الخميس، 19 يونيو، 2008

يابنت ياام المريلة كحلي

ياصباح الفل والورد والياسمين علي احلي جنينة
طيب والله العظيم وحشتوني . لا . المرة دي بجد اه والله
امبارح كنت قاعد زهقان وقرفان فتحت التليفزيون وقفلته وفتحته تاني كلها حاجات هابلة وهايفة ومتكررة مزيعة هايفة حاطة 7 كيلو اكسسوارات علي وشها وايديها وببتلوي قدام الكام وقال ايه بتقدم مسابقة والجايزة 500 دولار والسؤال كم عدد عجائب الدنيا السبعة
وحاجات كتيرة كدة وزهقت تاني وكنت هاقفله تاني بس لفت انتباهي محمد منير مع محمود سعد في برنامج البيت بيتك
بيني وبينك انا باعشق الاتنين بحب محمود سعد بكلامه وبساطته وعفويته حاجة كدة زيينا مش عايش في دور المذيع ويقعد يقول كلام مكلكع هو يعني علشان يبقي الواحد مذيع لازم الناس ماتفهموش
المهم مع كامل اعتذاري لعمنا محمود سعد بس انا ما اتسمرتش قدام التليفزيون علشانه ونسيت اصلا انه في البرنامج انما الحكاية والحدوتة كلها كانت في محمد منير
يانهار اسود ايه ده فيه حد كدة ايه الجمال والبساطة والعفوية والثقافة دي ايه التواضع ده مش ممكن بجد مش ممكن اتسمرت قدام التليفزيون نسيت اتعشي وسيبت الشغل اللي ورايا
اول محمود سعد ما قاله غني قلتله لالالا اوعي تغني متعنا بكلامك خليني اسمعك
واول لما غني قلتله اوعي تبطل غنا ماتتكلمش تاني خلي الحلقة كلها غنا وبس
غناه حالة وكلامه موضوع وهو علي بعضه حكاية
يانهار اسود علي شكله لما بيضحك ولا لما بيتكسف بيبقي عامل زي البنت ام المريلة الكحلي اللي بيغنيلها ايه البراءة دي ايه الجمال ده ربنا يخليك لينا ياعمنا وتمتعنا دايما بغناك وكلامك وجمالك وحلاوتك
من كتر ما كنت مبهور بيه نمت وماطافتش التليفزيون وصحيت بعد شوية علي صوت حمار بينهق

هناك تعليق واحد:

ليـــالي يقول...

خد عندك بقي D:

اولا ميرسي جدا يا منامينو انك افتكرتني وافتكرت مدونتي وجيت سلمت عليا .. بجد بجد بجد مش هاتتخيل اسعدتني قد ايه :D


ثانيا بقي >>>>>>>

جيت اقلب علي اخر موضوع عندك عشان اقولك ميرسي علي السؤال واشوف انت كاتب ايه ...
بس لقيت البلوجاية بتاعتك فتحت كلها علي بعضها بالمواضيع من اول ما قولت يا هادي لحد ما قدرك ربنا

بجري بعيني تحت وانا فاكره اصلا اني هانزل لاخر كوممنت عشان اعلق بعده واكتشفت اني نزلت لاخر موضوع عندك اللي هو اصلا اول موضوع عملته في البلوج ... وفضلت اطلع اطلع حبة حبة لحد عيني ما وقعت عالموضوع ده

وبحكي الفيلم التسجيلي ده كله .. عشان اقولك بجددددددد انا من اكبر عشاق الراجل ده

(((( منير ))))

..
منير فعلا مش مجرد مغني تسمع صوته يعجبك وكلماته والحانه .. وبردو مش مجرد مطرب بيعرف يحس الكلام اللي بيقوله ويوصله مع الموسيقي واحساسه في مكانه .. لااا .. منير فوق كل ده علي المستوي الانساني .. انسان بجد ... شخصية جبارة .. تبقي متأكد ان البني ادم ده لو قدامك وبتحكي معاه مش هاتشبع من كلامه ومن اسلوبه ابداااا
مسقف وواعي وفاهم بيتكلم في ايه وفاهم ابعاد اي موضوع هايتكلم فيه ..واسلوبه في الكلام بجدددد يثبت انه مش مجرد حد قاري .. لا ده حاسس وشارب الكلام اللي بيقوله مش بيمثل انه فاهم ولا بينقل كلام حفظه ...

انا بجد حلم من احلام حياتي اني اقف قدامه وافتح اي موضوع واتكلم معاه .. قصدي اسيبه يتكلم وانا معاه . مهو مستحيل هاعرف افتح بوءي بحرف قدامه :$


و زي انت ما قولت ... يومها مع محمود سعد لما كان بيتكلم ... ما كنتش عاوزاه يسكت .. انا بصراحة كنت بتغاظ كل ما محمود يدخل في النص يعلق بحاجة واقول مش وقتك رغم اني بحترم محمود جدا ..

بس في وجود ده .. في وجود محمد منير .. بيتهيئلي لازم الكل يسكت ويسمعه .... بيتكلم او بيغني :)


عارفة ان البوست قديمة وان انت كمان ممكن تقول ايه العتيقة دي بترد علي حاجة حصلت القرن اللي فات :)

بس كان صعب جدا الاقي الكلام ده واعدي عليه مرور الكرام ... بجد كلامك عن الحلقة فكرني بيها وقد ايه انا كنت متونحة بردون كده قدامها ومش عاوزاها تخلص ..