الاثنين، 15 ديسمبر، 2008

(ستيك) لعلاج الزعل



اولا انا باشكر كلللللل الناس الحلوين الطيبين الكميلين خالص خالص خالص اللي سألوا عليا في البوست اللي فات لما حسوا اني متضايق شوية
وبما اني الزعل تقيل علي قلبي ومابحبهوش ومابيعمرش معايا كتير فقررت امبارح اني اعمل انتفاضة عليه ويا انا ياهو
فقررت اني اعمل حاجة اطلع فيه طاقاتي المكنونة (دي غير المجنونة ركزوا معايا)

البوست ده ممنوع للي عنده القلب و المرارة والكبد والطحال والضغط والاطفال اقل من 30 سنة واكبر من30 سنة برضو
من الاخر اطلع برة احسنلك قبل ما يجيلك شلل رعاش

المهم ما اطولش عليكم قولوا طول روحت من الشغل فتحت التلاجة لقيت الستيك اللي الست الوالدة ربنا يخليهالي كانت شاحناهولي مع عربية المؤونة الغذائية بتاعة كل اسبوع
قلت خلاص انا هاعمل انتفاضة بالستيك النهاردة
ركزوا معايا بقي شوية علشان هاقولكم علي وصفة هايلة جدااااااااا للستيك بس هي وصفة صعبة شوية وكمان طويلة علشان فيها خطوات كتيرة
فارجوكم جيبوا ورقة وقلم وياريت كاميرا وممكن كمان موبيل وبلاي ستيشن وبيجامتين وجوزين جزمة وكام شراب علشان تكتبوا المقادير علشان ماتتوهوش مني

ندخل بقي علي الوصفة


اولا طلعت الستيك من الفريزر وحطيته في الحوض علشان التلج يفك وبعدين نزلت عند البقال اللي جنبنا اللي مش عارف احفظ اسمه لحد دلوقتي - زهايمر بعيد عن السامعين - وجبت من عنده كيس بريل اللي هو قاهر الدهون ده ورجعت البيت تاني وفتحت الكيس بالسكينة علشان ماعنديش مقص وحطيت تلات ارباعه في طبق بعد ماغسلته وحطيت عليه شوية ماياه وقعدت اقلب فيه لحد ماعمل رغوة كبييييرة كدة واخدت من الرغوة دي شوية علي الاسفنجة بتاعة المطبخ وقلت استعنا علي الشقة بالله
ومسكت الاطباق والحلل اللي كانت في الحوض من قبل اجازة العيد - اي حد هايشتم او يقول معفن او اي الفاظ خارجة هاطرده برة المدونة كلها - وقعدت اغسل الاطباق لحد حيلي ما اتهد - ربنا يكون في عون الستات والعذاب اللي زي حالاتي - وبعدين اخدت القلاية بعد ما اتغسلت وحطيت فيها شوية زيت من القزازة اللي نزلت اشتريتها من البقال - اللي ما اعرفش اسمه - بعد ماخلصت غسيل لاني اكتشفت ان الزيت اللي عندي خلص
وبعدين حطيت القلاية اللي انا لسة حاطط فيها الزيت من شوية علي البوتاجاز ودورت شوية كتير علي الولاعة علشان اولع البوتاجاز لحد مالاقيتها وقعدت اولع فيها كتير لحد ماولعت لانها تقريبا الغاز اللي فيها خلص واخيرا ولعت وبعدين قربتها من البوتاجاز وفتحت الزرار بتاع الغاز بتاع البوتاجاز اللي هو لونه اسود ده - لون المفتاح مش البوتاجاز - الله مش قلت ركزا بقي
المهم البوتاجاز مارضيش يولع
قلت بس تبقي الانبوبة اكيد فضيت - لسة مادخلوش عندنا غاز طبيعي وماحدش يتريق- طيب وبعدين في الورطة دي انا لسة هاستني لما الراجل بتاع الانابيب يعدي واخليه يركبلي انبوبة
طيب انا هافكها واستني لما يعدي اناديله وابقي وفرت شوية وقت
بس انا ماعنديش مفتاح انابيب اعمل ايه اعمل ايه
طلعت خبطت علي اصحاب البيت اللي انا مأجر منهم الشقة اللي قاعد فيها وجيبت منهم مفتاح للانبوبة ونزلت حاولت افكها
وانا بافكها اكتشفت انها كانت مقفولة فتحتها طلعت لسة فيها غاز وانا كنت قافلها قبل ما انزل اجازة العيد ونسيت
المهم قلت كويس خير الحمد لله ارجع بقي تاني للبوفتيك
طبعا البوفتيك كان التلج اللي عليه فك من زماااااااان فقلت ميزة برضو ان الانبوبة كانت فاضية - علي اعتبار ما كان يعني-
ولعت البوتاجاز وحطيت القلاية اللي انا لسة غاسلها من شوية بالبيريل اللي اشتريته من عند البقال - اللي ما اعرفش اسمه - اللي لسة حاطط فيها زيت من القزازة اللي لسة شاريها من شوية من عند نفس البقال - اللي ما اعرفش اسمه - واستنيت شوية لحد ما الزيت ابتدي يبقي صوته عالي في القلاية ورحت شايل حتة بوفتيك وراميها بسرعة بسرعة في القلاية وطلعت اجري علشان الزيت مايلسعنيش
استنيت شوية لحد ما حسيت انها ممكن تكون اتحمرت كويس وبعدين قلت اقلبها علي الناحية التانية
دورت علي شوكة مالقتش اتاري كل الشوك مرمية في الحوض وانا نسيت اغسلها لانها مش باينة من الماياه اللي بصابون اللي مالية الحوض بعد ما الحوض اتسد من بقايا الاكل اللي رميتها فيه مكان الاطباق اللي اتغسلت - ياريت الجماعة بتوع الهندسة الصحية يخترعوا احواض تقدر تستوعب بقايا الاكل امال يعني هانوديها فين - المهم قعدت الغوص شوية في الماياه لحد ماطلعت بشوكة وغسلتها من الرغاوي اللي لسة مالية الطبق اللي حطيت فيه شوية ماياه علي البيريل اللي فضيته من الكيس اللي اشتريته من البقال - اللي ما اعرفش اسمه-
وقلت اقلب بقي حتة البوفتيك اللي في القلاية رايح ناحية القلاية كدة لقيت فيها حتة فحمة ايه ده ايه اللي جاب فحم في القلاية هو انا نسيت احط بوفتيك ولا ايه
طبعا فاهمين اللي حصل
ماكدبتش خبر رحت مطلع الفحمة -البوفتيك سابقا- ومسكتها في الشوكة ووقفت قدامي مشكلة تانية اني عايز اجيب طبق من علي المطبقية من الاطباق اللي لسة غاسلها من شوية وحطيتها علي المطبقية علشان الماياه تتصفي
طيب اجيب طبق ازاي وانا شايل البوفتيك في الشوكة ومادد ايدي علي اخرها علشان ابعد البوفتيك عني -علشان خايف من العدوي ماهو ماحدش يعرف برضو البقرة قبل ماتدبح كان عندها ايه-
المهم رحت رامي الفحمة اللي في ايدي في القلاية تاني ورحت جبت طبق من المطبقية وحطيته علي الرخامة اللي جنب الحوض - اللي نسيت اقولكم اني غسلتها بعد ماخلصت غسيل الاطباق ومش هاقلكم اني غسلتها بالبيريل اللي جبته من عند البقال اللي ما اعرفش اسمه علشان حاسس انكم هاتضربوني لو قلت كدة تاني-
برضو المهم
طلعت البوفتيك تاني من القلاية وحطيته في الطبق وشيلت حتة بوفتيك تانية وحطيتها في القلاية ووقفت جنبها المرة دي خوفا من تكرار اللي حصل قبل كدة
كررت العملية دي مع كل حتة بوفتيك لحد ماخلص وطلع كله في الطبق
طبعا كانت الوان البوفتيك اللي في الطبق مختلفة يعني فيه منها الاحمر وفيه الاسود وفيه البني والروز والبنك
كل تدرجات الالوان اللي بتبتدي من لون اللحمة النية لحد ماتبقي فحمة
ورشيت عليهم شوية ملح وبالهنا والشفا
اخدت الطبق وطلعته برة في الصالة ونزلت اشتريت عيش من عند نفس البقال ولسة هابتدي اكل افتكرت اني ........................................
تفتكروا ايه
افتكرت اني صايم وماينفعش اكل بوفتيك
تيييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييت

دي الجملة اللي قلتها لنفسي ساعتها بس البلوجر بيمسحها كل لما اكتبها مش عارف ليه
يالله ماعلينا بلوجر قليل الادب
طبعا اخدت البوفتيك زي ماهو كدة ورميته في الزبالة وعملت مكرونة وبطاطس
البوست اللي جاي بقي هاحكيلكم علي طريقة عمل المكرونة والبطاطس

بعد الرحلة دي ابقي قابلني اصلا لو افتكرت اسمك مش تفتكر انت كنت زعلان من ايه
ايه رايكم بقي في طعم البوفتيك
يالله دوقوه وقولولي وانا مستنيكم في الحلقة اللي جاية من طبق منامينو

هناك 17 تعليقًا:

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب

maha zein يقول...

بوفتيك
ومكرونة
وبطاطس
وحجات غريبة
ده غير عم عبده البقال لانه اكيد اسمه كده

اقولك ايه
اقولك ايه
عارف من كل ده
صعبت عليا بجد
لانكم يا غلابة حتي لو حصل وعرفتوا تغسلوا المواعين معندكوش سينس انكم تروقوا المطبخ وتسلكوا الحوض والكلام ده

مش اد الكلام ده بتعدوا في شقق لوحدكم ليه
هه
ارجع بلدك يابني احسنلك
بلا مصر بلا كلام فارغ

الا انت رميت البوفتيك ليه
حدش قالك اني كنت مستنية حتة فحمة عشان افطر بيها
غريب
انت غريب

maha zein يقول...

وبعدين عندي تساؤل بس برىء
سيادتك المفروض انك بترد عليا هنا بردو عندك في المدونة وبتعلق علي مدونتي عندك بردو فى المدونة
مش فهعمة علي اساس اني لما اكتب بوست المفروض اجي اقرا تعليقكك عليه في مدونتك ولا ايه

انت خايف تعلق عندي يا مازنجر
هه

مولان يقول...

ومسكت الاطباق والحلل اللي كانت في الحوض من قبل اجازة العيد

---------

هههههههههههههههههههههههههههههههههههههههههههههههه ودي هتتغسل ازاي يعني

------------
وقعدت اغسل الاطباق لحد حيلي ما اتهد

-------------

طبيعيييييييييييييييييييييييييي مش اكتر من اسبوع

---------------
علي البوتاجاز ودورت شوية كتير علي الولاعة علشان اولع البوتاجاز لحد مالاقيتها وقعدت اولع فيها كتير لحد ماولعت لانها تقريبا الغاز اللي فيها خلص واخيرا ولعت وبعدين قربتها من البوتاجاز وفتحت الزرار بتاع الغاز بتاع البوتاجاز اللي هو لونه اسود ده - لون المفتاح مش البوتاجاز - الله مش قلت ركزا بقي

---------

هههههههههههههههههههههه احب انا الشرح المفسر بيعجبني اووووووووووووي

----------

وانا بافكها اكتشفت انها كانت مقفولة فتحتها طلعت لسة فيها غاز وانا كنت قافلها قبل ما انزل اجازة العيد ونسيت

------------

هههههههههههههههههه عادي بتحصل في احسن العائلات اكتر من كدا وبيحصل بس خليها في سرك بقي

--------------

شايل حتة بوفتيك وراميها بسرعة بسرعة في القلاية وطلعت اجري علشان الزيت مايلسعنيش

------------

ههههههههههههههههههههههه انا وانا بحمر البطاطس بس انا بقي بعمل ايه

بكون في اخر المطبخ ههههههههههههه وهيلا هوب واديله ادي وانشن بقي واحيانا تصيب واحيانا الصوابع بتقع علي الارض واروح اغسلها تاني

--------------
- ياريت الجماعة بتوع الهندسة الصحية يخترعوا احواض تقدر تستوعب بقايا الاكل امال يعني هانوديها فين

-----------

هههههههههههههه مهو في اختراع اسمه سله مهملات بتترمي فيها

------------
وقلت اقلب بقي حتة البوفتيك اللي في القلاية رايح ناحية القلاية كدة لقيت فيها حتة فحمة ايه ده ايه اللي جاب فحم في القلاية هو انا نسيت احط بوفتيك ولا ايه

---------------

هههههههههههههههههههههههههه لا مهو هيستناك علي بال ماتدور علي الشوكه وتغسلها ياااربي علي الصبر

---------------

طيب اجيب طبق ازاي وانا شايل البوفتيك في الشوكة ومادد ايدي علي اخرها علشان ابعد البوفتيك عني

---------------

هههههههههههههههه لا بجد مشكله عويصه اوي اوي

-----------

طبعا كانت الوان البوفتيك اللي في الطبق مختلفة يعني فيه منها الاحمر وفيه الاسود وفيه البني والروز والبنك

-----------

ههههههههههههههههههههههههههههههههههههههه اهو تنويع برده هههههههههههههههه

--------------

وفي الاخر طلعت صايم

هههههههههههههههههههه بجد موتني من الضحك

Manamino يقول...

مها زين
هانعمل ايه بقي يامها
ادينا بنكابر بس مهما حصل مابنعرفش نعيش من غيركم
عاجبك كدة
لازم تزلونا يعني باللقمة اللي بتعملوهالنا
ماشي ياستي
ماشي
مرضوضالكم برضو
ومعلش بقي ماكنتش اعرف انك بتحبي الفحم قوي كدة
عل يالعموم المرة اللي جاية هابقي اجيبلك الطبق كله
هههههههههههههههههههههه
وبالنسبة للتعليق في مدونة سيادتك الكريمة فانا اوعدك اني بعد كدة هاعلق عندك هناك مش هنا
ههههههههههههههههههههههههههه
ما اصلي كنت فاكر النت كله موصل علي بعضه بقي
بس ايه رايك في الفكرة دي
كل واحد يكتب بوست والناس تعلق عليه عندها مش عنده
يعني الواحد يكتب البوست ويتشحطط علي مايلف علي كل المدونات يشوف مين عبره
هههههههههههههههههههه
طيب ايه رايك بدل ماتقعدي تكتبي البوست عندك وتيجي تقري تعليقاته عندي هنا
اكتبي البوست عندي وريحي نفسك
هههههههههههههههههههههه

Manamino يقول...

مولان
حلو قوي تحليلك للموضوع ده
بجد عجبني
ههههههههههههههههه
وحلوة كمان البطاطس اللي بتتشاط في القلاية دي
بتلعبي سلة حضرتك
بعد كدة هانسميكي مولان ابو تريكة
وبعدين ايه موضوع سلة المهملات ده
ده نوع جديد من الاحواض ولا ايه
واضح ان ثقافتي الصحية ضعيفة قوووووي (كلمة في سرك انا مهندس معماري يعني الشغل ده بتاعنااصلا بس اوعي تقولي لحد )

kochia يقول...

المهم المود اتحسن الحمد لله

Manamino يقول...

كوشيا
اه طبعا اتحسن ونص كمان
هو بعد اللي حصل ده كله مش عايزاه يتحسن
وبعدين انا اصلا الزعل تقيل علي قلبي
مابيقعدش معايا الا دقايق
يالله ماعلينا
متشكر علي السؤال

مــها العباسى يقول...

عشان بس تعرفوا قيمتنا
احنا سوبر نغسل مواعين ونسلك احواض ونطلع البفتيك كله لون واحد
:)
بجد بوست لذيذ بس زعلت على البفتيك

Manamino يقول...

مها العباسي
والله المدونة نورت بجد
طبعا احنا نقدر نقول حاجة في دي
انتوا الكل في الكل طبعااااااا
واحنا من غيركم ولا نسوا
زي العرب من غير حارس
ههههههههههههههههههههه
وماتزعليش علي البوفتيك معلش احنا اللي بنجيب البوفتيك مش هو اللي بيجيبنا
هههههههههههههههههههه
تحياتي ومنورة مرة تانية

غير معرف يقول...

افتكرت اني صايم وماينفعش اكل بوفتيك

طبعا اخدت البوفتيك زي ماهو كدة ورميته في الزبالة وعملت مكرونة وبطاطس



بوست حلو و- يرفع الضغط خالص بس مش فاهمة الحتة دي ألي فوق !!

سوري يعني

Manamino يقول...

غير معرف اللي بقت معرفة خلاص ههههههههههههههههههههههههههههه
قصدي يعني بقيتي زبونة دايمة
المهم
سوريكي معاكي ياختي لا سوري علي واجب
الموضوع بسيط خالص وسهل ومش محتاج توضيح
بعد ماعملت البوفتيك وغلبت في تجهيزة بالطريقة الفذة دي افتكرت اني صايم
وبما اني صايم فماينفعش اكل لحوم خالص
لاننا وقتها كنا في وقت صيام
اه نسيت اقولك
انا اسمي مينا
بيتهيألي كدة فهخمتو
ولا لسة مافخمتوش
ههههههههههههههههههههههه
تحياتي يافندم ومتشكر علي المتابعة الكميلة دي
شكرا

غير معرف يقول...

أهلاً بحضرتك يا مينا فندم (يا ريت متقلبش مينا بجد وتنفجر علينا )

حصل خير، ل- لحظة افتكرت انك من ألي يحبو اللون الأزرق و- يوم السبت أصحاب ضفاير ، فاكرهم !!!

يا ريت متكونش عندك ضفاير لأطلع وحشة


فرصة سعيدة يا فندم

Manamino يقول...

الاستاذة غير معرف

(يا ريت متقلبش مينا بجد وتنفجر علينا )
مش فاهم قصد حضرتك ايه يعني
هو اللي اسمهم مينا بقوا قنابل الايام دي وبينفجروا ولا ايه



(
حصل خير، ل- لحظة افتكرت انك من ألي يحبو اللون الأزرق و- يوم السبت أصحاب ضفاير ، فاكرهم !!!)

طبعا مش فاكرهم ومش فاهم اي حاجة من اللي بتقوليه ده
ياريت توضحي كلامك
هم مين دول اللي بيحبوا لاللون الازرق وبيعملوا ضفاير
ويعني ايه يوم السبت


من الاخر كدة انا مش فاهم اي حاجة من التغليق بتاعك النهاردة شكلك كنتي نايمة وانت بتكتبيه
علي العموم برضو فرصة سعيدة يافندم

غير معرف يقول...

أنا اسفة ، ما كنتش أعرف ان في مصريين لا مسلمين ولا مسيحيين بجد

رغم إن كتاباتك حلوة !!!!

غير معرف يقول...

ههههههههههههههههه
هههههههههههههههههههههههه
هههههههههههههههههههههههههههههه
ههههههههههههههههههههههههههههههههههه



كونت بأعمل سيرش كده عن كلمه مش فاكرها والله هأقولك عليها بعدين لما أفتكرها....
المهم
لقيت بالصدفه المدونه بتاعتك اللزيزه موووت دي

وقريت الموضوع
بس سببلي مشاكل عديده
منها ما يلي

أولا/ عندي سيكشن الساعه 9 والساعه دلوئت 8.30 غالبا مش هألحقه

ثانيا / جوعتني جدااا
ثالثا / إني هأبدا أقرا مدونات من النهارده
............... ورابعا / ألحق كده ممكن الدكتور ما يجيش ولا يتأخر ولا تروح عليه نومه
سلام ولو لقيت المدونه لسه موجوده عندي هأقراها لو إتمسحت مش هأعرف أدخل هنا تاني

غير معرف يقول...

نسيت صحيح

أنا ما عرفتكش بنفسي

الإسم/محمود الشال
المهنه /كليه تربيه قسم تكنولوجيا
/ طالب طبعا مش دكتور يعني
/كونت عامل مدونه من زمان كده بس مش فاكرها هأفتكرها وهأبقه أدخل وأشوف يمكن تكون كسبة شهادة المليونير ولا حاجه

صباح الخير