جيوب الشنطة

باروح بيتنا كل اسبوع وييجي ميعاد السفر وماما تحضرلي الشنطة وكل مرة اقولها ياماما ده انا رايح مصر يعني ام الدنيا مش رايح صحرا يعني
الحاجات دي كلها مالهاش لازمة بس مافيش فايدة وبيني وبينكم انا مابادقش قوي معاها يعني اهه برضو توفير يعني هو المرتب هايكفي ايه ولا ايه ههههههههههههه
بس فيه ملاحظة باقولها لماما كل اسبوع ومافيش فايدة مش عايزة تبطلها كل مرة اقولها ياماما الشنطة فيها جيوب كتير ومع كدة تلاقيها بتحط الحلجة كلها في جيب واحد الهدوم مع الاكل مع الاوراق وكله علي بعضه (هردميسة يا ابو عيسي) ماتعرف بقي بتوفر الجيوب التانيين ولا بتكسل تفتحهم ولا بتحط الحاجة مع بعضها من مبدأ انهم يونسوا بعض ولا ايه مش عارف
بس اكتشفت بعد كدة ان مش ماما بس هي اللي بتعمل كدة لا ده الناس كلها كدة
ماشيين بثقافة الزحمة ( ايه الكلام الكبير اللي انا باقوله ده حلوة ثقافة اللحمة دي هههههههههه) يعني تلاقي في محطة المترو طابور طوييييييييييل قدام شباك والشباك التاني فاضي خالص ومع كدة اروح اقف ورا الطابور الطويل ماهو برضو ونس يعني وبعدين اكيد الشباك الفاضي ده التذاكر اللي فيه مش حلوة والا يعني الناس سايباه ليه وواقفة كلها عند الراجل ده واللي بييجي بعدي برضو ييجي يقف ورايا من نفس المبدأ يعني
طيب بزمتك لو دخلت بلوج ولقيت العداد بتاعها قليل كدة وماحدش بيدخلها مش هاتستني اصلا لما تقرا اللي فيها وتشوفها عاجباك ولا لا هاتقول ياعم ده ماحدش بيدخلها تبقي اكيد اي كلام
بقينا بنسيب الناس تعملنا افكارنا بنكسل نفكر ما الناس فكرت قبل كدة وعرفوا ان ده حلو وده وحش لسة هاتعب نفسي بقي وافكر انا كمان خليني ياعم زي الناس واللي زي الناس مابيغلبش
ياتري هاييجي اليوم اللي كل واحد فينا يفكر بنفسه ومايديش دماغه لحد ولا هانفضل طول عمرنا نجري ورا اي ناس بتجري في الشارع واحنا مش عارفين هم بيجروا ليه
يالله ربنا يسترها علينا

واحد صاحبي كان عبيط

اعرف واحد صاحب من زمان كان بيحب واحدة قوي وفضل يحبها ييجي سنتين بس كان نيلة وخيبة ومش قادر يقولها انه بيحبها ماكانش بيتصور الدنيا من غيرها كانت كل حاجة في حياته لو عدي يوم من غير مايشوفها يبقي يوم منيل بستين نيلة كانوا زمايل في الكلية وبسببها كره الاجازة علشان مابيشوفهاش كان نفسه الدراسة تبقي 24 شهر في السنة لو شافها في يوم متضايقة ولا زعلانة كان بيعمل اراجوز علشان يضحكها كان بيقضي اليوم كله معاها الصبح في الكلية وبالليل علي الشات كان بيدور في وشها هي عايزة ايه ويعمله قبل ماتفكر فيه

وفي يوم بعد سنتين معاناه مع المرض المزمن ده لقي رسالة منها علي الايميل
انا عارفة كل حاجة من اول يوم شفتك فيه حاسة باللي جواك عارفة انك بتحبي وانا كمان حبيتك كنت باحس بيك وانت بتحاول تقف جنبي وانا تعبانة كنت بافهم كل تلميحاتك اليوم اللي كان بيعدي من غير ما اشوفك ماكنتش بحسبه من عمري لو شفتك متضايق ماكنتش باعرف اقعد علي بعضي وبابقي مش عارفة اعمل ايه علشان اريحك كنت باستناك كل يوم تقولي بحبك لا ما انت كنت فعلا بتقولها كل يوم انت اجمل انسان قابلته في حياتي
وفي اخر الرسالة كان فيه ملحوظة صغيرة
خطوبتي يوم الحد اللي جاي اوعي ماتجيش هازعل قوي لو ماجتش

بررررلوم

حد فينا يقدر ينسي اسماعيل ياسين في الاسطول لما الشاويش عطية بيقوله شغلتك علي المركب بررلوم ياعسكري !!!!!!!!!
اه والله العظيم حياتنا كلها بقت بررولوم
الواحد بيصحي الصبح من النوم بررولوم ويلبس هدومه بررولوم ولو قابلني حد في الشقة اقوله بررلوم وانزل علي السلم بررلوم
وفي الشغل كل حاجة بررلوم ولما اجي اكل باطلب بررلوم دليفيري وباكله بررلوم علشان اخلص شغلي بررلوم واروح بررلوم
حياتنا كلها بقت بررلوم في بررلوم
اغانينا بقت بررلوم كلامنا مع اهالينا بقي في حدود البررلوم وبس
فين روقان زمان فين اغاني الست وعبد الحليم
في قعداتنا مع جدي يحكيلنا عن زمان وايام زمان
صدقوني ماعدتش باشوف جدي الا ف المناسبات وباشوفه بررلوم واجري
الناس في الشارع بتجري بررلوم والعربيات بررلوم واخلاقنا بقت بررلوم واعصابنا بررلوم
ماحدش بيستمتع بحاجة بيعملها
ياراجل ده حتي الحب بقي بررلوم
تلاقي واحدة قاعدة مع خطيبها بتقوله انجز انت لسة هاتسبيلي هات من الاخر عايز ايه انا فاهماك عايز تاخد بوسة يالله خلصني
هييييييييييييييييييييه يالله ربنا يسترها علينا
بس علي فكرة بقي انا لسة عندي امل
عارفين ليه ؟؟؟؟؟
برررررررررررررررررررلوم


ملحوظة بررلوم

اللي فهم انا عندي امل ليه يكتبلي وهاياخد جايزة كبيرة عارفين الجايزة ايه؟
بررلوم

تحب تاكل ايه سيادتك

بقالي كام يوم قاعد عند واحد صاحبي في شقته وكل يوم اعمل مشكلة انا وهو وممكن توصل للخناق وهو يتقمص مني او انا اتقمص منه والسبب حاجة بسيطة
تحب تاكل ايه
ييجي ميعاد الغدا الاقيه يقولي هاتاكل ايه اقوله اي حاجة يقولي ماعرفش اي حاجة دي شوف انت عايز تاكل ايه اقوله ياعم اللي انت هاتاكله جيب لي منه انا مش هاتفرق معايا
اتاريه هو كمان بيسألني علشان يجيب زيي
للدرجة دي ماعدناش عارفين ناخد قراراتنا حتي في ابسط حقوقنا حتي في اختيار الاكل بقينا بنعتمد علي الناس حتي في اختيار الاكل
والادهي اني ممكن ادخل مطعم والراجل يقولي تحب تاكل ايه سيادتك افضل متنحله شوية وبعدين اقوله انتوا عندكم ايه يقعد يقولي حاجات كتيرة ولما يخلص اخد اخر حاجة قالها من بقه واقوله هي دي
ياريت الموضوع بقي بيرسي علي الاكل وبس
قراراتنا كلها بقينا بناجلها وبندور علي حد ياخدها بدالنا
واحد يبقي شغال في مكان وقدامه فرصة احسن بكتيير بس مش عارف ياخد القرار انه يسيب شغله خايف ياخد قرار يطلع غلط طيب وايه يعني لو طلع غلط هي دي نهاية العالم هو يعني مافيش شغل احسن من اللي انت فيه
تفتكروا مين السبب
تعليمنا اللي كان بيحشينا بشوية كلام ونطرشه في الامتحان من غير مانفكر هو السبب؟
ولا اهالينا اللي ماخلوناش ناخد قرار واحد في حياتنا هم السبب
كانوا خايفين علينا من قراراتنا علشان كنا عيال ومانعرفش مصلحتنا طيب وهم بقي كانوا عارفين مصلحتنا؟ وكانوا عارفينها ازاي؟ كانوا بيشموا علي ظهر ايديهم ولا كانوا بيفتحوا المندل؟
ادخل هندسة الهندسة دلوقتي احسن حاجة وبعد عشر سنين تبقي الهندسة مالهاش قيمة
هم كانوا بيبصوا للي ماشي في السوق بس انا كان نفسي ادخل اللي باحبه
انا كنت باحب الهندسة وعلشان كدة دخلت هندسة بس لو واحد دخلها غصب عنه علشان اهله عايزين كدة تفتكر حاله ايه دلوقتي؟
كل ده مش مهم علشان دي حاجات خلصت وراحت المهم في اللي جاي
المهم والاهم هاتعمل مع ولادك اللي عمله معاك اهلك؟؟؟؟؟؟
هاتسيبهم يختاروا ويغلطوا ويقعوا وتسندهم
ولا هاتشيلهم طول عمرهم لحد مايكبروا وهم عندهم لين عظام مابيعرفوش يقرروا هم عايزين ياكلوا ايه

ده بياكل ببلااااااااااااااااش

امبارح خلص معرض( انتربيلد) والجماعة اللي ربنا كتب عليهم انهم يكونوا مهندسين زي حالاتي يعرفوا يعني ايه انتربيلد وللي مايعرفش ده معرض فيه كل حاجة خاصة بالمباني من معدات ومواد وكل حاجة
المهم زي ماعرفتوا قبل كدة اني رحت المعرض ده من يومين مع عم صالح (ادعوله ربنا يشفيه هو دلوقتي في العناية المركزة) فوحنا بنتفرج فيه مهندس من اللي كانوا معانا لفت انتباهه حاجة غريبة
قالي هو حديد عز مش مشترك ليه في المعرض السنة دي
بصيتله وضحكت قلتله وهايشترك ليه هو الناس اللي زي دي محتاجة معارض ولا كلام فاضي من ده هو فيه غيره اصلا علشان يعمل دعاية لنفسه ما الناس كلها عارفاه
وساعتها افتكرت الجملة الشهيرة بتاعة فناننا الجميل عادل امام
"هو محتاج فلوس ؟؟؟!!! ده بيركب ببلااااااااااش!!!!!!

عم صالح

حكااااااااااية عم صالح ده مشكلة نوع من البني ادمين اللي ممكن ماتقابلهمش الا مرات قليلة قوي في حياتك بيفهم في كل حاجة وبيعرف في اي حاجة
عم صالح ده سواق في الشركة اللي انا شغال فيها بس هو مش بس سواق هو سواق ونجار مسلح ونجار موبيليا وميكانيكي سيارات وكهرباي ومبيض محارة ومهندس وطيار وقبطان وكل حاجة في الدنيا
مش ممكن تيجي مناسبة للكلام ويفوتها ولو ماردتش عليه تبقي مش مستنضفه لازم تشارك معاه ومش اي مشاركة لامؤاخذة لازم تقول الكلام اللي علي مزاجه اوعي يوزك عقلك في مرة كدة وتقول رايك بصراحة في حاجة بيحكيلك عليها يبقي نهار مش فايت ومش طالعله صبح تبقي انت مش بتفهم وانت مغرور بس علشان انت معاك ورقة اسمها بكالريوس هندسة وشايفه ياعيني سواق انما ممكن يكون السواق بيفهم احسن منك بكتير
عم صالح قرا الالياظة (الالياذة) ومغرم بكشبير (شكسبير) وبيموت في نجيب محفوظ وبلديات زويل ودفعة البرادعي في الروضة
عم صالح ضليع في السياسة وهو اللي علم ماركس الشيوعية وهو اللي عمل النظام الراس مالي في امريكا
امبارح اخدنا عم صالح علشان يودينا معرض (انتر بيلد) ومن حسن حظنا ولا مش عارف بقي من سوء حظنا انه دخل معانا المعرض
يااااااااه علي اللي عرفته ماتتخيلوش عرفت ايه من عم صالح في المعرض ده
كل مانيجي ماننبهر بحاجة معروضة ونقول ياااااااه ايه التقدم ده يطلع هو اللي اخترعها في ابسط صورها بس الخواجة سرق فكرتها منه وطورها وصنعها قبله (طبعا لان الروتين والبيروقراطية في مصر بتقتل المواهب الكامنة لدي عم صالح)
ياه ده انا كانت معلوماتي سطحية قوي
تخيلوا عم صالح هو اللي عمل فكرة خلاطة الاسمنت والشدات المعدنية والسقالات يااااااااه بجد ماتتخيلوش اتستفدت اد ايه من المشوار بتاع المعرض ده مع عم صالح
تخيلوا بقي لو كنت رحت لوحدي كانت هاتفوتني كل المعلومات التاريخية العظيمة دي
تصورا ياسبحان الله حتي الرخام
الرخام اللي كنت فاكره انه خلقة ربنا كدة وبنقطعه كدة من الجبل وخلاص
شفتوا سذاجتي بقي قال بنقطعه من الجبل قال مش باقولكم معلوماتي قديمة
عم صالح بقي طلع هو صاحب الخلطة السحرية اللي بتحول الصخرة اللي بشوفها في الجبل دي لرخام
ياسبحان الله شفتوا بقي معلوماتني كانت قديمة ازاي
بس ياحول الله شوية وملقناش عم صالح ماشي جنبنا ندور عليه فيالمعرض كله في سلقط في ملقط مش لاقيين عم صالح فين وفييييين لقيناه في قسم الكتب عمال يقلب فيها زي المجنون ايه ياعم صالح مالك بتدور عليه ايه مايردش فيه ايه ياعم صالح مافيش فايدة يالله ياعم صالح علشان هانروح وهو ولا كانه سامعنا ماسك الكتب وعمال يقلب فيها زي المجنون وكانه بيدور علي حاجة معينة
في الاخر لما زهقنا شديناه بالعافية علشان يروحنا
يادوب انا وصلت البيت ولقيتهم بيتصلوا بيا بيقولولي عم صالح جاتله جلطة ودخل المستشفي ليه ياجماعة من ايه ماحدش يعرف السبب جريت علي المستشفي لقيته في العمليات استنين لما خرج وسألت الدكتور خير يادكتور قالي الحمد لله لحقنا الجلطة بس هو طول ماهو في البنج مافيش علي لسانة غير اخدوا كتبي كلها ونشروها باسماءهم اخدوا كتبي كلها ونشروها باسماءهم
ياريت ياجماعة ندعي كلنا لعم صالح ربنا يشفيه ويقومه بالسلامة لان العالم من غير عم صالح هايبقي خرابة مالهاش معني


ملحوظة
الكلام ده كله فعلا بجد وعم صالح فعلا في المستشفي

مش عايز اكون ملاك

حد فيكم يكره انه يكون ملاك؟
اه انا اكره اني اكون ملاك محبش ده انا عايز ابقي انسان بكل اللي في البني ادمين من حاجات وحشة وحلوة عايز اغلط واقع وحد يصلحلي غلطاتي نفسي اغلط في الناس اشتمهم اضربهم لو قدرت واعتذر ويقبلوا اعتذاري او مايقبلوهوش هم احرار نفسي ساعات مايهمنيش مشاعر الناس وساعات برضو يهمني
نفسي لما حد يغلط فيا ازعل منه واخاصمه وماكلموش ولما يصالحني اعاتبه وازعق فيه وممكن اشتمه
ليه باتمني ابقي ملاك مع ان ربنا ماخلقنيش كدة ليه المفروض مازعلش من حد مع ان الناس بتزعل مني لو غلطت فيها من غير قصد
ليه ماحدش بيعتزرلي لو غلط فيا وانا اللي باعتزر لهم وهم الغلطانين
ليه لما باغلط في حد من غير ما اقصد بافضل قلقان وزعلان من نفسي لحد ما اصالحه
مين فينا الصح انا ولا هم
هم طبعا علشان هم عايشين زي ماربنا خلقهم وانا اللي باحاول اكون حاجة تانية
انا عمري ماهاكون ملاك
وباللي باعمله ده برضو مش هابقي انسان
وهاعمل زي الغراب اللي حاول يقلد الطاووس
لا فضل غراب ولا عمره هايكون طاووس وفضل يعرج باقي حياته
ليه مانحبش نفسنا زي ما احنا

حلم بسقف

يوم الجمعة اللي فاتت كان من الايام القلائل ( دي مش جمع قلة ماحدش يفهم غلط) اللي الواحد بيستعيد فيها زمان وايام زمان
في اليوم ده كنا متجمعين انا وشلة الانس بتاعة زمااااااااان من ايام ثانوي وطبعا دي من الفرص النادرة قوي اللي الشلة كلها ممكن تتجمع فيها
طبعا واحد فيهم كان اجازة شهر من شغله في السعودية والتاني كان نازل من الكويت علشان يتجوز واتنين كانوا اجازة سنوية من الامارات وواحد صاحبنا بقي كان نازل من السودان اجازة برضو من شغله وكام واحد كدة كانوا في ليبيا وبرضو نزلوا اجازة
كلهم طبعا زي ما انتم شايفين في دول عربية شقيقة مافيش حد منهم في حتة غريبة يعني مافيش غيري انا اللي متغرب في دولة اجنبية وهي دولة القاهرة الكبري
المهم قعدنا نفضفض وندردش واللي عنده مشكلة يحكيها واللي عنده نكتة يقولها ورجعنا ايام زمان بجد
وفي وسط كلامنا واحد من الشلة الفقر دي شغال في شرم الشيخ محاسب قانوني في فندق وبيحكيلنا عن اللي بيشوفه هناك فمن ضمن كلامه بيقول انه فيه شيف في الفندق اللي هو شغال فيه بياخد في الشهر بالدولار مايعادل حوالي 100 الف جنيه مصري (غلبان ياعيني يعملوله ايه في الغلا اللي احنا فيه ده )
المهم فواحد صاحبنا من اللي جايين من الامارات قاله يعني لو الراجل ده استغني ليا عن شهر من مرتبه انا ابطل غربة وشحططة ومش بعيد ابطل شغل خالص واحط ال 100 الف جنيه في البنك و اعيش بفوايدهم كل شهر
واحد تاني بقي فتك وخريج تجارة برضو قام قاله ياعم فوايد ايه اللي تعيش بيها دول يادوبك يجيبولك 800 جنيه في الشهر
راح واحد تاني شغال في بنك قاله ده كان زماااااان دلوقتي يادوب يجيبولك 600 جنيه علشان الفايدة دلوقتي بقت 8 %
واحد بقي شغال في بنك من بتوع الائتمان الزراعي قاله لالالالالالا انت ممكن تجيبهوم في البنك بتاعنا الفوايد عندنا اعلي ربع في المية يعني الفوايد عندنا 8.25 % وبكدة ممكن يجيبولك في الشهر ييجي 620 جنيه
كل ده والراجل الغلبان اللي قال انه هايحطهم في البنك ساكت وعمال يبص لده وده بس يظهر انه صدق وافتكر انه فعلا بقي معاه المية الف جنيه ومحتار ياعيني يحطهم فين ولا فين
وفي الاخر خالص قالهم ياجماعة لا ال 600 جنيه ينفعوا ولا حتي ال 800 هم دول هايعملولي ايه دول يادوب يجيبوا عيش حاف
شوفولي حل تاني غير البنك ده استثمر فيه المية الف جنيه دول
وكل واحد بقي تفتق ذهنه عن فكرة يستثمر فيها صاحبنا المية الف جنيه المزعومة
بس انا مااخدتش بالي من اللي قالوه لاني سرحت وانا قاعد معاهم في حاجة تانية خالص
هو للدرجة دي بقت حتي احلامنا ليها سقف مش قادرين نعديه
ياجماعة ده الراجل بيحلم انه يبقي معاه مية الف جنيه
ياعم المية الف مش مكفيينك احلم بمتين ولا تلتمية ولا ياراجل ان شالله نص مليون ***
دي الاحلام ببلاش والواحد لما يحلم يحلم بجد بقي يحلم بضمير
وسعها علي نفسك يا اخي يعني الدنيا مضيقاها عليك في كل حاجة وانت كمان هاتضيقها علي نفسك حتي في الحلم
تفتكروا ليه اللي بيحصل ده
ليه حتي خايفين نحلم ولو حلمنا بنحلم حلم ضيق قوي مش مكفينا
العيب فينا ولا فيهم (اللهم احفظنا يعني)
العيب فينا احنا اللي خايفين نحلم ونتصدم
ولا العيب فيهم هم اللي خلوا حتي الاحلام ليها سقف
يالله هانقول ايه بس
ربنا يسترها علينا
وكل سنة وانتم طيبين ورمضان كريم ويعيدها علينا وعليكم بالصحة والسعادة (اللي من غير سقف )

*** مش واخدين بالكم اني حتي في كلامي مش قادر حتي اعدي النص مليون حتي وانا بانقض الناس اللي بيحلموا وخايفين انا كمان مش قادر اعدي النص مليون جنيه وكأنه ثروة (وهو فعلا ثروة كبييييييييرة جدا بالنسبة لمعظم الناس في بلدنا ) بس للاسف الثروة دي ماتعملش اي حاجة دلوقتي

يابنت ياام المريلة كحلي

ياصباح الفل والورد والياسمين علي احلي جنينة
طيب والله العظيم وحشتوني . لا . المرة دي بجد اه والله
امبارح كنت قاعد زهقان وقرفان فتحت التليفزيون وقفلته وفتحته تاني كلها حاجات هابلة وهايفة ومتكررة مزيعة هايفة حاطة 7 كيلو اكسسوارات علي وشها وايديها وببتلوي قدام الكام وقال ايه بتقدم مسابقة والجايزة 500 دولار والسؤال كم عدد عجائب الدنيا السبعة
وحاجات كتيرة كدة وزهقت تاني وكنت هاقفله تاني بس لفت انتباهي محمد منير مع محمود سعد في برنامج البيت بيتك
بيني وبينك انا باعشق الاتنين بحب محمود سعد بكلامه وبساطته وعفويته حاجة كدة زيينا مش عايش في دور المذيع ويقعد يقول كلام مكلكع هو يعني علشان يبقي الواحد مذيع لازم الناس ماتفهموش
المهم مع كامل اعتذاري لعمنا محمود سعد بس انا ما اتسمرتش قدام التليفزيون علشانه ونسيت اصلا انه في البرنامج انما الحكاية والحدوتة كلها كانت في محمد منير
يانهار اسود ايه ده فيه حد كدة ايه الجمال والبساطة والعفوية والثقافة دي ايه التواضع ده مش ممكن بجد مش ممكن اتسمرت قدام التليفزيون نسيت اتعشي وسيبت الشغل اللي ورايا
اول محمود سعد ما قاله غني قلتله لالالا اوعي تغني متعنا بكلامك خليني اسمعك
واول لما غني قلتله اوعي تبطل غنا ماتتكلمش تاني خلي الحلقة كلها غنا وبس
غناه حالة وكلامه موضوع وهو علي بعضه حكاية
يانهار اسود علي شكله لما بيضحك ولا لما بيتكسف بيبقي عامل زي البنت ام المريلة الكحلي اللي بيغنيلها ايه البراءة دي ايه الجمال ده ربنا يخليك لينا ياعمنا وتمتعنا دايما بغناك وكلامك وجمالك وحلاوتك
من كتر ما كنت مبهور بيه نمت وماطافتش التليفزيون وصحيت بعد شوية علي صوت حمار بينهق

يا كداااااااااااااااااااب

هو ليه الواحد دايما بيكدب طول ماهو ماشي عمال علي بطال انا عن نفسي مش بحب الكدب واكيد مافيش حد في الدنيا بيحب الكدب لكن ساعات باظبط نفسي وانا باكدب من غير ما اخد بالي بيبقي كدب مش مقصود لكن في الاخر هو كدب برضو
يعني ممكن ابقي نازل من البيت وواخد عهد مع نفسي اني مش هاكدب النهاردة خالص وفجأة وانا ماشي في الشارع الاقي بنوتة حلوة كدة وامورة مقابلاني اروح ظابط نفسي كدة وظابط مشيتي واعمل نفسي واد تقيل مع اني مش كدة
ممكن واحد يكون ليه كرش يقوم يشفط كرشه علشان يبان واد استايل ورشيق
هو ده مش كدب ياجماعة
طيب وايه رايك في واحد يقعد في الاتوبيس ويلاقي جنبه بنت حلوة يقوم مطلع الموبيل ال (n95 ) ويعمل انه افتكر حاجة فجأة هايعملها عليه ولا يقعد يتفرج علي فيلم عليالموبيل ولا حتي يقعد يقرا الرسايل القديمة اللي فيه مع انه مش محتاج انه يعمل كدة ولو ماكانتش البنت دي جنبه ماكانش هايطلع الموبيل ولا يفتكره
طيب ده مش كدب
هاتقولي دي منظرة اه انا معاك انها منظرة انما برضو فيها كدب
هاتقولي كدب مابيضرش حد هاقولك لا بيضر
بيضرنا كلنا بيضر وبيضر نفسه وبلده
لما واحد يكون مرتبه يادوب بيكفيه لاخر الشهر واحتياجاته ماتطلبش انه يكون معاه موبايل ولو كان يبقي حاجة تقضي الغرض وتلاقيه شايل موبيل احدث موديل وبيغيره كل مايطلع جديد
مش هو كدة بيكدب علي نفسه وبيكدب علي الناس علشان يحط نفسه في مكانه مش بتاعته وبيضر اسرته اللي هم اولي بالفلوس دي
نفسي اقضي يوم كامل من غير ما اكدب علي حد ولا حد يكدب عليا
ياتري ممكن ده يتحقق
ولا هاتقولولي استني المدينة الفاضلة بتاعة عم افلاطون
فييييييييينك ياعم افلاطون
الله يرحمك قلتها كلمة حكة ومت
مافيش فايدة
لا مؤاخذة ياعم سعد يازغلول

وحشتوني

اه والله وحشتوني مش مصدقين طيب ان شالله اعدم عنيا وحشتوني ههههههههههههههههه
فشار؟؟؟؟؟؟؟؟؟؟؟
طيب وايه يعني وافرض اني فشار طيب ما الدنيا كلها بتفشر علي بعضها
واحد ماسك ودن صاحبته ويقولها انت الدنيا اللي عايش فيها وانت الهوا اللي باتنفسه وانت المياه اللي باعوم فيها
يبقي مين فينا الفشار انا ولا هو
ولا واحدة اول ماتشوف جارتها تحضنها وهات يابوس من الخد ده بوستين تلاتة والخد التاني عشر بوسات واول ماتديها ظهرها تقولها غوري جدك البلا وانت وشك يقطع الخميرة من البيت
لا والانكت بقي لما الفشر والقرع يبقي بين الاصحاب
يعني انا مثلا عايز حاجة من واحد صاحبي اتصل بيه وازيك ياراجل وسلامات ياااااااااه فينك ياعم من زمان والله واحشني مووووووووت والله انت كل يوم علي بالي وكل يوم اقول هاتصل بيك بس تحصل ظروف تمنعني والله واحشني جدااااااا اخبارك ايه احكيلي شغال فين دلوقتي وعامل ايه اتجوزت ولا لسة ............ واقعد ارغي معاه نص ساعة علي الموبيل طبعا ماهي موبينيل عملت الدقيقة ب 20 قرش وفودافون عاملة 50% رصيد هو الكلام يعني بفلوس والراجل يصدع مني وفي الاخر اقفل وكاني كنت باتصل بيه بس علشان اتطمن عليه وعلي صحته
دقيقتين واتصل بيه تاني اقوله انت قولتلي انت شغال فين ؟ انا ما اخدتش بالي الا بعد ماقفلت . طيب والشركة دي مش عايزة موظفين الايام دي ؟ صدقني انا مبسوط في شغلي قوي الحمد لله بس نفسي اكون معاك في مكان واحد .
وطبعا انا مفلس وقشلان (قشلان دي كلمة معرفش معناها ولا اصلها بس باسمعها كتير ) وبقالي 6 شهور قاعد في البيت
طيب يعني كان فيها ايه لو كنت اتكلمت بصراحة من الاول وقولتله انت شغال فين طيب مش عايزين موظفين عندكم؟
كنت وفرت علي الراجل صداع نص ساعة والاشعاعات الموبيل وكنت وفرت علي نفسي تمن مكالمة نص ساعة
الوحيد اللي كان هايبقي خسران شركة المحمول
اقول ايه يالله ربنا يسترها علينا
بس برضو والله وحشتوووووووووووووووووووووووني

فاااااااااااااااااااشل

ياجماعة انا قلتلكم باركولي من شوية بس يظهر انكم مش هاتلحقوا تباركولي علشان انا شكلي كدة هاتنازل عن الجنسية البلوجرية العظيمة وارجع انساني عادي مرة تانية اهيء اهيء اهيء اهيء
اصلي بعد ماعملت المدونة بتاعتي اخيرا بعد سنوات من الاشتياق ودخلت اتصفح شوية مدونات موجودة اتعقدت بصراحة
ايه ده ايه الحاجات دي كلها تروح فين ياصعلوك وسط الملوك الناس عاملة حاجات حلوة قووووووووي واشكال جميلة وتنسيق رائع للمدونات بتاعتهم
بس انا ماباعرفش اعمل الحاجات دي كلها انا اخري اكتب كلمتين وبادور علي الحروف في الكيبورد كمان
انا شكلي كدة مش هاكمل اهيء اهيء اهيء اهيء اهيء اهيء اهيء اهيء اهيء اهيء اهيء

باركووووووووولي

باركولي ياجماعة انا بقيت خلاص بلوجر من زمااااااااان وانا نفسي اخد شرف الجنسية البلوجرية وابقي بلوجر اد الدنيا كدة بس ماكنتش عارف ازي بس الحمد لله اخيرا وصلت اصل البعيد ذكي قوووووووووي ههههههههههه