حكااااااااااية عم صالح ده مشكلة نوع من البني ادمين اللي ممكن ماتقابلهمش الا مرات قليلة قوي في حياتك بيفهم في كل حاجة وبيعرف في اي حاجة
عم صالح ده سواق في الشركة اللي انا شغال فيها بس هو مش بس سواق هو سواق ونجار مسلح ونجار موبيليا وميكانيكي سيارات وكهرباي ومبيض محارة ومهندس وطيار وقبطان وكل حاجة في الدنيا
مش ممكن تيجي مناسبة للكلام ويفوتها ولو ماردتش عليه تبقي مش مستنضفه لازم تشارك معاه ومش اي مشاركة لامؤاخذة لازم تقول الكلام اللي علي مزاجه اوعي يوزك عقلك في مرة كدة وتقول رايك بصراحة في حاجة بيحكيلك عليها يبقي نهار مش فايت ومش طالعله صبح تبقي انت مش بتفهم وانت مغرور بس علشان انت معاك ورقة اسمها بكالريوس هندسة وشايفه ياعيني سواق انما ممكن يكون السواق بيفهم احسن منك بكتير
عم صالح قرا الالياظة (الالياذة) ومغرم بكشبير (شكسبير) وبيموت في نجيب محفوظ وبلديات زويل ودفعة البرادعي في الروضة
عم صالح ضليع في السياسة وهو اللي علم ماركس الشيوعية وهو اللي عمل النظام الراس مالي في امريكا
امبارح اخدنا عم صالح علشان يودينا معرض (انتر بيلد) ومن حسن حظنا ولا مش عارف بقي من سوء حظنا انه دخل معانا المعرض
يااااااااه علي اللي عرفته ماتتخيلوش عرفت ايه من عم صالح في المعرض ده
كل مانيجي ماننبهر بحاجة معروضة ونقول ياااااااه ايه التقدم ده يطلع هو اللي اخترعها في ابسط صورها بس الخواجة سرق فكرتها منه وطورها وصنعها قبله (طبعا لان الروتين والبيروقراطية في مصر بتقتل المواهب الكامنة لدي عم صالح)
ياه ده انا كانت معلوماتي سطحية قوي
تخيلوا عم صالح هو اللي عمل فكرة خلاطة الاسمنت والشدات المعدنية والسقالات يااااااااه بجد ماتتخيلوش اتستفدت اد ايه من المشوار بتاع المعرض ده مع عم صالح
تخيلوا بقي لو كنت رحت لوحدي كانت هاتفوتني كل المعلومات التاريخية العظيمة دي
تصورا ياسبحان الله حتي الرخام
الرخام اللي كنت فاكره انه خلقة ربنا كدة وبنقطعه كدة من الجبل وخلاص
شفتوا سذاجتي بقي قال بنقطعه من الجبل قال مش باقولكم معلوماتي قديمة
عم صالح بقي طلع هو صاحب الخلطة السحرية اللي بتحول الصخرة اللي بشوفها في الجبل دي لرخام
ياسبحان الله شفتوا بقي معلوماتني كانت قديمة ازاي
بس ياحول الله شوية وملقناش عم صالح ماشي جنبنا ندور عليه فيالمعرض كله في سلقط في ملقط مش لاقيين عم صالح فين وفييييين لقيناه في قسم الكتب عمال يقلب فيها زي المجنون ايه ياعم صالح مالك بتدور عليه ايه مايردش فيه ايه ياعم صالح مافيش فايدة يالله ياعم صالح علشان هانروح وهو ولا كانه سامعنا ماسك الكتب وعمال يقلب فيها زي المجنون وكانه بيدور علي حاجة معينة
في الاخر لما زهقنا شديناه بالعافية علشان يروحنا
يادوب انا وصلت البيت ولقيتهم بيتصلوا بيا بيقولولي عم صالح جاتله جلطة ودخل المستشفي ليه ياجماعة من ايه ماحدش يعرف السبب جريت علي المستشفي لقيته في العمليات استنين لما خرج وسألت الدكتور خير يادكتور قالي الحمد لله لحقنا الجلطة بس هو طول ماهو في البنج مافيش علي لسانة غير اخدوا كتبي كلها ونشروها باسماءهم اخدوا كتبي كلها ونشروها باسماءهم
ياريت ياجماعة ندعي كلنا لعم صالح ربنا يشفيه ويقومه بالسلامة لان العالم من غير عم صالح هايبقي خرابة مالهاش معني
ملحوظة
الكلام ده كله فعلا بجد وعم صالح فعلا في المستشفي
هناك 3 تعليقات:
شكل عم صالح دة مشكلة من مشاكل الزمن
بحب قوى أتعامل مع الشخصيات دى ومش كدة وبس وانا بتكلم معاهم بديهم برستيج محصلش وافضل عامل انى منبهر بيهم عشان يدينى اكتر من قصصة دى
هههههههههههههه
يابختك بية
وربنا يشفية
لا يا اباصيري ما انصحكش تتعامل مع عم صالح بالذات لان مهما ريحته واديته بريستيجه هو مش هايرتاح
فيه ناس كدة تحب دايما تحس انها مظلومة الاحساس ده بيريحهم ولو اديته بريستيجه هايقول انك بتتريق عليه
اه والله
واتطمن ياسيدي هو خرج من المستشفي وفي اجازة في بيتهم دلوقتي
ههههههههههههههه
عندنا منه واحد بس اسمه عم ابراهيم البواب
معاك ربنا حقيقى متخيلة منظرك وانت قاعد معاه
والمشكلة بقه لو لمحك وانت غصب عنك خرجت منك ضحكة من تحت لتحت ع اى حاجة من اللى بيحكيها ولا اى كلمة بينطقها نطق غريب تبقى سنتك مطينة بطين هههههههه
سلملى عليه صدقنى هايقولك الله يسلمها وهى عاملة ايه دلوقتى :)
إرسال تعليق