السبت، 29 نوفمبر، 2008

انصافا للحق




النهاردة السبت
وطبعا زي كل سبت لازم فيه مغامرة جديدة علي الطريق الزراعي من طنطا للقاهرة
بس المرة دي المغامرة كانت صعبة قووووووووي
عند مدخل قليوب كدة كان فيه عربية ميكروباص ماشة قدامنا وفجأة ماعرفش ايه اللي حصل ومالقيناش العربية
لقيناها بتتشقلب
اتقلبت اربع مرات ولما وصلنا لها بعد اقل من 10 ثواني ماكناش عارفين العربية دي كانت ميكروباص ولا نص نقل ولا ايه بالظبط
السقف بتاعها كان مرمي قدامها بحوالي 200 متر والناس اللي فيها كلهم ملقحين حوالين العربية والمنظر كان فظيع بكل المقاييس اللي في الدنيا
في اقل من دقيقة كان فيه اكتر من 50 عربية واقفين حوالين مكان الحادثة واكتر من 300 بني ادم من مختلف الاعمار بييجروا ناحية العربية المقلوبة وكل واحد او واحدة بيجري ناحية العربية كأن ابوه او اخوه جوي العربية
حتي الستات الكبار اللي مش هايقدروا يعملوا حاجة كانوا بيجروا وهم حتي مش عارفين ممكن يعملوا ايه
كل اللي قدروا يعملوه انهم قعدوا يعيطوا
وفي اقل من دقيقة برضو كان فيه اكتر من 100 موبيل بيرنوا علي نمرة واحدة وهي نمرة الاسعاف
كل ده مش غريب علي ولاد مصر وناسها اللي مش محتاجين اتكلم عنهم
لكن اللي لفت نظي كان حاجة تانية خاااااااالص غير كل ده
عربيات الاسعاف وصلت مكان الحادثة بعد حوالي 3 دقايق
ساعات كتيرة مابتعجبناش حاجات كتيرة
وساعات اكتر بنثور ونشتم ونقول فين الناس وفين المسؤولين
بس لما نلاقي حاجة صح من حقهم علينا نقولهم شكرا يارجال الاسعاف
شكرا ياملايكة الرحمة
هاتقولولي ده واجبهم والمفروض يعملوه من غير شكر
هاقول وهم ماكانوش مستنيين شكر
بس من حقهم علينا نقولوهم شكرا شكرا شكرا قووووووووووي
بس خلاص

هناك 8 تعليقات:

mahasen saber يقول...

hلما يبقوا ادوا واجبهم كده وبالسرعه والتفانى ده
يتقالهم طبعا شكرا وندعيلهم بظهر الغيب كمان

بس المصابين متعرفيش اخبارهم ايه
ربنا يعافيهم جميعا
يرجعهم بيوتهم بالسلامه

Manamino يقول...

محاسن
ميرسي علي المرور والدعوات الحلوة
والمصابين كانت حالتهم خطيرة جدا ربنا يسترها عليهم ويرجعهم لولادهم وبيوتهم بالسلامة

مين أنا يقول...
أزال المؤلف هذا التعليق.
مين أنا يقول...

صديقي منامينو ،

زيارة متأخرة جدًا لمدونتك اللطيفة ... بجد اتبسطت جدًا ببها...

بوست جميل جدًا ... وطبعا نشكر رجال الإسعاف حين يؤدون واجبهم .. مش هما بس إحنا لازم نشكر أي حد يقوم بواجبه ، لأن العادي الأيام دي إن مفيش حد بيقوم حتى بواجبه المطلوب منه ... بس لي تعليق صغير ... التلمائة مواطن إللي اندفعوا ناحية السيارة المتشقلبة دي أكيد أعاقوا حركة رجال الإسعاف، وتعاملهم الغير واعي مع المصابين كان من الممكن إنه يضاعف إصابات بعضهم ... وقد حدث في حالة قريب لي إنقلبت سيارته والناس خرجوه من السيارة بطريقة خاطئة أدت لإصابته بشلل نصفي ...

وأخيرًا، ربنا يحفظنا جميعًا من كل سوء...

تحياتي وتقديري وفي انتظار المزيد...

Manamino يقول...

مين انا
ياباشا ربنا يكرمك
بس انت عديت من هنا قبل كدة انا فاكر
انا اه ذاكرتي ضعيفة قوي بس مابانساش الناس الكويسين
وبالنسبة لنقطة التدافع من الناس فدي حاجة تلقائية ماحدش يقدر يحوش نفسه عنها
مش معقولة الناس هاتشوف حد بيموت وهايستنوا واقفين قدامه حتي لو اتصلوا بالاسعاف
ممكن يكونوا بكدة بيضروا المصابين اكتر بس ممكن كمان يكون واحد تحت العجل او فيه حاجة تقيلة فوقيه ولو سابوه اكتر من كدة مين عارف ممكن يجراله ايه وخصوصا ان الاسعاف مش كل مرة بتيجي بسرعة
بس برضو زي ما انت بتقول لازم نتحكم اكتر في مشاعرنا تجاه الحالات اللي زي دي ولو فيه حالة خطيرة قدامنا مانحركش صاحبها علشان ممكن نحركه بطريقة غلط تضره اكتر ماتفيده
تحياتي عليالمرور

kochia يقول...

طبعا جميل اننا نذكر الحسنات كما نذكر العيوب

تحياتي

Manamino يقول...

كوشيا
صح طبعا
شكرا للمرور
اقصد مرورك انت مش قطاع المرور في وزارة الداخلية
ههههههههههههههه
تحياتي

L.G. يقول...

صحيح انا دايما بقول بدل ما نذم في الوحش الأهم نسلط الضوء على الشئ الكويس مش كل حاجة في بلدنا وحشة ولو ركزنا في الحاجات الكويسة والناس الكويسة والافعال الكويسة حتثبت وتزيد ومع الوقت حتزيح كل حاجة وحشة من طريقنا ونضف صفحة مصر كلها وتبقى البلد برضه كويسة
اذكر عدد كويس من الكلمات الكويسة في التعليق :)
تحياتي