الثلاثاء، 24 يونيو، 2008

ده بياكل ببلااااااااااااااااش

امبارح خلص معرض( انتربيلد) والجماعة اللي ربنا كتب عليهم انهم يكونوا مهندسين زي حالاتي يعرفوا يعني ايه انتربيلد وللي مايعرفش ده معرض فيه كل حاجة خاصة بالمباني من معدات ومواد وكل حاجة
المهم زي ماعرفتوا قبل كدة اني رحت المعرض ده من يومين مع عم صالح (ادعوله ربنا يشفيه هو دلوقتي في العناية المركزة) فوحنا بنتفرج فيه مهندس من اللي كانوا معانا لفت انتباهه حاجة غريبة
قالي هو حديد عز مش مشترك ليه في المعرض السنة دي
بصيتله وضحكت قلتله وهايشترك ليه هو الناس اللي زي دي محتاجة معارض ولا كلام فاضي من ده هو فيه غيره اصلا علشان يعمل دعاية لنفسه ما الناس كلها عارفاه
وساعتها افتكرت الجملة الشهيرة بتاعة فناننا الجميل عادل امام
"هو محتاج فلوس ؟؟؟!!! ده بيركب ببلااااااااااش!!!!!!

هناك 4 تعليقات:

Rana يقول...

انا مفهمتش حاجه ما علينا مش مهم ....
اللى عايزه اقولهولك ايه دخل الحديد فى الفلوس؟؟؟؟؟!!!!
ال 2 دول مش مرتبطين ببعض خالص احنا الحديد فى مصر دلوقتى بقى عمله لوحده جديده زى اليورو والدولار وكده يعنى ازاى بقى تربطهم ببعض
يا ابنى اش جاب لجاب الشبشب للقبقاب....
وبردوا ما عليناالمهم عم صالح ربنا بقومه بالسلامه

Manamino يقول...

مش باقولك انت زوق والله
انت اللي معبراني كدة ورافعة معنوياتي
ربنا يخليكي
وربنا يخليلنا الحديد فرق العملة بقي كبير قوي الايام دي جنيه الحديد شوفي بقي بكااااام يالله ربنا يسترها علينا

الأباصيرى يقول...

انا مش متابع الحديد فى مصر أخبارة أية بس أسمع انة شوية وهيبقى أغلى من الدهب

وبعدين انت هتحسد الراجل!! دة راجل مش ملاحق من الحزق الوطنى ولا من تجارة الحديد ولا البورصة
اللهم افقرنا وأغنيهم
اللهم خدنا منا وأديهم

يالا بلا باى بقى

Manamino يقول...

دهب مين ياعم اباصيري
دول تجار الحديد دلوقتي بقوا بيغشوه وبيدخلوا فيه دهب
ولو ماعندكش فكرة عن الاسعار فانت ممكن تقراها كل يوم في اسعار الطماطم والخيار والسبانخ
اه ماهو عز اخد توكيل الحاجات دي كلها بيقولك اكتشفوا انها غنية بالحديد