف طعما بين شفتي

اصارع النوم حتي لا تغيب من امام عيني

ترن في اذني كلمات اغنية لا اعلم من اين اتت

ايدي بتدور علي ايدك

وانا وسط الزحام

سامحني علشان خاطري

من يسامح من

سامحيني لاني لا املك سوي البكاء

سامحيني لاني لا استطيع ان اقتلع قلبي

عله يستطيع ان يفرحك دقائق

محتاج اشوفك ...المسك

علي كتفك الطيب

انام

حاولت انام مش عرفت

ليت قلبي يصبح وسادة

اتوق ان اصبح موسيقي هادئة

تتخلل اذانك لتستريحين

صوتك بيندهني

مش عارف السكة

صوتك بيندهني ولا سيبتليش عنوان

انا تعبانة فعلا تعبانة قوى كمان

ليتك تدليني علي مكانك

ربما استطعت ان اتحول ترياق لسعادتك

ربما استطعت ان اتخلي عن حياتي لصالح قلبك

مش قادر اوصلك

امتي هاتوصلي

محتاج اشوف ضلك

مايل علي ضلي

دائما ماتهربين مني

دائما ماتتقوقعين حول نفسك

كم مرة رجوتك الا تتركيني وحدي وقت حزنك

وحدتي وقت حزنك تفعل بي مالايفعله حزنك

ان كنتي ترين نفسك مثل طائر العنقاء

الذي يجدد ذاته بذاته

فانا لا استطيع

ارجوكي لا تتركيني وحدي في اصعب لحظات حياتي

لا تتركيني وقت حزنك

فربما ترجعين يوما لا تجدي سوي اشلاء

ايدي بتدور علي ايدك

علي صدري شبك ايدك

قلبي الضعيف بردان

ليه سيبتني وحدي

قبل الاوان بزمان

ايدي بتدور علي ايدك

قوانين الوراثة الطبيعية

جلست في تلك الحافلة اللعينة راثيا حالي بعد ان فاتني موعد القطار عائدا الي قاهرة المعز ناظرا الي طفل يمرح علي اقدام ابيه في المقعد المقابل لي ملاحظا ذلك التشابه الذي قد يصل الي حد التطابق بينهما

ولا اعلم لما تجسمت امامي في تلك الاثناء صورة الاستاذ "يحي الشهاوي " مدرس الاحياء في المرحلة الثانوية غارقا في عرقه محاولا بشتي الطرق "قلوظة" تلك المعلومات المحشو بها كتاب الوزارة كي تناسب تلك الاجسام الهلامية الدقيقة الموجودة بداخل جماجمنا الكبيرة المسماه "بالمخ البشري"

ولم تكن تلك المعلومات سوي قوانين الوراثة الطبيعية المتمثلة في قوانين عالم الوراثة الاشهر "مندل"

تذكرت وقتها ما ورثنا من ابائنا وما  ننتظر توريثه لابنائنا فلقد لعبت الوراثة الطبيعية دورا لا يمكن انكاره بجانب دورها في المظهر الخارجي للمصريين الذين لا تربط بينهم ملامح واحدة سوي في المنطقة الخلفية من الرقبة التي ندعوها "قفا" في لونه الازرق باختلاف درجاته

لعبت تلك القوانين دورا مهما في توريث هذا الشعب الكثير من الصفات المكونة للشخصية مثل حب الكسل والكثير من الكلام بدون عمل حقيقي وتمصير كل ماتمتد اليه ايديهم من مخترعات والاستغلال الامثل لكل مايوجد في طريقهم  والامثلة علي ذلك كثيرة اقربها ما حدث في انفاق كبري امبابة التي كان الهدف منها صيانة جسم الكوبري ولكن رجل الشارع المصري بحذاقته المعهودة رأي فيه مالم يراه صانعوه فاستخدمه اوكار لممارسة فعل الاغتصاب والتحرش بفتيات القي بهن حاذق مثله عرف كيف يتنصل من ابوته

ويطفوا علي السطح في هذه الايام لفظ التوريث بمفهوم اخر لنري حكام يورثون الحكم لابنائهم بالاضافة لما ورثوه اياهم من بلاهة وتغطرس وشعب بل لنقل " عبيد " مقهورين

وسط كل هذه الموروثات والمورثين والوارثين تذكرت ماعندي من صافت ورثت بعضها واكتسبت الاخري ووجدتني افكر تري اي منها سيرثها ابني اللذي قد يرزقني به الله – بعد ان يرزقني امه الاول- ان شاء الله

فوجدتني اتمني الا يرث مني سوي شيء واحد وهو حبي واحترامي لكل الناس

فوالله العظيم والله العظيم بحبكم كلكم